I. Ifakaoni'ö mbekhu Saulo ba wasuwöta ba Ndrawa Wilisiti edit
1 Ba me luo da'ö, ba owulo Ndrawa Wilisiti, ba wanuwö Iraono Gizeraeli. Ba imane Akhisi khö Dawido: Böi zi lö aboto ba dödöu, wa khögu fao ndra'ugö, fabaya banuau andrö, ba wanuwö. 2 Ba itema li Nakhisi Dawido, imane: Lau, ö'ila sa dania wolau zawuyumö andre! Ba imane Akhisi khö Dawido: Ba lau, ba ufataro samaigi-maigi ya'o ndra'ugö, götö wa'anau nosogu. 3 Ba Samueli, ba no mate; ba no la'e'esi ia Iraono Gizeraeli fefu, ba no lako'o ia, ba Rama. Ba no ifofanö zogaoni bekhu ba si faeta Saulo, no iheta ba danö.[1] 4 Ba owulo sa'ae Ndrawa Wilisiti ba larugi Zunema, ba da'ö tebato ira. Ba i'owuloi göi Ndraono Gizeraeli fefu Saulo, ba ba hili Giliboa tebato da'ö. 5 Ba me i'ila golombaseŵa Ndrawa Wilisiti Saulo, ba ata'u ia, manizi-nizi bakha dödönia. 6 Ba manofu khö Yehowa Zaulo, ba lö itema linia Yehowa, he ba wangifi, ba he ba "Urimi" andrö, ba he ba zama'ele'ö,[2] 7 Ba imane Saulo ba nawönia: Mi'alui khögu ndra alawe si so elemu, ba wogaoni bekhu, ena'ö möido khönia, ba wanofu khönia. Ba lamane awönia andrö: Ba Gendroro so ndra alawe, si so elemu ba wogaoni bekhu.[3] 8 Ba ibini'ö Saulo, wa ya'ia, nukha bö'ö i'onukha ba möi ia, ba darua nawönia fao. Ba ba zi bongi möi ira yomo ba ndra alawe andrö. Ba imane Saulo: Eta'ö khögu ba gelemu ba wogaoni bekhu andrö ba kaoni khögu nitötöigu töi khöu. 9 Ba imane khönia ira alawe andrö: No örongo ae nilau Zaulo, wa no ihori ba danö zogaoni bekhu, awö zi faeta, ba hana wa ölau dandraŵa khögu, ba wamunu ya'odo? 10 Ba möi ba hölu khönia Zaulo khö Yehowa, imane: Faya wa no sauri Yehowa, na tebe'e horöu dania da'ö! 11 Ba imane ira alawe andrö: Ha niha nikaonigu khöu? Ba imane: Samueli kaoni khögu. 12 Ba me i'ila Zamueli ira alawe andrö, ba mu'ira-ira ia. Ba imane khö Zaulo: Hana wa no ölimodo? Saulo ndra'ugö! 13 Ba imane khönia razo: Böi busi dödöu: hadia ni'ilau? Ba imane ira alawe andrö khö Zaulo: Bekhu u'ila moroi tou, barö danö. 14 Ba imane khönia: He wisa ia wamaigiu ya'ia? Ba imane: Niha satua zi möi yaŵa, baru sebua mbarunia. Ba aboto ba dödö Zaulo, wa Samueli, ba ifalögu tou ia ba danö, mangalulu.
II. Oroma mbekhu Zamueli ba tokea sibai Zaulo ba ni'ombakha'önia edit
15 Ba imane Samueli khö Zaulo: Hana wa öbusi dödögu wamakaoni'ö ya'odo? Ba imane Saulo: No tasasa sibai ndra'o. Lasuwö ndra'odo Dawa Wilisiti, ba no iheta ia khögu Lowalangi, lö'ö sa'ae itema ligu, he ba zama'ele'ö, ba he ba wangifi, ba andrö ufakaoni'ö ndra'ugö, ena'ö ö'ombakha'ö khögu he uwisa. 16 Ba imane Samueli: Ba hadia wa ösofu khögu, me no iheta ia khöu Yehowa, ba me no tobali si fa'udu khöu? 17 No ifatörö khöu Yehowa nifaŵa'ögönia khöu khögu no: no iheta khöu dadaoma wa'asalaŵa ba no ibe'e ba mbö'ö, khö Dawido andrö ibe'e. 18 Me no lö ni'o'ömö oroisa Yehowa, ba me lö nifatöröu fönunia andrö sabölö-bölö ba Ndraono Gamaleki, andrö ilau khöu zi manö Yehowa, ma'ökhö.[4] 19 Ifarahugö ami Ndraono Gizeraeli, wame'e ba danga Ndrawa Wilisiti; mahemolu a mate ndra'ugö, fabaya onou. Ba he sabölö Ndraono Gizeraeli andrö, ba ibe'e ba danga Ndrawa Wilisiti Yehowa. 20 Ba alau tou ba danö Zaulo, ba wa'atokea, adölö manö tou ba danö. Ihawui ia fa'ata'u sabölö-bölö ba niŵa'ö Zamueli andrö; ba noa sa'ae si lö döladöla ia, me no ma'öma'ökhö menewi ba sara wongi lö si manga ia. 21 Ba möi khö Zaulo ndra alawe andrö, ba me i'ila, wa no si tokea sibai ia, ba imane khönia: Hiza, no ifondrondrongo liu enoniu andre, ba no u'ositengagö manö nosogu, wolo'ö somasi'ö, niŵa'öu khögu. 22 Ba ö'o'ö sa'ae göi niŵa'ö genoniu andre khöu. Da'uhalö khöu zambawa roti, ba ö'a, ena'ö abe'e ndra'ugö, ba wangawuli. 23 Ba lö edöna ia, imane: Lö mangado! Ba me laforege ira awönia ba ira alawe andrö, ba i'o'ö niŵa'öra, maoso ia ba zalo ba mudadao ba gaso. 24 Ba no so barö mbatö ndra alawe andrö nono zaŵi nibula; ba igösö itaba, ba ihalö hamo, ifaruka ba ibali'ö kue. 25 Ba ifa'oli khö ndra Saulo awönia, ba me no manga ira, ba maoso ira mofanö, ba zi bongi andrö.
Famotokhi ba gahe edit
Fabaliŵa lala edit
Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö