Fa'afaito Gatalia andrö. Lafataro razo Yoasi andrö
editI. 1 Ba me irongo Atalia andrö, ina Gahaseyahu, no mate nononia, ba maoso ia, mangohori nga'ötö razo.[1][2] 2 Ba maoso Yoseba, ono razo Yehoramo alawe, talifusö Gahaseyahu, ihalö Yoasi andrö, ono Gahaseyahu, iheta ba ngai nono razo bunusö andrö, ibini'ö, i'ohe si bakha, awö babunia. Ibini'ö khö Gatalia, fa böi labunu ia. 3 Ba si tobini Yoasi, awö Yoseba, ba gosali Yehowa, meönö fakhe wa'ara, götö wa'arazo Gatalia ba danö. 4 Ba me no alua zi meöno fakhe, ba ifatenge Yoyada, ifahalö'ö gumandra zi otu andrö, fazuri ba awö razo, khönia ba gosali Yehowa. Ba ilau fawu'u li khöra, ibe'e ba hölu ira, ba gosali Yehowa. Ba awena i'oroma'ö khöra nono razo andrö. 5 Ba ibe'e li khöra, imane: Da'ö halöŵömi: Si saraö ya'ami, nifataro sanaro na luo sabato, ba sanaro ba gödo razo; 6 ba si saraö, ba ba mbawa göli Suri manaro, ba si saraö zui, ba ba mbawa göli furi nawö razo andrö, ena'ö sanaro ba gödo ami; 7 ba duata ya'ami, dozi ami nifataro sanaro na luo sabato, ba sanaro ba gosali Yehowa, awö razo. 8 Mifasui razo, fangöna ba danga zamösana, ba sanaŵa ya'ami, ba nibunu. Mi'iagö awö razo, na möi ia tou ba na möi yomo. 9 Ba la'o'ö da'ö ira kumandra zi otu, dali niŵa'ö Yoyada ere khöra; la'ohe wazuri andrö khöra, he saheta sanaro na luo sabato, ba he sawena möi sanaro, möi ira khö Yoyada ere. 10 Ba ere andrö, ba ibe'e ba danga ndra kumandra zi otu andrö doho ba baluse andrö, khö razo Dawido mege, si so ba gosali Yehowa.[3] 11 Ba la'agö golayama gosali Yehowa awö razo andrö, i'otarai tanö raya, numalö miyöu, irugi naha wame'e sumange ba mangawuli ba gosali, lafasui razo, oi dozi fangöna ba danga. 12 Ba i'ohe baero nono razo andrö Yoyada, lafanaembu ia, ba labe'e khönia wamaduhu'ö andrö [sura goroisa], lafataro razo ia ba labayoini, ba lalau datawö ba mu'ao ira, lamane: Ya ahowu razo![4]
Fa'amate Gatalia. Fangohori Ba'ali ba hadia zi faböbö khönia
editII. 13 Ba me irongo Atalia we'ao nawö razo andrö, fazuri, ba fe'ao niha sato, ba isaŵa niha sato, ba gosali. 14 Ba ifaigi, ba hiza, ba no muziozio ba ngai daru nahe razo — si manö huku ba razo — ba kumandra andrö ba solau-lau torofe, awö razo, ba he niha sato ba danö, ba no somuso tödö ba lalau dorofe. Ba itika nukhania Atalia ba imane: 15 Folaŵa! Folaŵa! Ba ibe'e li Yoyada ba gumandra zi otu, kumandra zabölö, imane khöra: Mi'ohe baero ia, mifatörö ba gotalua wazuri ba ha niha zolo'ö ya'ia, ba mibunu si'öli! Noa sa iŵa'ö ere, böi ba gosali Yehowa labunu ia. 16 Ba lara'u ia, ba ba lala kudo lafatörö, wolohe ba gödo razo ba ba da'ö labunu.[5] 17 Ba ifawu'u li ira Yehowa razo, awö niha sato, Yoyada, ena'ö banua Yehowa ira, ba ifawu'u li göi ira razo niha sato. 18 Aefa da'ö, ba lasaŵa gosali Mba'ali niha sato ba danö ba ladudugö. Naha wame'e sumange khönia ba famaedonia, ba lafaulugö worasa; ba Matana andrö, ere khö Mba'ali, ba labunu föna naha wame'e sumange. Aefa da'ö, ba ifataro zanaro ba gosali Yehowa ere andrö.[6] 19 Ba ifa'aso ndra kumandra zi otu ba fazuri ba awö razo andrö ba he niha sato ba danö, ba la'ohe mitou razo, laheta ba gosali Yehowa, ba mbawandruhö nawö razo andrö lafatörö, wolohe ya'ia ba gödo razo; ba mudadao ia ba dadaoma razo. 20 Ba oi somuso tödö niha ba danö; ba lö hadia zaekhu niha yomo ba mbanua. Ba Atalia, ba labunu si'öli, ba gödo razo. 21 Ha mewitu fakhe wa'ebua Yoasi, me tobali razo ia.
Famotokhi ba gahe
editFabaliŵa lala
editOlayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö