Yoahasi ba Yoasi, razo Ndraono Gizeraeli edit
I. 1 Me no alua 22 fakhe razo mado Yuda Yoasi andrö, ono Gahaseyahu, tobali razo Ndraono Gizeraeli Yoahasi, ono Yehu, ba Zamaria, mewelewitu fakhe.[1] 2 Ba si fatuwu khö Yehowa ilau; i'ohia'ö horö Yerobeamo, ono Nebati, famaelungunia Iraono Gizeraeli mege; lö iböhöli da'ö.[2] 3 Ba mofönu Yehowa ba Ndraono Gizeraeli, ba ibe'e ira ba danga Hazaeli andrö, razo Ndrawa Garamo, ba ba danga Mbenihada, ono Hazaeli, sagötö fa'ara.[3] 4 Ba i'andrö wa'ebolo dödö Yehowa Yoahasi, ba ifondrondrongo khönia Yehowa, börö me i'ila wa'atosasa Ndraono Gizeraeli, me isasagö ira razo Ndrawa Garamo. 5 Ba i'asogö zangorifi Iraono Gizeraeli Yehowa, ba tobali aefa ira barö mbawa Ndrawa Garamo, ba lö'ö sa'ae hadia ia ba Ndraono Gizeraeli, ba nosera; ifuli si mane föna.[4] 6 Ba lö'ö sa laböhöli horö zi samba omo ndra Yerobeamo andrö, fama'elungunia Iraono Gizeraeli; lala da'ö latörö. Ba lö'ö göi tebulö Gasera andrö ba Zamaria.[5] 7 Lö'ö sa isaigö khö Yoahasi zabölö Yehowa, ha 50 zi fakudo ba fulu gureta ba 10.000 si lö kudo. Noa sa ihori razo Ndrawa Geramo, no ifufu. 8 Ba hadia na nidunö-dunö ena'ö ba khö Yoahasi andrö, ba hadia ia fefu nilaunia, ba fa'abölönia andrö, ba noa sa mutanö ba zura hikaya razo Ndraono Gizeraeli. 9 Ba mate Yoahasi, itörö lala ndra amania, ba ba Zamaria lako'o ia. Ba fangalinia razo, ba ononia Yoasi. 10 Me no alua 36 fakhe razo mado Yuda Yoasi andrö, tobali razo Ndraono Gizeraeli ba Zamaria Yoasi, ono Yoahasi, meweleönö fakhe. 11 Ba si fatuwu khö Yehowa ilau; lö iböhöli horö Yerobeamo, ono Nebati, famaelungunia Iraono Gizeraeli; lala da'ö itörö. 12 Ba hadia na nidunö-dunö ena'ö, ba khö Yoasi andrö, ba hadia ia fefu nilaunia ba fa'obölönia andrö, ba fasuwötania khö Gamasia andrö, razo mado Yuda, ba no mutanö ba zura hikaya razo Ndraono Gizeraeli.[6] 13 Ba mate Yoasi, itörö lala ndra amania, ba Yerobeamo zidadao ba dadaoma razo. Ba ba Zamaria teko'o Yoasi, ba ngai razo Ndraono Gizeraeli andrö.[7]
Ifa'ele'ö wemöna khö Yoasi Elisa edit
II. 14 Ba mafökhö Gelisa, fökhö ba wa'amate. Ba so Yoasi andrö, razo Ndraono Gizeraeli, möi mitou khönia ba mege-ege ba ngainia, imane: He amagu! he amagu! kureta Ndraono Gizeraeli, awö zi fakudo![8] 15 Ba imane khönia Elisa: Da wana, awö nono! Ba ibe'e khönia wana, awö nono. 16 Ba imane khö razo Ndraono Gizeraeli andrö: Tufa tangau wana andre! Ba me no itufa, ba ifalaete dangania ba danga razo Elisa. 17 Ba imane: Bokai zandrela tanö ba gatumbukha luo! Ba me no ibokai, ba imane Elisa: Efasi wana! Ba i'efasi. Ba imane Elisa: Ono wana ba wemöna, khö Yehowa! Ono wana ba wolaŵa Dawa Garamo! Ba Gafeki dania ölau ba Ndrawa Garamo, irege ahori ira. 18 Ba imane na: Halö nono wana andrö! Ba ihalö. Ba imane khö razo Ndraono Gizeraeli: Amözi'ö tanö! Ba medölu ibözi danö, awena ibato. 19 Ba mofönu khönia genoni Lowalangi andrö, imane: Melima ena'ö öbözi, ba ma meönö, ba ölaŵa Ndrawa Garamo, irege ahori ira; ba me si manö, ba ha medölu ö'alani ira.
Fa'amate Gelisa, Auri zi mate, me no fabaya ba mboto Gelisa mbotonia. Itimba Ndrawa Garamo Yoasi edit
III. 20 Ba mate Gelisa ba lako'o ia, me luo da'ö, ba möi-möi ba danö zanuwö, Iraono Moabi. 21 Ba so zi mate niko'o sibai ena'ö, ba hiza moroi sa zanuwö, si lö mudöna-döna. Ba latibo'ö manö ba lewatö Gelisa zi mate andrö ba lalau moloi. Ba me fabaya ba mboto Gelisa mboto zi mate andrö, ba ifuli auri, muzizio. 22 Ba no ifakao Ndraono Gizeraeli Hazaeli andrö, razo Ndrawa Garamo, götö wa'anau noso Yoahasi. 23 Ba ifuli ebua dödö Yehowa khöra, ihakhösi tödö ira; ifuli i'otahögö ira, börö wawu'usa li andrö khönia khö ndra Aberahamo, Iza'aki, Yokobo, ba lö omasi ia tekiko ira, ba irugi da'ö, ba lö nitibo'önia ya'ira, fa lö'ö sa'ae ifaigi ira.[9] 24 Ba mate Hazaeli, razo Ndrawa Garamo, ba ononia Benihada zi tobali razo, fangalinia. 25 Ba maoso Yoasi, ono Yoahasi, ifadöni mbanua andrö khö Mbenihada, ono Hazaeli, banua nifadöni Hazaeli khö nama Yoasi, Yoahasi, me isuwö ia no. Medölu te'ala Mbenihada ibo'e Yoasi, ba ihalö mangawuli mbanua Ndraono Gizeraeli andrö.[10]
Famotokhi ba gahe edit
Fabaliŵa lala edit
Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö