Wikimedia Incubator

Wb/nia/Razo II/25

< Wb | nia | Razo II
Wb > nia > Razo II > 25

Atu'a ba Yeruzalema Ndrawa Galedaia ba ladudugö, fabaya osali. La'oloi'ö ba Mbabeli mado Yuda

edit

I. 1 Ba me no arakha mewulu fakhe razo Zedekia,[1] ba zi mewulu ba mbaŵa si fulu, ba so Nebukanesa, razo Mbabeli, awö zabölö khönia fefu, ba wanuwö Yeruzalema; ba lafa'u'u mbanua, lako'o fari, fasui. 2 Ba tobali lazuwözuŵö mbanua, irege no alua mewulu fakhe razo Zedekia. 3 Ba ba zi meziŵa ba mbaŵa si öfa, ba tobali abölö-bölö sibai lofo ba mbanua, lö'ö sa'ae hadia ia, ö zato, 4 ba awena atu'a ba mbanua zanuwö; ba razo ba sabölö fefu, ba moloi, ba zi bongi, latörö mbawa göli ba gotalua göli kara andrö, ba zinga kabu razo, me samasui banua na Ndrawa Galedaia, ba latörö lala ba Garaba. 5 Ba lagohi razo sabölö Ndrawa Galedaia, ba lakhamö ia ba ndraso ba ngai Yerikho, me no fabali khönia nawönia fefu, me no muzaewe. 6 Ba lara'u razo ba la'ohe khö razo Mbabeli ba Ribila; ba da'ö zangetu'ö hukunia. 7 Iraono Zedekia, ba labunu ba zanehe ia, ba laku hörönia, ba larate ia, ba aefa da'ö, ba la'ohe ba Mbabeli. 8 Ba ba zi mewitu ba mbaŵa si lima — me no alua meweleŵalu fakhe razo Nebukanesa andrö, razo Mbabeli, — ba so Nebusa-Adana, kumandra wazuri, enoni razo Mbabeli, 9 möi ba Yeruzalema, ba itunu gosali Yehowa, fabaya gödo razo ba omo bö'ö ba Yeruzalema, fefu; omo zalaŵa fefu, ba itunu. 10 Ba öli kara, si fasui Yeruzalema, ba sabölö Ndrawa Galedaia fefu zanudugö, awö kumandra wazuri andrö. 11 Ba si tosai niha sato, si lö ahori yomo ba mbanua, ba soloi mege moroi yomo, sanaŵa razo Mbabeli, si tosai sato, ba i'ohe ba Mbabeli Nebusa-Adana andrö, kumandra wazuri. 12 Ba niha si numana, ba danö, ba iröi furi ösa kumandra wazuri andrö, iröi sokabu nagu ba sangahalö. 13 Ba taru nahe andrö töla, ba gosali Yehowa, ba he dayadaya mbalanga andrö, ba he gala sebua andrö töla, ba gosali Yehowa, ba larasa Dawa Galedaia, ba lahalö dölania andrö, la'ohe ba Mbabeli.[2] 14 Ba bowoa andrö, ba sundrusundru ba figa, fabaya nahia töla andrö, fefu, soguna ba wame'e sumange, ba lahalö. 15 Awö gali andrö ba figa ba wanefe, fefu hadia ia gama-gama ana'a, awö gama-gama firö, ba ihalö kumandra wazuri. 16 Taru nahe andrö, dua rozi, ba gala sebua andrö zambua, ba dayadaya no mege, nifazökhi Zelomo ba gosali Yehowa; — si tebai latulo döla gama-gama andrö fefu.[3] 17 Feleŵalu hela wa'alaŵa daru nahe andrö, ba mohögö yaŵa, högö töla; ba fa'alaŵa högö andrö, ba 5 hela, ba no mufasui ni'otaraŵa ba ni'obua dalimo högö andrö, oi töla manö; ba si manö göi ba daru nahe si sara, ba ni'otaraŵa andrö. 18 Ba kumandra wazuri andrö, ba ihalö Zeraya ere sebua, awö gere fanete da'ö, Sefania, ba sanaro ba mbawandruhö andrö, si datölu. 19 Ba ba mbanua, ba samösa ihalö mandru yomo khö razo, kumandra zabölö, ba dalima zi lö aefa-aefa khö razo mege, nisöndra yomo ba mbanua, awö durutuli gumandra sebua, sangofaya niha ba danö ba wasuwöta, ba 60 niha ba danö, si falukha ia yomo ba mbanua. 20 Da'ö ihalö Nebusa-Adana, kumandra wazuri, ba i'ohe khö razo Mbabeli ba Ribila. 21 Ba ifabunu'ö ira razo Mbabeli ba Ribila, ba danö Hamata. Ba tobali aheta ba danöra mado Yuda, ni'oloi'ö.[4]

Gedalia, kumandru ba danö, nibunu Zima'eli

edit

II. 22 Ba ifataro kumandru zi tosai ba danö mado Yuda Nebukanesa, razo Mbabeli, Gedalia andrö, ono Gahika, ono Zafano, kumandru nisaigönia ba danö.[5] 23 Ba me larongo ira kumandra fefu ba sabölö, no ifataro Gedalia andrö razo Mbabeli, ba la'ondrasi Gedalia ba Misefa, ira Sima'eli, ono Netania, Yohanano, ono Garea ba Seraya, ono Danumeti, banua Netofa ba Ya'asania, ono mbanua Ma'akha andrö, ba awöra fao. 24 Ba möi ba hölu khöra ba ba nawöra andrö Gedalia; imane khöra: Böi mi'ata'ufi Ndrawa Galedaia; böi mibulö'ö ami ba danö, mi'iagö barö mbawa razo Mbabeli, ba sohahau tödö ami! 25 Ba me baŵa si fitu, ba ifuli so zima'eli, ono Netania ono Gelisama, nga'ötö razo, ba dafulu nawönia fao; ba labunu Gedalia, fabaya mado Yuda ba Dawa Galedaia andro, awönia ba Misefa. 26 Ba maoso zato fefu, he iraono, ba he satua, awö gumandra andrö, ba lasaŵa danö Miserayi, börö wa'ata'ura Ndrawa Galedaia.

Tebali'ö salaŵa zui Yoyakhi, ba Mbabeli

edit

III. 27 Ba me no arakha 37 fakhe,[6] i'otarai me la'oloi'ö Yoyakhi andrö, razo mado Yuda, ba zi 27 ba mbaŵa si felendrua, ba ihakhösi tödö Yoyakhi, razo mado Yuda, Ewili-Merodakhi, razo Mbabeli, ba ndröfi andrö, metobali razo ia; i'efa'ö ba gurunga[7] 28 ba ihaogö wehede khönia, ba yaŵa dadaoma zalaŵa bö'ö, si so khönia ba da'ö ba Mbabeli, ibe'e dadaomania. 29 Ba iheta nukhania ba gurunga Yoyakhi, ba khö razo manga-manga ia, götö wa'anau nosonia na. 30 Ba razo zanaha balazonia — fadoro manö — ha wa'ebua zoguna khönia ma'ökhö, irugi mate ia.

Famotokhi ba gahe

edit
  1. ↑ Ayati 1–21: Yer 52:4–27; 39:1–10; Nga'ötII 36:17–20
  2. ↑ Yer 27:19–22
  3. ↑ RazI 7:15,23,27
  4. ↑ Faigi 23:33
  5. ↑ Ayati 22–26: Yer 40:5,7–9; 41:1–7; 43:5–7
  6. ↑ Ayati 27–30: Yer 52:31–34
  7. ↑ Faigi 24:15

Fabaliŵa lala

edit

Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Razo_II/25&oldid=6221764"