Wb/nia/Nga'ötö I/11

Tobali razo Ndraono Gizeraeli Dawido. Atu'a ira ba hati Siona

I. 1 Ba owulo Ndraono Gizeraeli fefu, khö Dawido, lamane khönia: Föfö nösiu ndra'aga! 2 Me föna sa'ae, me razo na Zaulo, ba no ya'ugö zolohe Iraono Gizeraeli, ba wasuwöta, ba ya'ugö göi zolohe mangawuli; ba noa göi imane khöu Lowalangiu, Yohowa: Ya'ugö dania zokubaloi banuagu Iraono Gizeraeli, ba razora ndra'ugö! 3 Ba möi khö razo ba Heberona, zatua Ndraono Gizeraeli fefu, ba fawu'u li khöra Dawido, ba Heberona, ba zanehe Yehowa; ba labayo ni razo Ndraono Gizeraeli Dawido, dali goroisa Yehowa andrö, nifa'ema Zamueli. 4 Ba isaŵa Yeruzalema Dawido, awö Ndraono Gizeraeli fefu — Yeruzalema Yebusi andrö; Iraono Yebusi, niha si tohöna ba danö, zi so ba da'ö. 5 Ba lamane khö Dawido banua Yebusi andrö: Lö'ö sa atu'a'ö ba da'e! Ba iforege Dawido, ba atu'a ia ba hati Siona, ya'ia mbanua Dawido andrö. 6 Ba da'ö imane Dawido: Ha niha zi oföna mangalani Iraono Yebusi, ba labe'e kumandra ba solohe! Ba si oföna möi yaŵa, ba Yoabi, ono Zeruya, ba tobali kumandra ia. 7 Ba ba hati andrö i'iagö sa'ae Dawido, andrö wa labe'e töinia mbanua Dawido. 8 Ba i'aro'ö mbanua andrö, fasui, i'otarai Milo andrö, fasui manö; ba Yoabi zangaro bö'önia, yomo ba mbanua. 9 Ba itugu tedou wa'abölö Dawido, itolo ia Yehowa ngahönö.

Sabölö andrö khö Dawido

II. 10 Ba da'e zalaŵa ba zabölö andrö khö Dawido, sanolo sibai ya'ia, me tobali razo ia, awö Ndraono Gizeraeli fefu, ba wamataro razo ya'ia, dali goroisa Yehowa ba Ndraono Gizeraeli. 11 Ba da'e wa'ato zabölö andrö khö Dawido: Yasobea, ono Hakhamoni, högö zi datölu andrö. Ilau dohonia, ba 300 zi mate, endronga. 12 Ba fanetenia, ba Eleazari, ono Dodo, ma'uwu Gahohi; samösa ia ba zi datölu, sabölö. 13 Awö Dawido ia ba Wasedami, me no owulo Ndrawa Wilisiti ba wasöndrata. Ba so ba da'ö mbolo nowi, gandru. Ba me moloi zato, labe'e Dawa Wilisiti, 14 ba la'agö dalu nowi, lafadöni [ba nemali] ba lalau ba Ndrawa Wilisiti, ba tobali femöna sebua, itolo Yehowa. 15 Ba samuza maökhö, ba datölu zi möi mitou khö Dawido, ba hati kara andrö, ba hati Adula, datölu salaŵa andrö, ba zi 30, me no ba zalo'o, ba Refa'i, labe'e golombaseŵara Dawa Wilisiti. 16 Ba hati andrö so Dawido, me luo da'ö, ba ba Mbetilekhema so Ndrawa Wilisiti sato. 17 Ba omasi Dawido [nidanö], ba imane: Ha niha zana'u gögu idanö, ba mba'a andrö, ba zinga mbawa göli Mbetilekhema? 18 Ba latörö golombaseŵa Ndrawa Wilisiti si datölu latimba ira, ba lata'u nidanö ba mba'a andrö, ba zinga mbawa göli Mbetilekhema, ba la'ohe khö Dawido. Ba lö edöna ibadu Dawido, iduwagö [sumange] khö Yehowa, imane: 19 Yamutenaŵa ndra'o Lowalangigu, fa böi ulau zi manö! Hadia, ubadu ndro zabölö andre, si no mangositengagö nosora, me möi ira? Lö'ö sa ba dödöra nosora, wolohe ya'ia ba da'e! — ba lö'ö manö ibadu. Da'ö nilau zabölö andrö, si datölu. 20 Ba Abiza'i, akhi Yoabi, ba no högö ba zi tölu ngafulu andrö. Ilau dohonia, ba 300 zi mate, ba no sebua turia ia, ba zi 30 andrö. 21 Ba zi 30, ba no sebua töi ia, ba ya'ia zolohe ya'ira, ba ba zi da tölu andrö, ba lö falaŵalaŵa ia. 22 Ba Benaya, ono Yehoyada, niha sabölö, sebua ilau, banua Gabase'eli. Ya'ia zamunu ono Garieli, Iraono Moabi, si darua. Ba samuza ma'ökhö, me so deu si baku, ba ibunu zingo, si tou ba mba'a. 23 Ba ibunu göi Ndrawa Miserayi, niha sebua sibai, lima hela. Sara doho ba danga Ndrawa Miserayi andrö, sezai mawö; ba ha si'o i'ohe khönia Benaya; ba ira'u doho andrö, ba danga Ndrawa Miserayi andrö, ba tohonia andrö ibe'e famununia. 24 Da'ö nilau Mbenaya, ono Yehoyada, ba sebua turia ia ba zi 30 sabölö andrö. 25 Ba zi tölu ngafulu, ba no sebua töi ia, ba ba zi datölu, ba lö falaŵalaŵa ia. Ba ibe'e högö wazuri ia Dawido, högö wazuri si lö aefa-aefa khönia. 26 Ba sabölö andrö, ba Azaheli, akhi Yoabi, ba Elihana, ono Dodo, banua Mbetilekhema, 27 ba Samoti, banua Haroro, ba Helesi, banua Walono, 28 ba Ira, ono Ike, banua Dekoa, ba Abiezeri, banua Ganatoti, ba Sibekhai, 29 banua Husa, ba Ilai, 30 banua Gahoho, ba Maharai, banua Netofa, ba Heledi, ono Mba'ana, 31 banua Netofa, ba Ita'i, ono Ribai, banua Gibea, ba mado Mbeniyami, ba Benaya, banua Wireato, ba Hurai, 32 banua Nahale-Gasi ba Abieli, banua Garaba, ba Asimaweti, 33 banua Mbakuri, ba Eliaba, banua Za'alabo, ba Hasemi, 34 banua Gizono, ba Yonata, ono Zage, 35 banua Harara, ba Ahiamo, ono Zakhara, banua Harara, ba Elifali, ono Guri, 36 ba Heferi, banua Mekhera, ba Ahia, 37 banua Walono, ba Hesero, banua Garemeli, ba Na'arai, ono Esibai. 38 Ba Yoeli, talifusö Natano, ba Mibihara, ono Hegeri, 39 ba Seleki, Iraono Gamoni, ba Naharai, banua Mbe'eroti, solohe fangöna khö Yoabi ono Zeruya, 40 ba Ira, banua Yatiri, ba Garebi, banua Yatiri. 41 Ba Uria, Iraono Kheti, ba Sabada, ono Gahelai, 42 ba Adina, ono Zisa, mado Rubeno, salaŵa ba mado Rubeno, ba tölu ngafulu nawönia, 43 ba Hanano, ono Ma'akha, ba Yozafati, 44 banua Metene, ba Usia, banua Gasehera, ba Sama ba Yeieli, ono Hotama, banua Garuri, 45 ba Yediaeli, ono Zimeri, ba talifusönia Yoha, 46 banua Disi, ba Elieli, banua Mahana'i, ba Yeribai ba Yosawia, ono Gelina'ama, ba Yitema, Iraono Moabi, 47 ba Elieli ba Obedi ba Ya'asieli, banua Mesobaya.

Famotokhi ba gahe

Fabaliŵa lala

Olayama Nga'ötö I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö