Fokhö Hisikia, nifadöhö Yesaya edit
I. 1 Ba me luo da'ö, ba mofökhö Hisikia, fökhö ba wa'amate.[1] Ba möi khönia Yesaya sama'ele'ö, ono Gamosi, imane khönia: Da'ö niŵa'ö Yehowa: Oroi'ö hadia ia niŵa'öu, si mate sa'ae ndra'ugö, lö döhö wökhöu. 2 Ba ibali'ö ia, i'otahögö mbagolö, mangandrö ia khö Yehowa, 3 imane: "He Yehowa, törö tödöu, wa no utörö lala nifakhoimö, lö si faröi ndra'o, lö si duadua dödögu, ba no ulau zomasi ndra'ugö!" Ba mege-ege sibai Hisikia. 4 Ba ha ba golayama ba dalu na irugi Yesaya, ba humede khönia Yehowa, 5 imane: Fuli'o, ba ömane khö Hisikia, razo mbanuagu andrö: Da'ö niŵa'ö Yehowa, Lowalangi duau Dawido: No urongo wangandrömö andrö, ba taŵa höröu, ba no u'ila. Ba da'ufadöhö wökhöu; dua wongi tö, ba möi'ö miyaŵa ba gosali Yehowa. 6 Ba mewelelima fakhe udou'ö wa'anau nosou, ba baero ö na, ba u'efa'ö ndra'ugö ba banua andre ba danga razo Asiria, ba utimba zi lö sökhi ba mbanua andre, börö ndra'o ba börö na genonigu Dawido.[2] 7 Ba imane Hisikia khö Yesaya: Hadia dandra, wa abe'e ndra'o, ibe'e Yehowa, fa hatö dua wongi, ba möi ndra'o miyaŵa ba gosali Yehowa? 8 Ba imane Yesaya: Da'ö dandra khöu, nibe'e Yehowa, wa ifalua nifabu'unia: Hadia zomasi'ö, na fulu bosi idou'ö ia föna lumö andrö, ba ma fulu bosi iwuwu ia? 9 Ba imane Hisikia: Aoha na fulu bosi idou'ö ia föna lumö andrö, böi da'ö; omasido na fulu bosi iwuwu ia. 10 Ba mangandrö Yesaya khö Yehowa, ba fulu bosi ifuli ia furi lumö andrö, ba dandra luo andrö khö Gahasi, si no numalö ia mitou, ibe'e Yehowa. 11 Ba imane Yesaya: Da dalu-dalu nifalemba, bua ara. Ba lahalö ba labe'e ba waosa andrö, ba abe'e Hisikia.
Sinenge razo Mbabeli, si möi khö Hisikia. Itegu wayaŵasa Hisikia Yesaya edit
II. 12 Ba me luo da'ö, ba ifa'ohe'ö zura ba buala khö Hisikia Merodakhi Balada, ono Mbalada, razo Mbabeli; me no irongo, wa no mofökhö Hisikia, awö wa no ifuli abe'e. 13 Ba omuso dödö Hisikia ira andrö, ba i'oroma'ö khöra nomo girö-girö andrö khönia ma'asambua, awö wirö, awö gana'a, awö wamasa gö, awö wanikha sebua böli, ba omo wangöna andrö khönia, ma'asambua, awö zi so ba naha girö-girö khönia, fefu. Lö hadia ia zi lö i'oroma'ö Hisikia khöra, ba gödonia ba ba gamatöröŵania fefu. 14 Ba möi khö razo Hisikia Yesaya sama'ele'ö, imane khönia: Hadia niŵa'ö niha andrö ba heza moroi ira, we'amöi khöu? Imane Hisikia: La'otarai danö saröu, ba Mbabeli moroi ira. 15 Ba imane: Hadia ni'ilara ba gödomö? Ba imane Hisikia: No ahori la'ila zi so ba gödo khögu; Lö hadia ia ba naha girö-girö khögu, zi lö u'oroma'ö khöra mege. 16 Ba imane Yesaya khö Hisikia: Fondrondrongo niŵa'ö Yehowa: 17 Hiza, irugi baŵa dania, ba te'ohe ba Mbabeli fefu hadia ia zi so ba gödo khöu, fefu hadia ia nihöna ndra amau, awö ndra tuau; ma'ifu lö lasaigö dania, iŵa'ö Yehowa.[3] 18 Ba onou andrö, nga'ötöu, ba lahalö ösa, ba wame'e mandru ya'ira ba gödo razo Mbabeli.[4] 19 Ba imane Hisikia khö Yesaya: Li Yehowa andrö, nifa'emamö, ba no li si sökhi! Imane sa dödönia: Ba götögu andre, ba fa'ohahau dödö sa atö, ba lö hadia ia wamakao![5]
Fa'amate Hisikia edit
III. 20 Ba hadia na ena'ö nidunö-dunö ba khö Hisikia andrö, ba fa'abölönia fefu, ba famazökhinia baŵa nidanö andrö, awö hele, wamatörö miyomo idanö, ba no mutanö ba zura hikaya razo mado Yuda. 21 Ba mate Hisikia, itörö lala ndra amania, ba fangalinia razo, ba ononia Manase.
Famotokhi ba gahe edit
Fabaliŵa lala edit
Olayama Razo II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö