Wb/nia/Nga'ötö I/5

Nga'ötö Rubeno ba hikayara

I. 1 Ba ono Rubeno, si a'a ndraono Gizeraeli, — noa sa ya'ia zi a'a; ba me no ra'iö gaso namania ibe'e, ba tebe'e ba ndraono Yosefo, ono Gizeraeli, wa'asia'a andrö khönia, fa böi tebe'e si a'a ia ba zura nga'ötö andrö. 2 Noa sa Yuda andrö zi hulö zabölöra, ba ba nga'ötönia tetuyu zalaŵa, [samatörö]; ba fa'asia'a, ba khö Yosefo. — 3 Ba ono Rubeno, si a'a nono Gizeraeli, ba Hanokhi ba Falu ba Heserono ba Karimi. 4 Ba ono Yoeli, ba Semaya, ba ono da'ö, ba Gogi ba ono da'ö, ba Sime'i, 5 ba ono da'ö, ba Mikha, ba ono da'ö, ba Reaya, ba ono da'ö, ba Ba'ali, 6 ba ono da'ö, ba Be'era, ni'oloi'ö Digelata-Filezeri, razo Asiria; salaŵa ia, ba mado Rubeno. 7 Ba talifusönia, ba watalifusöta khöra, nitanö ba zura nga'ötö, ba no Yeieli, si a'a, 8 ba Sakharia, ba Bela, ono Asa ono Zema ono Yoeli; ba Garuri so da'ö, ba irege hili Nebo ba iregi Mba'ali Meono. 9 Ba tanö ba gatumbukha luo ba irugi ba zinga danö si mate andrö, si börögö ba mbewe Oifarati: noa sa oya sibai guriföra, ba danö Gileadi. 10 Ba me luo Zaulo, ba fasuwö ira ba mbanua Hegara andrö; ba me no te'ala da'ö labe'e, ba la'okhögö nosera, sagörö tanö manö tanö ba gatumbukha, i'otarai danö Gileadi.

Mado Gado

II. 11 Ba iraono Gado, ba ba gamaudura so, ba danö Mbazana, irugi Zalikha: 12 Yoeli, sanuhe, ba Safama, tambalina, ba Yaenai ba Safata, ba Mbazana. 13 Ba talifusöra, ba ngafura andrö, ba Mikhaeli ba Masula ba Seba ba Yorai ba Yaeka ba Sia ba Eberi, fitu. 14 Da'ö nono Abihaila andrö ono Huri ono Yaroahi ono Gileadi ono Mikhaeli ono Yezizai ono Yado ono Mbusi. 15 Ba Ahi andrö, ono Abidieli ono Guni, ba no högö ngafura andrö. 16 Ba ba danö Gileadi so ira, ba Mbazana ba ba mbanua si faböbö ba da'ö, ba ba zabölö du'u, ba Zarona, fefu, irugi mbalönia. 17 Da'ö fefu nitanö ba zura, me luo razo mado Yuda Yotamo ba me luo razo Ndraono Gizeraeli Yerobeamo [II.]

Lasuwö mbanua Hegara si tölu tua andrö

III. 18 Mado Rubeno ba mado Gado ba si matonga mado Manase, sabölö, solohe baluse ba si'öli ba sangila mogai fana ba si no to'ölö ba wasöndrata — 44.760 zabölö — 19 ba fasuwö ba mbunua Hegara andrö, ba ba Ndraono Yeturi ba ba Ndraono Nafisi ba ba Ndraono Nodaba. 20 Ba tetolo ira, ba tebe'e ba dangara mbanua Hegara andrö, fabaya si fa'awö khöra fefu. Noa sa la'angaröfi li Lowalangi, barö wasuwöta andrö, ba ifondrondrongo khöra, me no khönia manötöna ira. 21 Ba urifö nudura andrö, ba la'ohe ahulua: 50.000 gondra ba 250.000 mbiri-biri ba 2000 galide ba baero ö, ba 100.000 niha. 22 Noa sa ato zi mate nibunu, me no moroi ba Lowalangi wasuwöta andrö. Ba la'iagö nahiara, irugi luo la'oloi'ö ira [Dawa Asiria].

Satua mado Manase

IV. 23 Ba ba danö Mbazana so nga'ötö zi matonga mado Manase, irugi Mba'ali Heremono ba Senira andrö ba bawö Heremono; no ato ira. 24 Ba da'e zatua ngafura: Eferi ba Yisei ba Elieli ba Aserieli ba Yeremia ba Hodawia ba Yadieli, oi niha sabölö ba sebua turia, högö ngafura andrö.

Lasuwö ira Dawa Asiria ba la'oloi'ö ira

V. 25 Ba me la'erogö Lowalangi ndra tuara, me no amaedola zohorö-horö ira ba nadu niha baero andrö, nihori Lowalangi fönara, 26 ba ifarou dödö Wulo andrö, razo Asiria, Lowalangi Ndraono Gizeraeli ba he tödö Digelata-Filezeri, razo Asiria; ba lasuwö mado Rubeno ba mado Gado ba si matonga mado Manase, ba la'oloi'ö ba Hala ba ba Habora ba ba Hara ba ba mbewe Gosana, irugi ma'ökhö andre.

Famotokhi ba gahe

Fabaliŵa lala

Olayama Nga'ötö I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö