Mame'e adu Gahasi edit
I. 1 Me no alua meweleönö fakhe razo Weka, ono Remalia, tobali razo mado Yuda Gahasi andrö, ono Yotamo.[1][2] 2 Dua wulu fakhe Gahasi, me tobali razo ia, ba meweleönö fakhe wa'ara razo ia ba Yeruzalema. Ba tenga somasi Lowalanginia Yehowa ilau, tenga si mane tuania Dawido; 3 lala razo Ndraono Gizeraeli andrö itörö. Ifatörö ba galitö nononia wangohia'ö sogoro ita andrö ba niha baero andrö, nitimba Yehowa föna Ndraono Gizeraeli.[3] 4 Ba mame'e sumange ia ba manunu kumöyö ba hili-hili andrö, idozigö hili-hili ba börö geu sauri.
I'andrö wanolo khö razo Asiria, me lasuwö ia ira Resino Feka edit
II. 5 Ba me luo da'ö, ba so moroi yöu Resino, razo Ndrawa Garamo, awö Weka, ono Remalia, razo Ndraono Gizeraeli, ba wanuwö Yeruzalema. Lala'u'u Gahasi, ba tebai sa atö atu'a ira.[4] 6 Ba me luo da'ö, ba itolo Ndraono Gedomo Resino, razo Ndrawa Garamo, ba wamadöni mangawuli Elata, itimba mado Yuda, si so ba da'ö. Ba möi ba Gelata Ndraono Gedomo, la'iagö da'ö, irugi ma'ökhö andre.[5] 7 Ba ifatenge zinenge Ahasi khö Digelata-Filezeri, razo Asiria, imane khönia: Sawuyumö ndra'o, ba onou göi! Ae khögu, ba efa'ö ndra'o ba danga razo Ndrawa Garamo ba ba danga Ndraono Gizeraeli, sanuwö ya'odo![6] 8 Ba ihalö göi wirö andrö ba ana'a ba gosali Yehowa ba ba mbate'e girö-girö, ba gödo razo, ba ifa'ohe'ö buala khö razo Asiria.[7] 9 Ba ifondrondrongo khönia razo Asiria, möi ia ba Ndramaseko, ba atu'a ia ba mbanua, ba ira'u nono mbanua, i'ohe ba Kiri; ba Resino, ba ifabunu'ö.
Iwu'ai wame'e sumange ba gosali. Fa'amate Gahasi edit
III. 10 Ba möi ba Ndramaseko razo, Ahasi, möi falukha khö Digelata-Filezeri, razo Asiria, ba i'ila naha wame'e sumange andrö, ba Ndramaseko. Ba ifa'ohe'ö gambara naha wame'e sumange andrö ba tuladania, si faudu sibai, khö Guria ere. 11 Ba ifa'anö naha wame'e sumange andrö ere andrö, i'ohia'ö sibai dulada, nifa'ohe'ö razo, Ahasi, moroi ba Ndramaseko; dali da'ö khö Guria ere, me lö sangawuli na razo, Ahasi, moroi ba Ndramaseko. 12 Ba me mangawuli razo, me i'ila naha wame'e sumange andrö, ba möi ia yaŵa, 13 ba itunu zumange nitunu andrö khönia, awö zumange ni'a, ifaduwa zumange nibadu, ba itefe naha wame'e sumange do zumange fangorifi khönia. 14 Ba naha wame'e sumange töla andrö, si so ba da'ö föna Yehowa, ba iheta föna gosali, ba gotaluara naha wame'e sumange si bohou andrö gosali Yehowa ibe'e, yöu naha wame'e sumange andrö [khönia]. 15 Ba ibe'e li razo, Ahasi, khö Guria ere, imane: Ba naha wame'e sumange, naha sebua andrö, ötunu zumange nitunu na mahemolu mbanua, awö zumange ni'a na owi ba sumange nitunu nibe'e razo, awö zumange ni'a andrö khönia, ba sumange nitunu nibe'e zato, fabaya sumange ni'a ba sumange nibadu khöra; ba tefe ia do zumange nitunu ba do zumange nitaba, fefu. Ba ba naha wame'e sumange töla andrö, ba da'u'era-era tödögu. 16 Ba i'o'ö sibai Uria ere niŵa'ö razo khönia. 17 Ba ifabo'a'ö göi lesi andrö ba dayadaya [mbalanga] no, ba ifaheta'ö yaŵa mbalanga; ba gala sebua andrö, ba ifaheta'ö ba dayadayania saŵi töla andrö, ba mbale labe'e.[8] 18 Ba he lala ba zabato andrö, nisagöi, nifazökhira ba gosali, lala razo moroi baero, ba iwu'ai ba gosali Yehowa, börö razo Asiria. 19 Ba hadia na ena'ö nidunö-dunö ba khö Gahasi andrö, hadia nilaunia, ba noa sa mutanö ba zura hikaya razo mado Yuda. 20 Ba mate Gahasi, itörö lala ndra amania, ba ba ngai ndra amania lako'o ia. Ba fangalinia razo, ba ononia Hisikia.[9]
Famotokhi ba gahe edit
Fabaliŵa lala edit
Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö