I. Fatiu sibai dödö Zaulo khö Dawido ba i'alösi Yonata edit
1 Ba i'ombakha'ö Saulo khö nononia Yonata ba ba nawönia fefu, wa edöna ibunu Dawido. Ba no omasi sibai Yonata, ono Zaulo, Dawido andrö;[1] 2 andrö wa i'ombakha'ö khö Dawido da'ö, imane: I'alui wamunu ya'ugö amada; angelama mahemolu mbanua, bini'ö ndra'ugö ba böi oroma'ögö ua. 3 Ba ya'o, ba möido baero, ba u'iagö ngai namada, ba mbenua, ba zi so ya'ugö, ba fahuhuodo khö namada, ba khömö andrö, ba hadia nirongogu dania, ba u'ombakha'ö khöu. 4 Ba isuno Dawido Yonata khö namania Saulo, imane khönia: Böi yamuhalö horönia razo wolau hadia ia khö ngoni-ngoninia Dawido, lö'ö sa horönia khöu, ba si no moguna sibai khöu wolaunia andrö fefu. 5 Hulö zi lö ba dödönia nosonia mege, me ibunu Ndrawa Wilisiti andrö, ba no möna sibai Ndraono Gizeraeli fefu, ba da'ö, ibe'e Yehowa. No höröu zangila, ba no somuso tödö ndra'ugö mege. Ba hana sa wa öhalö horöu ndro zi lö horö andrö, wamunu Dawido, si lö börö-börö?[2] 6 Ba ifondrondrongo niŵa'ö Yonata Saulo, fahölu ia, imane: Faya wa no sauri Yehowa, na labunu Dawido! 7 Ba mu'ao Yonata khö Dawido, ba i'ombakha'ö khönia huhuo andrö, fefu. Ba ifuli i'ohe khö Zaulo Dawido Yonata, ba soso ia khönia, si mane mege.
II. I'orifi Dawido fo'omonia Mikhala ba wa'onekhenia andrö edit
8 Ba me ifuli tesao wanuwö, ba möi Dawido fasöndra ba Ndrawa Wilisiti; ato sibai nibunu, ba moloi zi tosai ibe'e. 9 Ba ifuli ira'u Zaulo bekhu zi lö sökhi andrö khö Lowalangi; no dumadao ia ba nomonia ba sara dohonia ba dangania, ba solau biola Dawido tangania.[3] 10 Ba itandro ena'ö ba mbagolö Dawido Saulo. Ba ihole'ö ia Dawido khö Zaulo, ba tobali tetaru ba mbagolö doho. Ba maoso Dawido, moloi. 11 Ba ba zi bongi andrö, ba ifatenge zinenge Saulo, ba nomo Dawido, ba wanaro ya'ia, ena'ö i'ila ibunu na moluo. Ba i'ombakha'ö khö Dawido fo'omonia Mikhala, imane: Na lö ö'orifi'ö bongi, ba labunu'ö mahemolu![4] 12 Ba ifatörö ba zandrela Dawido Mikhala, wanada ya'ia tou; ba moloi ia, aefa. 13 Ba ihalö ziraha Mikhala, ifalea tou ba gaso, ba ibe'e ba lulu, tanö ba högö, gambala bu nambi, ba baru ibe'e ambalania. 14 Ba me ifatenge zinenge Saulo, ba wangai Dawido, ba imane Mikhala: Mofökhö. 15 Ba ifuli ifatenge zinenge andrö Saulo, ba wamaigi Dawido, imane: Mi'ohe ia, fabaya farate, ena'ö ubunu ia! 16 Ba me larugi sinenge andrö, ba hiza ziraha ba warate ba ambala bu nambi ba lulu. 17 Ba imane Saulo khö Mikhala: Hana wa ömanö wolimo ya'o, wa no öfofanö zi fa'udu khögu, wa no moloi ia? Ba imane Mikhala khö Zaulo: No imane khögu: Fofanö ndra'o, fa böi ubunu'ö!
III. Moloi Dawido isaŵa Zamueli edit
18 Ba moloi Dawido, aefa ia, isaŵa Zamueli ba Rama ba i'ombakha'ö khönia hadia ia fefu nilau Zaulo khönia, ba fao ia khö Zamueli ba ba Nayoti soso ira, ba Rama. 19 Ba te'ombakha'ö khö Zaulo: Ba Nayoti, ba Rama so Dawido! 20 Ba ifatenge zinenge Saulo, ba wangai Dawido. Ba me la'ila zama'ele'ö andrö, sangombakha, sambawa manö, awö Zamueli, solohe ya'ira, ba so Geheha Lowalangi, hulö ira'u zinenge Zaulo andrö, tobali mama'ele'ö ira göi.[5] 21 Ba me la'ombakha'ö da'ö khö Zaulo, ba ifatenge zinenge bö'ö; ba ya'ira göi, ba mama'ele'ö göi. Ba me ifatenge na Saulo, medölu fefu, ba mama'ele'ö göi da'ö. 22 Ba Saulo sa'ae zi möi ba Rama. Ba me irugi mba'a andrö, ba zinga golayama mbasitö andrö, ba hili si lö eueu, ba imane: Heza so Zamueli ba Dawido? Ba lamane: Ba Nayoti, ba Rama, 23 ba me möi ia ba Nayoti, ba Rama, i'otarai da'ö no mege, ba so khönia göi Geheha Lowalangi, ba mama'ele'ö ia ba wowaö-waö, irege irugi Nayoti, ba Rama. 24 Ba iheta nukhania, ba mama'ele'ö föna Zamueli, so manö tou ia ba zalo lö nukha, zi ma'öma'ökhö andrö, ba sara wongi dania. Andrö wa laŵa'ö-ŵa'ö: "Hadia, awö zama'ele'ö göi Zaulo?"
Famotokhi ba gahe edit
Fabaliŵa lala edit
Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö