Amasia, razo mado Yuda. I'alani Ndraono Gedomo
editI. 1 Me arakha mendrua fakhe razo Ndraono Gizeraeli Yoasi andrö, ono Yoahasi, tobali razo mado Yuda Gamasia, ono Yoasi.[1][2] 2 Dua wulu a lima fakhe ia, me tobali razo ia, ba 29 fakhe razo ia ba Yeruzalema. Ba töi ninania, ba Yoadina, banua Yeruzalema. 3 Ba somasi Yehowa ilau, ba tenga sa atö si mane tuania Dawido; fefu hadia ia khönia ba nifolau namania Yoasi mege.[3] 4 Ha hili-hili andrö zi lö labulö'ö; lö mamalö-malö wame'e zato sumange, awö wanunu kumöyö ba hili-hili andrö.[4] 5 Ba me no aro ba dangania wa'arazo, ba ifabunu'ö genoninia andrö, samunu razo amania, mege.[5] 6 Ba iraono zange'e andrö, ba lö'ö sa ifabunu'ö, dali goroisa Yehowa andrö, si so ba zura goroisa andrö khö Moze, no imane: Böi labunu nama, börö ndraono, ba böi labunu ndraono, börö nama; ha ba horönia labunu zamösana.[6] 7 Ya'ia zi alani Iraono Gedomo, ba ndraso zilua asi andrö, 10.000 nibunu; ba atu'a ia ba mbanua Zela; ba ibe'e töi mbanua andrö Yokete'eli, irugi ma'ökhö andre.
Fasuwö ira Yoasi, razo Ndraono Gizeraeli, ba Amasia zi te'ala
editII. 8 Ba me luo da'ö, ba ifatenge zinenge Amasia, khö Yoasi andrö, ono Yoahasi, ma'uwu Yehu, razo Ndraono Gizeraeli, imane khönia: Ae khögu, datalau fatandra fa'abölö! 9 Ba imane Yoasi, razo Ndraono Gizeraeli khö Gamasia, razo mado Yuda: Sa'a-sa'a mao ba hili Libano, ba no ifatenge khö geresi ba hili Libano, imane: Datalau fambambatö! Ba latörö za'a-sa'a mao andrö utu ndru'u ba hili Libano, lahundra-hundra.[7] 10 Me no falukha'ö zalöfö, wangalani Iraono Gedomo, ba no tesao wayaŵasamö. Hana na ebua duriamö, ba böi bulö'ögö khömi! Hadia wa ö'alu-alui wamunu, ena'ö mate ndra'ugö, fabaya mado Yuda? 11 Ba lö ifondrondrongo Amasia. Ba möi misi yaŵa Yoasi, razo Ndraono Gizeraeli, ba fatandra fa'abölö ira, darua ira Gamasia, razo mado Yuda, ba ngai Mbetiseme, ba danö mado Yuda. 12 Ba te'ala mado Yuda labe'e Iraono Gizeraeli, tobali isaŵa khöra zamösana, moloi. 13 Ba ira'u Gamasia, razo mado Yuda, ono Yoasi ono Gahaseyahu, Yoasi, razo Ndraono Gizeraeli, ba Mbetiseme ira'u, ba i'ohe ba Yeruzalema. Ba itöla'ö göli Yeruzalema, i'otarai mbawa göli Geferayi, irugi mbawa göli ba watalinga andrö, 400 hela wa'anau. 14 Ba ahori ihalö gana'a, awö wirö, awö gama-gama, ba gosali Yehowa ba ba mbate'e girö-girö andrö, ba gödo razo, awö niha ösa, we'e-we'e dödö, ba ifuli ia ba Zamaria.
Fa'amate Yoasi ba fa'amate Gamasia
editIII. 15 Ba hadia na ena'ö nidunö-dunö ba khö Yoasi andrö, hadia nilaunia ba fa'abölönia andrö, ba fasuwötania khö Gamasia, razo mado Yuda, ba noa sa mutanö ba zura hikaya razo Ndraono Gizeraeli. 16 Ba itörö lala ndra amania Yoasi, mate ia, ba ba Zamaria lako'o ia, ba ngai razo Ndraono Gizeraeli andrö. Ba fangalinia razo ba ononia Yerobeamo.[8] 17 Ba mewelelima fakhe tö na wa'anau noso Gamasia andrö, razo mado Yuda, me no mate Yoasi, ono Yoahasi, razo Ndraono Gizeraeli. 18 Ba hadia na ena'ö nidunö-dunö ba khö Gamasia andrö, ba noa sa mutanö ba zura hikaya razo mado Yuda. 19 Ba so zamagölö ba khönia, ba Yeruzalema, ba wamunu ya'ia. Ba moloi ia, isaŵa Lakhisi; ba lafatenge zolo'ö ya'ia ba Lakhisi, lafabunu'ö ia ba da'ö.[9] 20 Ba labe'e yaŵa ba gureta, ba ba Yeruzalema, ba mbanua Dawido andrö, lako'o ia, ba ngai ndra amania.[10] 21 Ba lahalö Gasaria andrö mado Yuda sato fefu, he ŵa'ae ha meweleönö fakhe na wa'ebuania, ba lafataro razo, fangali namania Amasia andrö.[11] 22 Da'ö zangaro Elata, ifuli ihalö banua mado Yuda, me no itörö lala ndra amania razo, me no mate.[12]
IV. Yebeamo, razo Ndraono Gizeraeli
editIV. 23 Me no alua meweleöfa fakhe razo mado Yuda Gamasia andrö, ono Yoasi, tobali razo ba Zamaria Yerobeamo andrö, ono Yoasi, razo Ndraono Gizeraeli, ba 41 fakhe razo ia.[13] 24 Ba si fatuwu khö Yehowa ilau; lö iböhöli horö Yerobeamo, ono Nebati, famaelungunia Iraono Gizeraeli.[14] 25 Ya'ia zangai mangawuli tanö Ndraono Gizeraeli andrö, i'otarai lala ba Hamata, numalö ba zilua asi andrö, ba zalo'o, dali li Yehowa, Lowalangi Ndraono Gizeraeli, nifaŵa'ögönia khö genoninia Yona andrö, ono Gamita'i, banua Gata Heferi.[15] 26 Me no inehegö Yehowa wamakao Iraono Gizeraeli andrö, safö khö sibai; iraono ba satua, ba no ahori, ba lö sangorifi Iraono Gizeraeli.[16] 27 Ba lö'ö sa niŵa'ö Yehowa ihori ba guli danö döi Ndraono Gizeraeli, ba tobali ibe'e sangorifi ya'ira Yerobeamo andrö, ono Yoasi.[17] 28 Ba hadia na ena'ö nidunö-dunö ba khö Yerobeamo andrö ba hadia ia fefu nilaunia, ba fa'abölönia andrö, he wisa wasuwötania ba he iwisa wangai mangawuli ba Ndraono Gizeraeli tana ba niha Yehuda ba Ndramaseko ba ba Hamata, ba no mutanö ba zura hikaya razo Ndraono Gizeraeli. 29 Ba itörö lala ndra amania Yerobeamo, mate ia, ba ba Zamaria lako'o ia, ba ngai razo Ndraono Gizeraeli andrö. Ba fangalinia razo, ba ononia Sakharia.[18]
Famotokhi ba gahe
editFabaliŵa lala
editOlayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö