I. Elikana ba fo'omonia Khana ba Fenina edit
1 So niha, banua Ramata'i, ma'uwu Zufi, ba hili mado Geferayi, Elikana döi, ono Yeroha ono Gelihu ono Dohu ono Zufi, mado Geferayi.[1] 2 Ba dombua ndrongania: Khana döi zi sambua ba Fenina zi sambua; ba Fenina, ba si so ono, ba lö ono Khana. 3 Ba ero röfi möi misi yaŵa niha andrö, moroi ba khöra, ba wangalulu khö Yehowa ngahönö ba Zilo, ba ba wame'e sumange. Ba so ba da'ö ndraono Eli andrö, si darua, Hofini ba Fineha, ere khö Yehowa.[2] 4 Ba ero na ibe'e zumange Elikana andrö, ba ifo'urakha wo'omonia Fenina ba ononia matua ba ononia alawe fefu; 5 ba khö Khana, ba ha samösa mo'urakha ibe'e, lö lai wa no abölö i'omasi'ö Khana; ba no iduhö dalunia Yehowa.[3] 6 Ba ibusi dödönia udunia andrö (Fenina) fehede famaosi tödönia, ba wangandrö fönunia, me no iduhö dalunia Yehowa. 7 Ba ero röfi, ba si manö-manö wolaunia: ero na möi ira misi yaŵa ba nomo Yehowa ibaosi dödönia. Ba mege-ege Khana, ba lö manga. 8 Ba imane khönia fo'omonia Elikana: He Khana, hana wa mege-ege ndra'ugö ba hana wa lö manga'ö? hadia mbörö wa si lö sökhi-sökhi dödöu? Hadia, lö omasi'ö ndra'odo, moroi ba zi dafulu, ono matua?
II. Fangandrö Khana. Ifabu'u khönia nono matua Eli edit
9 Ba samuza ma'ökhö, me no manga ira ba Zilo, ba me no labadu nagu, ba maoso Khana, i'ondrasi Yehowa, ba no dumao-dao ba kurusi Eli, ere andrö, ba zinga mbawandruhö gosali Yehowa. 10 Ba mangandrö Khana khö Yehowa, ba wa'abu dödönia andrö, mege-ege sibai ia, ba ifabu'u linia, 11 imane: He Yehowa ngahönö! Na öfaigi lala ba wa'abu dödö genoniu andre, na itörö tödöu ndra'odo, na lö olifu'ö genoniu andre, wame'e ono matua khönia, ba khö Yehowa ufuli ia, sagötö ya'ia, ba böi tefatörö ba högönia wanöwö![4] 12 Ba me i'aragö wangandrö khö Yehowa, ba ifaigi-faigi mbawania Eli. 13 Lö'ö sa alua baeha Khana wehedenia, ha bewenia zametumetu, ba linia, ba lö terongo, — ba ibali si mabu Eli. 14 Ba imane khönia: Ha wa'ara dania döhö wemabumö? 15 Tayaigö wemabu andrö! Ba imane Khana: Tenga Tua; ira alawe sabu tödö ndra'odo a'ine! Agu ba hadia ia zi mabu niha, ba lö nibadugu, ba no ubokai dödögu, khö Yehowa.[5] 16 Böi bali si lö ngaroro genonimö andre; börö wehedegu irege da'e, ba fa'alangu dödögu ba fa'abu dödögu. 17 Ba imane khönia Eli: Fuli'ö, ya'ohahau dödöu, ibe'e sa'ae khöu Lowalangi Ndraono Gizeraeli ni'andröu khönia! 18 Ba imane: Ena'ö na falukha genoniu andre wa'ebua dödöu khönia! Ba mofanö ndra alawe andrö ba manga ba döhö wa'abu dödö.
III. Tumbu Zamueli ba tebe'e enoni Yehowa edit
19 Ba mahemolu ö, ba lahulö wongi wangandrö khö Yehowa ba lafuli ira ba Rama. Ba me orudu Elikana khö wo'omonia Khana, ba itörö tödö Yehowa ia. 20 Ba me no ituo wunia, ba no manabina Khana, ba no mo'ono ia, ono matua, ba Samueli ibe'e töi nono andrö, imane: Me ni'andrögu khö Lowalangi. 21 Ba me ifuli möi misi yaŵa Elikana andrö, awö zoroiyomonia fefu, ba wame'e khö Yehowa sumange andrö, sero röfi ba hadia nifabu'unia na, 22 ba lö fao Khana, imane sa khö ngambatönia: Na aefa ba mbagi zusu nono; awena dania u'ohe ia, ena'ö i'oroma'ö ia khö Yehowa, ba ena'ö lö'ö sa'ae tebulö ia ba da'ö. 23 Ba imane khönia fo'omonia Elikana: Balazi ndra'ugö, iagö furi, irege aefa ia ba mbagi zusu. Yamube'e Yehowa itorö niŵa'öu! Ba toröi furi ndra alawe andrö ba ifaenufaenu nononia, irege aefa ba mbagi zusu. 24 Ba me no i'efa'ö ba mbagi zusu, ba i'ohe misi yaŵa, ba sara nono zaŵi, si no medölu fakhe, ba dua lauru hamo ba samba nahia nagu, i'ohe ba nomo Yehowa ba Zilo. 25 Ba lataba nono zaŵi andrö, ba i'ondrasi Eli ina nono andrö, i'ohe nono. 26 Ba imane: Hiza Tua, faya wa no sauri ndra'ugö, ya'ugö Tua, na tenga ya'odo ndra alawe andrö, si no so ba da'e no, fönau, ba wangandrö khö Yehowa. 27 Ono andre ni'andrögu, ba no ifondrondrongo Yehowa wangandrögu, no ibe'e khögu ni'andrögu. 28 Ba ya'o, ba ube'e niwawalö Yehowa göi [nono]; sagötö ya'ia, ba ya niwawalö Yehowa! Ba iröi sa'ae ba da'ö [nono], föna Yehowa.
Famotokhi ba gahe edit
Fabaliŵa lala edit
Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö