Wb/nia/Razo II/22

Ihaogö gosali Yehowa Yosia

I. 1 Ha meŵalu fakhe wa'ebua Yosia, me tobali razo ia, ba 31 fakhe razo ia ba Yeruzalema. Ba töi ninania ba Yedida, ono Gadaya, banua Mbosikata. 2 Ba somasi Yehowa ilau, itörö sibai lala duania Dawido, lö ihole'ö ia, he ba gambölö, ba he ba gabera. 3 Ba me no alua mewelewitu fakhe razo Yosia, me baŵa si ŵalu, ba ifatenge ba gosali Yehowa durutulinia Safano, ono Gasalia ono Mesula, imane khönia: 4 Ae miyaŵa khö gere sebua, Hilikia, ba irö'ö gefe andrö ni'ohe ba gosali Yehowa, ni'ozaragö zanaro ba mbawandruhö, ba niha sato, 5 ena'ö labe'e ba mandru duka andrö, nifataro ba gosali Yehowa, ba wame'e ba zohalöŵö andrö ba gosali Yehowa, ba wanga'azökhi si no adudu ba gosali. 6 Ba duka geu ba ba zama'anö ba ba duka gara, ba he ba wowöli eu, awö gara nitoto, ba wangehao osali; 7 ba böi fa'era khöra ba gana'a andrö, nibe'e ba dangara; noa sa si faduhu dödöda ira.

Lasöndra zura goroisa. Ifatenge zinenge Yosia, khö zama'ele'ö ira alawe andrö, Huleda

II. 8 Ba imane Hilikia, ere sebua, khö Zafano durutuli: No usöndra zura goroisa, ba gosali. Ba ibe'e ba danga Zafano zura andrö Hilikia, ba ibaso. 9 Aefa da'ö, ba möi khö razo Zafano durutuli, i'ombakha'ö khönia, imane: No lafohani gana'a andrö, si so ba gosali, enoniu ba no labe'e ba mandru duka andrö, nifataro ba gosali. 10 Ba imane na göi Safano durutuli khö razo: No ibe'e khögu zura Hilikia ere. Ba ibaso khö razo zura andrö. 11 Ba me irongo razo niŵa'ö ba zura goroisa andrö, ba isika nukhania. 12 Ba humede razo khö ndra Hilikia ere, Ahika, ono Zafano, Akhiboro, ono Mikhaya, Safano durutuli ba Asaya, fazuri razo, 13 imane: Mi'ae misofu khö Yehowa, hadia niŵa'önia khögu ba ba niha sato, ba mado Yuda fefu, ba zura andrö nisöndra; noa sa ebua wönu Yehowa, si no tesao khöda, me no lö ni'o'ö ndra tuada taroma li ba zura andrö, ba wolo'ö sibai ena'ö nitanö bakha. 14 Ba Hilikia ere ba Ahika ba Akhiboro ba Safano ba Asaya, ba möi khö Huleda andrö, sama'ele'ö ira alawe, fo'omo Zalumi andrö, sanaro nukha, ono Dikiwa ono Haraha: ba Yeruzalema so nomora, ba mbalö mbanua tanö tou; ba fahuhuo ira khönia.

I'ombakha'ö Huleda, ifatörö khöra huku dania Lowalangi, ba ihakhösi tödö Yosia

III. 15 Ba imane khöra: Da'ö niŵa'ö Yehowa, Lowalangi Ndraono Gizeraeli: Mimane ba niha andrö, samatenge ya'ami khögu: 16 Da'ö niŵa'ö Yehowa: Si ndruhu, famakiko ufatörö ba mbanua andre ba ba nösinia, fameta'u andrö fefu, si so ba zura andrö nibaso razo mado Yuda; 17 börö me no la'erogö ndra'odo, ba me no latunu gumöyö ba Lowalangi bö'ö, wangandrö fönugu, ba nifazökhi dangara andrö fefu, ba tesau sa mbakhu-bakhu dödögu ba mbanua andre, ba lö fangalö. 18 Ba khö razo mado Yuda andrö, samatenge ya'ami, ba wanofu khö Yehowa, ba mimane: Imane Yehowa, Lowalangi Ndraono Gizeraeli, ba niŵa'önia no mege, nirongou: 19 Me no ombuyu dödöu ba me no ö'ide-ide'ö ndra'ugö föna Yehowa, me örongo hadia niŵa'ögu, nifatörögu ba mbanua andre ba ba nösinia, wa ni'elifi dania ira ba börö wehokha mbu, ba me no ötika nukhamö ba me no me'e'ö fönagu, ba no ufondrondrongo göi, iŵa'ö Yehowa. 20 Ba u'orudugö sa'ae ndra'ugö khö ndra amau ba khö ndra tuau, ena'ö la'ohe ba lewatömö ndra'ugö, lö hadia ia, ba ena'ö lö i'ila höröu wamakiko andrö fefu, nifatörögu dania ba mbanua andre. Ba lafa'ema khö razo.

Famotokhi ba gahe

Fabaliŵa lala

Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö