Wb/nia/Samueli I/20

I. Huhuo Dawido khö Yonata

1 Ba moloi Dawido, iheta ia ba Nayoti, ba Rama, möi ia fahuhuo khö Yonata, imane: Hadia nilaugu? Hadia lalögu? Hadia horögu khö namau, wa i'alu-alui wamunu ya'o? 2 Ba imane khönia Yonata: Böi; lö'ö sa mate'ö! he sebua, ba he side-ide. Hiza, lö'ö sa ilau hadia ia amada, si lö ifarongogö khögu; ba hana wa ibini'ö khögu da'ö amada? 3 Tebai si manö! Ba itema linia Dawido, imane: Lö'ö sa tobini khö namau, wa no somasi ya'o ndra'ugö, ba imane dödönia: Alakha lö irongo Yonata, ma dania i'abus tödö; ba faya sa, wa no sauri Yehowa, awö wa no sauri ndra'ugö, na tenga hatö sambeka ba gotaluama wa'amate! 4 Ba imane Yonata khö Dawido: Hadia ni'andröu, ba u'o'ö khöu. 5 Ba imane Dawido khö Yonata: Mahemolu, ba fasulöna, ba tebai möido manga khö razo, ba efa'ö ndra'o, ena'ö ubini'ö ndra'odo irege bongi. 6 Ba na isofu ndra'o amau, ba ömane: No i'andrö ia khögu Dawido, ena'ö tola isölaisi khöra ba Mbetilekhema, me mame'e sumange andrö si döfidöfi zi sawu ya'ira fefu. 7 Ba na imane: Lau! ba lö angana khö zawuyumö andre; ba na mofönu ia, ba aboto sa'ae ba dödöu, no i'etu'ö ba wamakiko. 8 Ba da'ö ö'oroma'ö wa'omasimö zawuyumö andre: noa sa atö fawu'u li ndra'ugö khö zawuyumö andre, khö Yehowa. Ba na si so horö ndra'o, ba ya'ugö bunudo; hana sa wa ö'ohe ndra'o khö namau? 9 Ba imane Yonata: Böi ömanö dödöu! na urongo sa'ae, no i'etu'ö amada, ba wamakiko ya'ugö, ba hadia, lö ufarongogö khöu? 10 Ba imane Dawido khö Yonata: Ena'ö na so zangombakha khögu, na sofönu dania namau, wanema liu! 11 Ba imane Yonata khö Dawido: Tabu baero ba mbenua! Ba möi ira ba mbenua, darua ira.

II. La'aro'ö wahuwusa

12 Ba imane Yonata khö Dawido: Ya si so ba mbörö Yehowa, Lowalangi Ndraono Gizeraeli: na usekhegö namada, mahemolu, ba na si sökhi dödönia khö Dawido — ba hadia, lö ufatenge khöu, ba lö ufarongogö khöu? 13 Yamulau khö Yonata Yehowa: na no tödö namada, ifakiko ndra'ugö — ba ufarongogö khöu ba ufofanö ndra'ugö, fa böi göna'ö hadia ia, ba itolo'ö Yehowa, si mane fanolonia amada mege. 14 Ba hadia, lö ötolodo göi, na anau na nosogu, lö öhakhösi tödö ndra'o, si mane fa'ahakhö dödö Yehowa andrö, fa böi mate ndra'o? 15 Böi manö bulö'ö wa'ahakhö dödöu ba nga'ötö namada; ba na izara-zara Yehowa wangohori ba guli danö zi fa'udu khö Dawido, 16 ba böi tese'e döi Yonata labe'e si samba omo ndra Dawido, ba yamulau mbalö ba zi fa'udu khö Dawido Yehowa! 17 Ba samuza tö möi ba hölu Yonata khö Dawido, ba wa'omasinia ia andrö; noa sa moroi ba dödö i'omasi'ö ia. 18 Ba imane khönia Yonata: Mahemolu, ba fasulöna, ba la'ila daia, wa lö ya'ugö, na lafaigi ba nahau. 19 Ba ba zi dua wongi, ba abölö itörö tödö, wa lö ya'ugö; ba fa'aso'ö ba zi so'ö no andrö, me lafagönaisi ndra'ugö, ba nibini'öu ya'ugö, ba dadao ba ngai hili-hili danö andrö: 20 ba u'efasi dania nono wana, ba zi dua wongi, ufatörö ba ngai hili-hili andrö, hulö na utalini dandra. 21 Ba ufatenge ndraono, umane: Ae alui nono wana andrö! Ba na umane we'ao ba ndraono andrö: Ya'e furiu nono wana andrö, ohe! ba fuli'ö, lö angana khöu, lö salania, ba wa'aduhu wa'auri Yehowa. 22 Ba na umane khö nono matua andrö: Hiza fönau nono wana! ba labu'ögö, me no Yehowa zamofanö ya'ugö. 23 Ba ba lida andrö, huhuoda, darua ita, ba no Yehowa zi so ba mbörö khöda, irugi zi lö aetu.

III. Fönu Zaulo khö ndra Yonata Dawido

24 Ba ibini'ö ia Dawido, ba mbenua. Ba me fasulöna, ba mudadao razo, ba wemanga, 25 ba nahanahania dumadao razo, si erogö bagolö ba tou dumadao Yonata, ba Abineri, ba ba ngai Zaulo; ba Dawido, ba lö'ö, ba nahania. 26 Ba lö hede-hede Zaulo, me luo da'ö, imane dödönia: Si lö mu'odödögö; no ra'iö ia, me lö nifahaogö'önia ya'ia. 27 Ba sara wongi aefa wasulöna, me lö'ö zui Dawido, ba nahania, ba isofu Saulo khö nononia Yonata: Hana wa lö möi manga nono Giza'i andrö, he menewi, ba he ma'ökhö? 28 Ba itema li Zaulo Yonata, imane: No i'andrö ia khögu Dawido, ba we'amöi ba Mbetilekhema; 29 no imane: Hadia, lö öfa'amöi ndra'o, me mame'e sumange zi sawu ya'aga, ba da'ö, ba mbanuama, ba no laŵa'ö khögu ira ga'agu; na ebua dödöu khögu, ba fa'amöido, ba wamaigi ira talifusögu. Da'ö mbörö, wa lö si möi ia manga khö razo. 30 Ba mofönu Zaulo khö Yonata, imane khönia: He ono horö! U'ila sa, wa no solemba khö nono Giza'i andrö ndra'ugö, fangailau ba fangaila zaila ninau. 31 Götö sa wa'anau noso nono Giza'i ba guli danö, ba lö fakhai khöu, ba he ba wa'arazomö. Ba fatenge, fahalö'ö ia khögu; lö'ö sa tola auri ia. 32 Ba itema li namania Saulo Yonata, imane khönia: Hana wa labunu ia? Hadia horönia? 33 Ba ihandrogö khönia doho Saulo, ena'ö göna khönia. Ba me aboto ba dödö Yonata, no i'etu'ö amania, ibunu Dawido, 34 ba maoso ia, mofönu sibai, iböhöli wemanga, lö i'a gönia, ba zi sambua desa'a andrö; afökhö ae bakha dödönia, börö Dawido andrö, me no itandraŵaisi amania.

IV. Fabali ira Yonata Dawido

35 Ba mahemolu ö, ba ihulö wongi Yonata we'amöi ba mbenua, me inötö niŵa'önia khö Dawido, i'ohe awönia ndraono. 36 Ba imane ba ndraono andrö khönia: Fulöi, alui nono wana andrö, ni'efasigu! Ba me fulöi nono matua andrö, ba i'efasi nono wana Yonata, sanalui ya'ia. 37 Ba me irugi ono matua andrö zaekhu ono wana andrö, ni'efasi Yonata, ba mu'ao khönia Yonata, imane: Hiza, tanö sa fönau! 38 Ba samuza tö mu'ao Yonata khönia: Ta'i-ta'i, böi bato! Ba ihalö nono wana no mege ono matua andrö, ba i'ohe khö zokhö ya'ia. 39 Ba lö'ö sa aboto ba dödö ndraono andrö, ha Yonata ba Dawido zangila eluaha. 40 Ba ibe'e ba danga nono matua andrö khönia wanania Yonata, imane khönia: Ae ohe miyomo! 41 Ba me mangawuli ndraono andrö, ba maoso Dawido, ba ngai hili-hili danö andrö ba ifalögu tou ia ba danö ba medölu ifaöndrö ia, ba fa'ago bawa ira ba faoma mege-ege, irege abölö-bölö sibai wege-ege Dawido 42 Ba imane Yonata khö Dawido: Ae'e, böi busi dödöu: ba zi no möi ita ba hölu, darua ita, ba döi Yehowa, ba lö aefa si so ba mbörö Yehowa, he khöda ba he ba nga'ötöda dania, götö-götö wa'ara.

Famotokhi ba gahe

Fabaliŵa lala

Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö