Wb/nia/Yobi/36

I. Fa'atulö Lowalangi andrö

1 Ba itohugö Elihu, imane: 2 "Base'ö ma'ifu khögu, ba ufahaö ndra'ugö; so na sa niŵa'ö ba khö Lowalangi andrö. 3 Ba zaröu uhalö wa'aboto ba dödögu, ba u'ohe ba lala hadia ia khö zomböi ya'odo. 4 Si ndruhu sa, tenga faya niŵa'ögu; si no a'oi so fa'aboto ba dödö zi fahuhuo khöu. 5 Hiza, no sabölö Lowalangi, ba lö'ö zui i'ositengagö niha, no fahöna wa'abölö wa'aboto ba dödö. 6 Lö i'orifi zebua horö; ba huhuo zebua famakao, ba ibe'e ba lala. 7 Lö iböhöli wamaigi satulö tödö ba awö razo ba dadaoma ifedadao ira, si lö mamalö-malö, ena'ö salaŵa ira. 8 Ba na no murate ira, na no tofesu ira fesu famakao, 9 na ifarongogö khöra wolaura, awö horöra andrö, wa no fayaŵa ira, 10 na tobali ibokai dögi dalingara, ba wanenaŵa andrö, ena'ö laböhöli zi lö sökhi: 11 Ba na lafondrondrongo, na la'o'ö, ba sohahau tödö ira, ba we'asora na ba guli danö, somuso tödö ba zi tosai götöra. 12 Ba na lö lafondrondrongo, ba si mate ba nono wana dania ira; aetu nosora lö fa'aboto ba dödö. 13 Ba niha si tefuyu tödö, ba so mbao dödö, lö fakao, na ifesu ira; 14 ba wa'a'onomatua aetu nosora, mate ira, si mane sohorö-horö. 15 Sebua famakao, ba i'orifi, ibe'e fangorifinia wamakaonia andrö; ba ibe'e famokai dögi dalingara wa'atosasara andrö.

II. Fanandrösaigö khö Yobi

16 Ba ya'ugö göi, ba idönisi, wangefa'ö ya'ugö ba mbawa wamakao andrö, i'ohe ba zebolo tanö, ba zi lö fa'atosasa, ba satabö nifa'oli tou diwou. 17 Ba no fahöna khöu wangetu'ö huku, si mane ba zebua horö; ba fangetu'ö huku ba famatörö huku, ba no fago'ö. 18 Böi ya ifowöhö ndra'ugö ba wango'aya bao dödöu andrö; ba böi elungu'ö ba wa'ebua höli andrö. 19 Hadia, i'efa'ö ndra'ugö ba wa'atosasa andrö fe'ao-aomö andrö, na no a'oi dölau? 20 Böi ya humulu dödöu, ena'ö na bongi, fa humufa soi niha ba nahara. 21 Angelama, böi otahögö zi lö sökhi; da'ö sa zomasi'ö, moroi ba wanaha famakao.

III. Fa'asalaŵa Lowalangi ba fa'ebuania

22 Hiza, nifolau zalaŵa wolau Lowalangi, ba wa'abölönia andrö; heza so zamatörö, si mane ya'ia? 23 Ha niha zamakhoi khönia lala, ba ha niha zanguma'ö: 'No ölau zi lö atulö? 24 Alui tödöu, ena'ö ö'ebua'ö döi wolaunia andrö, nisunosuno niha. 25 Dozi niha, ba sowua-wua tödö ba da'ö, moroi ba zaröu la'ila niha danö. 26 Hiza, no salaŵa Lowalangi ba tebai aboto ba dödöda ia; lö mutaha mu'erai ndröfinia. 27 I'ofaya sa'ae mböi nidanö; mowöi taŵa deu, na mosau khönia. 28 Satoru moroi yaŵa ba lawuo, saekhu ba niha, si no ato. 29 Ba mendrua manö, na aboto ena'ö ba dödöda wa'ebolo lawuo andrö [ba] fa'ofetu ba nosenia andrö. 30 Hiza, ifasui ia hagania andrö; ba ibalugö ŵa'a nasi. 31 Da'ö sa'ae ibe'e fanguhuku soi niha, ba ihöna mbalazo. 32 Dua dangania ibalugö haga, ba ibe'e fanimba zi fa'udu. 33 Ifarongogö ia ugu-ugunia andrö, ba saŵi na'i zangila, na so ia moroi sa."

Famotokhi ba gahe

Fabaliŵa lala

Olayama Yobi: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö