I. Khö Lowalangi ebua dödöra iŵa'ö, khönia fa'awö ira edit
1 "Hiza, no i'ila hörögu da'ö fefu; no irongo tögi dalingagu ba no utanö ba dödögu. 2 Ni'ilami andrö, ba u'ila göi; tenga sambö moroi khömi ndra'odo. 3 Ba omasido muhede khö Zi lö ambö fa'abölö, fabu'asa khö Lowalangi nilau dödögu. 4 Samakhai faya sa'ae ami ba same'e dalu-dalu si lö boto.[1] 5 Ena'ö na mibato wehede, ba tobali fa'atua-tua, wamaigi niha bö'ö! 6 Mifondrondrongo ato wanegugu [ya'ami]; mibe'e mbörö dalingami ba watahisa mbewegu andre. 7 Hadia, miŵa'ö zi lö atulö, ba wango'awögö Lowalangi, ba milau waya, ba wamohare ya'ia? 8 Hadia, si fa'awö khö Lowalangi ami, hadia, samu'a ba hulu Lowalangi nilaunia ami? 9 Hadia, sökhi maö lawulawu, na isekhegö ami, ma edöna mi'o'aya, si mane fango'aya niha awöra? 10 Lö'ö, lö zi lö i'otu'ö ami, na fa'awö ami, famini tödö. 11 Hadia, lö tokea ami ibe'e fa'asalaŵania, ba lö ihawui ami fameta'unia [ya'ami]? 12 Timba nawu daroma limi, ba ba'a-ba'ami, ba no ba'a-ba'a la'uri. 13 Böi mihede-hede khögu, ba ya'odo zihede; gofu itörö khögu!
II. Ibu'a ba hulunia, wa mangarö-ngarö ia ba itahigö Lowalangi edit
14 Hana wa u'usu nösigu; wolohe ya'ia? Da'ugogohe tangagu nosogu. 15 Hiza, ibunu ndra'o, ba udöna-döna khönia; ba ufa'ele'ö khönia gamuatagu. 16 Da'ö sa'ae wangorifigu, wa tebai i'ondrasi ia sebua horö. 17 Ba mifondrondrongo sibai wehedegu; yamöi ba dögi dalingami wamu'agu andre! 18 Hiza, no ufobörö huhuo andrö, u'ila wa no satulö khögu. 19 Ha niha zi tola fasoso khögu? ba lö'ö sa hede-hedegu ena'ö; mate manö ndra'odo. 20 Ha dua balö zi böi öfatörö khögu, ba lö'ö sa'ae ubini'ö ndra'odo, ba wamaigiu ya'o. 21 Böda dangau khögu, ba böi ifeta'u ndra'o fameta'u andrö khöu.[2] 22 Ba ao khögu, ba ya'o zanema liu; ba ma ya'odo zihede, ba ya'ugö zanedema. 23 Ha wa'oya ato lalögu ba ha wa'oya horögu? Farongogö khögu golalöŵagu, awö horögu! 24 Hana wa öbini'ö mbawau, ba hana wa öbe'e si fa'udu khöu ndra'odo?[3] 25 Hadia öfe'awa mbulu lehu ni'oloi'ö nangi, ba hadia, ögohi döla wakhe si no oköli? 26 Wa no safeto sibai öhonogöi khögu, wa utema amaedola gondröita horögu me ono matua ndra'o?[4] 27 Wa öbe'e ba galo gahegu, wa ödarodarogö nitörögu fefu, awö wa öfa'u'u lalu'a kahegu?[5] 28 Ba no niha sadudu dania ndra'odo, amaedola ni'a go, ba amaedola mbaru ni'a hama."
Famotokhi ba gahe edit
Fabaliŵa lala edit
Olayama Yobi: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö