Wb/nia/Samueli I/26

I. Itohugö igohi Dawido Saulo ba ifuli ihakhösi tödö Zaulo Dawido

1 Ba möi khö Zaulo ba Gibea mbanua Zifi andrö, lamane: Hadia, tenga ba hili Hakhila, ba zinga danö si mate andrö, ibinibini'ö ia Dawido? 2 Ba maoso Zaulo, 3000 i'ohe sabölö, nitutuyu ba Ndraono Gizeraeli, ba lasaŵa misi tou danö si mate Sifi, ba wangalui Dawido ba da'ö. 3 Ba ba hili Hakhila tebato Zaulo, ba zinga danö si mate, ba ngai lala; ba Dawido, ba no i'iagö danö si mate. Ba me irongo, no irugi danö si mate andrö Saulo wolohi ya'ia, 4 ba ifatenge zamauze, ba irongo, wa si ndruhu no so Zaulo. 5 Ba maoso Dawido, isaŵa zi tebato Saulo. Ba me i'ila naha andrö, solombase Saulo, awö gumandra andrö khönia, Abineri, ono Neri — bakha barö göli kureta mörö Zaulo, ba no lafasui ia wemörö awönia andrö — 6 ba imane Dawido khö Ndrawa Kheti andrö, Ahimelekhi, ba khö Gabiza'i, ono Zeruya, talifusö Yoabi: Ha niha zi möi awögu mitou khö Zaulo ba golombaseŵa? Ba imane Abiza'i: Ya'o zi möi awöu mitou! 7 Ba me no larugi ira Dawido Abiza'i, ba zi bongi, ba hiza Zaulo, no mörö bakha barö göli kureta, ba no mutaru'ö ba danö dohonia, tanö ba högönia, ba Abineri ba sato, ba no lafasui ia. 8 Ba imane Abiza'i khö Dawido: No ibe'e ba dangau nemaliu andrö Lowalangi ma'ökhö: ba da'utandro ia ba danö toho andrö, ha samuza, alakha lö mendrua. 9 Ba imane Dawido khö Gabiza'i: Böi bunu ia, ha niha sa zi no mombambaya nibayoini Yehowa lö fotu? 10 Ba imane na Dawido: Ba wa'aduhu wa'auri Yehowa! Lö zi lö mate ia, ma ibözi ia Yehowa ba irugi manö baŵa wa'amatenia, ba ma zui ba wasuwöta tekiko ia. 11 Yamutimba ndra'o Yehowa, fa böi ubabaya nibayoini Yehowa! Ba halö doho andrö tanö ba högönia, awö mako nidanö khönia, ba mofanö ita. 12 Ba i'ohe sa'ae doho andrö, awö mako nidanö, si so tanö ba högö Zaulo, Dawido, ba lalau mofanö, lö sangila ya'ira, lö sanehe, lö si tokea; no ahori mörö ira, me no ihawui ira femörö sabölö-bölö si oroi Yehowa.

II. Fehede Dawido khö ndra Abineri Saulo

13 Ba möi miyefo Dawido, iagö zaröu ma'ifu, zuzu hili, tobali aröu gotaluara. 14 Ba mu'ao ia ba zato andrö, ba khö Gabineri, ono Neri, imane: Hadia, lö ötema li, Abineri? Ba imane Abineri: Ha niha ndra'ugö, si'ao khö razo? 15 Ba imane Dawido khö Gabineri: No sabölö ndra'ugö ae; ha niha zi fagölö-gölö khöu ba Ndraono Gizeraeli? — ba hana wa lö öfaigi-faigi zokhö ya'ugö, razo? Noa sa irugi sanuwö, ba wamunu sokhö ya'ugö andrö, razo? 16 Tenga si sökhi wolaumö andrö. Faya wa no sauri Yehowa, na tenga si mate ami ena'ö, me lö nifaigi-faigimi sokhö ya'ami andrö, nibayoini Yehowa! Ba faigi heza so doho razo ba heza so mako nidanö andrö, si so tanö ba högönia mege! 17 Ba irongo Saulo, wa li Dawido da'ö, ba imane: Hadia, tenga liu da'ö, ya'ugö onogu Dawido? Ba imane Dawido: Ya'ia, sokhö ya'o, razo! 18 ba imane na: Hana wa igohi zawuyunia andre sokhö ya'o? Hadia horögu atö, hadia zi lö sökhi khögu? 19 Ba ena'ö na ifondrondrongo iada'e sokhö ya'o razo niŵa'ö zawuyunia andre! Hadia, Yehowa zamarou ya'ugö ba wa'udusa khögu, ba da lafa'ago'ö khönia zumange; ba na niha zamarou ya'ugö, ba ni'elifi föna Yehowa, me no sanibo ya'odo maökhö, fa böi mo'urakha ndra'o ba nibe'e Yehowa, me laŵa'ö: Labu'ögö, fosumange Lowalangi bö'ö! 20 Ba böi mowöi ba danö ndrogu ba zi no aröu aefa khö Yehowa, me no möi razo Ndraono Gizeraeli, ba wangalui famunu ya'o, si mane na lagohi manu danö ba hili misa!

III. Ifabu'u Saulo lö'ö sa'ae igohi Dawido

21 Ba imane Saulo: Horögu da'ö, fuli'ö, ya'ugö, onogu Dawido, lö'ö sa'ae ufakao'ö, sulö wa no ebua mböli nosogu öŵa'ö. U'ila sa'ae, no nifolau zambö tödö wolaugu ba no ebua sibai horögu! 22 Ba itema linia Dawido, imane: Ba ya'e doho razo; yamöi miyefo ba da'e zamösa, ba wangai ya'ia. 23 Ba Yehowa zanulöni ba zamösana fa'atulönia ba fa lö faröi; noa sa ibe'e ba dangagu ndra'ugö Yehowa, ma'ökhö, ba lö edönado uhalö tangagu wamunu nibayoini Yehowa. 24 Ba si mane fa'ebua mböli nosou khögu ma'ökhö, ya si manö wa'ebua mböli nosogu khö Yehowa, ba yamu'efa'ö ndra'o ba wa'atosasa fefu! 25 Ba imane Saulo khö Dawido: Ya'ahowu ndra'ugö, onogu Dawido: öfalua dania ba si möna ndra'ugö! Ba mofanö Dawido ba ifuli ia ba khöra Saulo.

Famotokhi ba gahe

Fabaliŵa lala

Olayama Samueli I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö