Wb/nia/Razo II/19

Irara dödö Hisikia Yesaya sama'ele'ö

I. 1 Ba me irongo da'ö no mege Hisikia, ba isika nukhania ba i'obaru mbaru bu, ba möi ia ba gosali Yehowa. 2 Ba Eliaki, ono Hilikia, mandru ba gödo, ba Sebena, durutuli ba satua gere, ba ifatenge khö Yesaya, ono Gamosi, baru bu göi mbarura. 3 Ba lamane khö Yesaya: Da'ö niŵa'ö Hisikia: Baŵa wa'atosasa ma'ökhö, baŵa wotu, ba baŵa wanibo; hatö sa fa'aböla nono, ba no ambö fa'abölö, ba wadono. 4 Ma atö irongo Lowalangimö, Yehowa, wehede Rabisake andrö fefu, fehede Rabisake nifatenge zokhö ya'ia, razo Asiria, ba wango'aya Lowalangi sauri. Ba yamu'otu'ö sa'ae ira Lowalangimö, Yehowa, ba wehede andrö, nirongonia. Ba ya'ugö, ba angandrö, salahi zi tosai andrö, si lö ahori na. 5 Ba me larugi Yesaya sinenge razo Hisikia, 6 ba imane khöra Yesaya: Mimane khö zokhö ya'ami: Da'ö niŵa'ö Yehowa: Böi ata'ufi wehede andrö, nirongou, fango'aya genoni razo Asiria ya'odo. 7 Hiza, ube'e khönia geheha, ena'ö irongo dania duria, ba ena'ö ifuli ia ba danönia, ba ba danönia dania ube'e nibunu si'öli ia.

Sura fameta'u, nifaohe'ö Zaneribi Fangandrö Hisikia

II. 8 Ba ifuli ia Rabisake, ba no sanuwö Libena razo Asiria, fönanania; noa sa irongo, wa no iheta ia ba Lakhisi. 9 Ba me irongo Saneribi duria Dirihaka, razo Gaitiofia, me lamane khönia: "So ia moroi sa, möi fasuwö khöu," ba ifuli ifatenge zinenge khö Hisikia, imane: 10 Mimane khö Hisikia, razo mado Yuda: Böi be'e nifowöhö ndra'ugö, nifowöhö Lowalangimö andrö, nidöna-dönamö fangorifi, wanguma'ö tödöu: Lö'ö sa tebe'e ba danga razo Asiria Yeruzalema! 11 Hiza, no örongo, he lawisa razo Asiria ba danö zotanö misa fefu, me no lafakiko, ba hadia, ba saefa ndra'ugö? 12 He wisa Lowalangi soi niha andrö, nihori ndra amagu tuagu, hadia, no la'orifi? — Gozana andrö ba Harana ba Resefi ba he mado Gedena andrö, ba Delasara. 13 Heza so razo Hamata ba razo Garafada; ba heza so razo mbanua Zefarawa'i, ba razo Hena ba razo Giwa? 14 Ba me no itema Hisikia zura andrö, ba danga zinenge, ba me no ibaso, ba möi ia miyaŵa ba gosali Yehowa ba ibologö zura andrö föna Yehowa. 15 Ba mangandrö Hisikia föna Yehowa, imane: "He Yehowa, Lowalangi Ndraono Gizeraeli, sidadao yaŵa Kerubi; ha ya'ugö Lowalangi ba gamatöröŵa niha ba guli danö, fefu; ya'ugö zamazökhi banua si yaŵa, awö danö. 16 Be'e mbörö dalingau, ya'ugö Yehowa, ba fondrondrongo; fehaga'ö, ya'ugö Yehowa, ba faigi! Fondrondrongo niŵa'ö Zaneribi andrö, nifa'ema zinengenia, ba wanandraŵaisi Lowalangi sauri. 17 Si ndruhu, ya'ugö Yehowa, noa sa lafufu niha baero, fabaya tanöra, razo Asiria andrö, 18 ba no latunu Lowalangira [adu]. Me no tenga si ndruhu Lowalangi da'ö, ha nifazökhi danga niha, eu ba kara, ba andrö la'ila lafufu. 19 Ba iya'e, ya'ugö Yehowa, Lowalangima, efa'ö ndra'aga ba dangania, ena'ö dozi banua niha ba guli danö aboto ba dödö, wa no ha ya'ugö Lowalangi, ya'ugö Yehowa!"

Itema linia Lowalangi, nifa'ema Yesaya

III. 20 Ba ifatenge khö Hisikia Yesaya, ono Gamosi, imane: Da'ö niŵa'ö Yehowa, Lowalangi Ndraono Gizeraeli: Hadia ni'andröu khögu, ba khö Zaneribi andrö, razo Asiria, ba no urongo. 21 Da'ö daroma li, niŵa'ö Yehowa, ba khönia andrö: "Ono alawe andrö, Siona, ba si lö ba dödönia ndra'ugö, i'o'aya'ö, ifalikhö ia moroi furiu ono alawe andrö, Yeruzalema. 22 Ha niha ni'o'ayamö, ha niha nitandraŵaisiu, ba ha niha nihede-hede'ömö, ba ha khö fayaŵa höröu? No khö ni'amoni'ö Ndraono Gizeraeli andrö. 23 No ötandraŵaisi Zo'aya, nifa'ema zinengemö andrö, no ömane: No möido yaŵa ba zuzu hili, balazi wa'oya gureta khögu, ba wondrege hili Libano urugi; no u'obö zebua geresi ba khönia, awö zenobari nitutuyu, ose ba wondregenia no urugi, ba dalu kabu khönia. 24 No ukharu mba'a ba no ubadu nidanö bö'ö, ba no u'ogo'öisi nungo nidanö ba danö Miserayi fefu lalu'a kahegu! 25 Hadia, lö nirongou? I'otarai föna sa'ae no u'asiwai, i'otarai götö föna sibai no uföfögö. Ba awena iada'e u'asogö, ena'ö ödudugö mbanua saro, ena'ö öbali'ö adudula, kara! 26 Ba ösi mbanua, ba si tobali tödö, ba wa'atebaira, ba aila, tobali hulö mbulu ndru'u ba danö, ba hulö mbulu gulegule, si mane du'u ba gero zagö, si mane sa'usö, na lö'ö na molai. 27 Femaosomö ba fedadaomö, ba oroma khögu, fofanömö ba fa'asomö, ba u'ila, ba he na fabötu ndra'ugö khögu! 28 Ba me no si fabötu khögu ndra'ugö, ba me no irugi dögi dalingagu fayaŵasamö, ba ufesu nikhumö ba ube'e ba mbawau zi'öli, ba u'ohe mangawuli ndra'ugö, ufatörö'ö ba lalamö mege, me awena so'ö!" 29 Ba da'ö dania dandra khöu: Ba ndröfi da'e, ba bua zauri manö [lö mutaru] gömi, ba ba ndröfia dania, ba nalöŵa, ba ba ndröfi aefa da'ö, ba manaru ami ba mamasi, ba mifazökhi kabu nagu ba mi'a mbua. 30 Ba ha niha zoloi mege, mado Yuda, si tosai, ba ifuli moŵa'a ba danö ba mowua hogu. 31 Ba Yeruzalema sa la'otarai si tosai ba ba hili Ziona la'otarai soloi mege; fa'aukhu dödö Yehowa ngahönö zolau da'ö! 32 Andrö wa imane Yehowa, ba khö razo Asiria andrö: Lö atu'a ia ba mbanua, ba tebai ibe'e göna yomo nono wana khönia, ba lö tola i'ohe mbaluse, ba wanuwö ya'ami, ba he fogo'o fari khömi. 33 Lalania mege, me awena so ia, itörö ba wangawuli, ba lö tola atu'a ia ba mbanua da'e, iŵa'ö Yehowa. 34 Ufoba'a-ba'a mbanua andre, ba wangefa'ö ya'ia, börö ndra'o ba börö na ge nonigu Dawido.

Ibunu Ndrawa Asiria mala'ika Yehowa. Labunu Zaneribi Iraononia

IV. 35 Ba ba zi bongi andrö, ba so mala'ika Yehowa, ba 185.000 ibunu niha ba golombaseŵa Ndrawa Asiria. Ba me maoso nawöra, si hulö wongi, ba hiza, ba boto zi mate manö tou da'ö fefu. 36 Ba maoso Zaneribi, mofanö ia, ifuli ia ba Niniwe ba ba da'ö i'iagö sa'ae. 37 Ba samuza ma'ökhö, me mangandrö ia ba gosali Lowalanginia Nisirokho, ba labunu ia iraononia Aderamelekhi ba Sareseri. Ba moloi ira, lasaŵa danö Ararafa, ba fangalinia razo, ba ononia Asarahado.

Famotokhi ba gahe

Fabaliŵa lala

Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö