I. Isuwö Ndraono Gamaleki Saulo. Lö i'o'ö niŵa'ö Lowalangi edit
1 Ba imane Samueli khö Zaulo: No iŵa'ö khögu Yehowa wamayoini ya'ugö razo mbanuania Iraono Gizeraeli; ba fondrondrongo goroisa Yehowa.[1] 2 Da'ö niŵa'ö Yehowa ngahönö: No uŵa'ö tödögu, nilau balö nilau Ndraono Gamaleki ba Ndraono Gizeraeli, womba'a lala khöra, me so ira moroi si tou, ba danö Miserayi.[2] 3 Ba ae suwö Ndraono Gamaleki andrö ba ölakha'ö ira, awö zi so khöra fefu, böi hakhösi tödö; bunu ira, he ira matua, ba he ira alawe ba ono matua ba si lö aefa na ba mbagi zusu, ba saŵi ba biri-biri ba ondra ba kalide![3] 4 Ba ifahede'ö ba niha sato Saulo. Ba i'ofaya ira ba Delami: 200.000 zi lö kudo ba 10.000 ma'uwu Yuda. 5 Ba isaŵa mbanua sebua ba Ndraono Gamaleki Saulo, ba ifatenge ba ndraso mbombo andrö ösa, samini'ö ya'ira ba da'ö. 6 Ba imane Saulo ba ma'uwu Geni andrö: Mifaoso, miheta ami! mifabali ami ba Ndraono Gamaleki, ena'ö lö uhori ami awöra, me no si sökhi nilaumi ba Ndraono Gizeraeli fefu, me la'otarai danö Miserayi. Ba laheta ira ba ngai Ndraono Gamaleki ma'uwu Geni andrö.[4] 7 Ba ilau ba Ndraono Gamaleki Saulo, i'otarai Delami, numalö ba Zuri, tanö ba gatumbukha luo i'otarai danö Miserayi. 8 Ba Agagi andrö, razo Ndraono Gamaleki, ba lara'u auri, ba sato fefu, ba la'ö'ötö tou bawa zi'öli. 9 Ba Saulo ba sato, ba la'orifi Agagi andrö ba si sökhi mbiri-biri ba si sökhi zaŵi, satabö ba nibula ba hadia ia fefu zebua böli, te khöra lafakiko da'ö; ba hadia zi lö böli ba si lö töi, ba lafakiko.
II. Itegu ia Samueli ba i'ombakha'ö khönia wa aefa ia razo edit
10 Be humede Yehowa khö Zamueli, imane: 11 Mangesa dödögu, me no ube'e razo Zaulo andrö; noa sa i'erogö ndra'o ba lö nitörönia niŵa'ögu. Ba afökhö khö Zamueli, ba sara wongi manö i'angaröfi li Yehowa. 12 Ba ihulö wongi ifaondragö Zaulo Samueli. Ba la'ombakha'ö khö Zamueli: No mangawuli Zaulo, no isaŵa hili Garemeli, ba da'ö no itaru'ö harefa khönia, ba no iröi da'ö, no isaŵa misi tou Giligala. 13 Ba me falukha Zamueli khö Zaulo, ba imane khönia Saulo: Ya'ahowu ndra'ugö khö Yehowa! 14 No utörö niŵa'ö Yehowa. Ba imane Samueli: Ba hadia wambehesa mbiri-biri andrö ba dögi dalingagu, ba fe'ao-ao zaŵi andrö, nirongo-rongogu? 15 Ba imane Saulo: Ni'ohera moroi ba Ndraono Gamaleki; noa sa la'orifi zi sökhi mbiri-biri ba si sökhi zawi sato, ba wame'e sumange Lowalangiu Yehowa; ba tanö bö'ö, ba no mabunu. 16 Ba imane Samueli khö Zaulo: Böi ua! ena'ö u'ombakha'ö khöu, hadia wehede Yehowa khögu, me owi! 17 Ba imane: ŵa'ö! Ba imane Samueli: Tenga si manö: he ŵa'ae niha side-ide ndra'ugö wamaigiu, ba noa zui högö mado Ndraono Gizeraeli ndra'ugö, me no ibayoini razo Ndraono Gizeraeli ndra'ugö Yehowa,[5] 18 ba no ifatenge ndra'ugö Yehowa, no iŵa'ö khöu: Ae fakiko zebua horö andrö, Iraono Gamaleki, lau khöra, irege no ahori ira öbe'e! 19 Ba hana wa lö ö'o'ö goroisa Yehowa andrö, bana wa no öfahulö gahulua andrö, wolau si fatuwu khö Yehowa? 20 Ba itema li Zamueli Saulo imane: Ba no u'o'ö niŵa'ö Yehowa: ba nifatenge Yehowa ya'o, ba no möido, ba no u'ohe razo Ndraono Gamaleki, Agagi andrö, ba Iraono Gamaleki andrö, ba no ufakiko. 21 Ba no lahalö mbiri-biri, ba saŵi sato, ahulua andrö ösa, si sökhi nilakha'ö andrö, ba wame'e sumange Lowalangiu, Yehowa, ba Giligala. 22 Ba imane Samueli: Ba hadia, no faoma wa'ebua dödö Yehowa, he ba zumange nitunu, awö ba zumange nitaba, ba he ba wolo'ö linia? Hiza, sökhi wolo'ö, moroi ba zumange, ba sökhi wamondrongo li, moroi ba dawö zi matua mbiri-biri;[6] 23 fa lö molo'ö sa, ba no timba horö fakelemusa, ba fa'abe'e dandro, ba no falaŵalaŵa ba wa'aefa ba Lowalangi ba ba wame'e adu! Ba me no lö ba dödöu niŵa'ö Yehowa, ba noa göi tebai razo ndra'ugö, wamaiginia.[7] 24 Ba imane Saulo khö Zamueli: Horögu da'ö, me no usawö goroisa Yehowa, awö nifakhoinia andrö; ba no ata'udo zato, ba no tobali u'o'ö niŵa'öra. 25 Ba iya'e, ba be'e aefa khögu horögu, ba taisa awögu ba wangawuli, ena'ö mangalulu ndra'o khö Yehowa! 26 Ba imane Samueli khö Zaulo: Lö möido awöu ba wangawuli: me no lö ba dödöu oroisa Yehowa, ba noa göi tebai razo Ndraono Gizeraeli ndra'ugö, wamaigi Yehowa. 27 Ba me ibali'ö ia Samueli, ba wofanö, ba ituyu watalinga mbarunia sebua Saulo, ba aetu da'ö. 28 Ba imane khönia Samueli: No iheta khöu wa'arazo ba Ndraono Gizeraeli Yehowa maökhö, no i'etu'ö, ba no ibe'e ba niha bö'ö, si sökhi moroi khöu.[8] 29 Ba lö'ö sa mofaya "lakhömi" Ndraono Gizeraeli andrö, ba lö mangesa dödönia, me no tenga niha ia, wa mangesa ena'ö dödönia.[9] 30 Ba imane: Horögu sa, ba fosumange atö ndra'o, föna zalaŵa ba föna zato, we'amöi awögu ba wangawuli, ena'ö mangalulu ndra'o khö Lowalangiu, Yehowa!
III. Iheta ia khö Zaulo Samueli, me no aefa ibunu Agagi andrö edit
31 Ba mangawuli Zamueli, i'o'ö Zaulo, ba mangalulu khö Yehowa Zaulo. 32 Ba imane Samueli: Ndramu'ohe khögu ba da'e razo Ndraono Gamaleki andrö, Agagi andrö! Ba i'ondrasi ia Agagi, no ohahau mbawa; imane Agagi: Hiza, no taya wa'afökhö wa'amate! 33 Ba imane Samueli: Si mane fangohorimö iraono ndra alawe bö'ö, si'ölimö, si manö göi lahori ndraono ninau, moroi ba wangohori iraono ndra alawe bö'ö! Ba igögötö tou Agagi Samueli, föna Yehowa ba Giligala. 34 Ba isaŵa Rama Samueli, ba Saulo, ba ifuli ia ba khöra misi yaŵa ba Gibea, banua Zaulo. 35 Ba lö'ö sa'ae falukha Zamueli khö Zaulo, irege mate ia, noa sa abu dödö Zamueli ba khö Zaulo andrö, ba no mangesa dödö Yehowa, me no ifataro razo Ndraono Gizeraeli Zaulo.
Famotokhi ba gahe edit
Fabaliŵa lala edit
Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö