Wb/nia/Samueli II/16

Itandraŵaisi Meriba'ali andrö Siba

I. 1 Ba me no italu'i ma'ifu zuzu hili Dawido, ba hiza Ziba andrö, sawuyu Meriba'ali, samaondragö ya'ia, dua geu khönia kalide, si no mufosela, sonoro balazo, 200 roti, ba 100 nga'örö kue nifaruka bua nagu ba 100 nga'örö nifaruka bua geu bö'ö ba samba nahia nagu. 2 Ba imane razo khö Ziba: Hadia guna da'ö? Ba imane Siba: Kalide andre, ba ena'ö na la'okudo soroiyomo razo, ba roti andre ba bua geu, ba ö genoniu, ba agu andre, ba ena'ö na labadu serege tödö, ba danö si mate. 3 Ba imane razo: Ba heza so nono zokhö ya'ugö mege? Ba imane Siba khö razo: No toröi ba Yeruzalema, me no imane dödönia: Lafuli sa'ae khögu iya'e gamatöröŵa namagu ma'uwu Gizeraeli! 4 Ba imane razo khö Ziba: Ba khöu sa'ae gokhöta Meriba'ali fefu! Ba imane Siba: Mangalulu ndra'o khöu! Ya'ebua dödöu khögu, ya'ugö sokhö ya'o, razo!

I'o'aya Dawido Sime'i

II. 5 Ba me no irugi Mbahuri razo Dawido, ba hiza moroi yomo niha, iwa Zaulo, Sime'i döi, ono Gera; mangelingelifi moroi yomo, 6 ba itebu kara Dawido, ba enoni razo fefu, he ŵa'ae no lafatambai ia niha sato ba saradadu andrö fefu. 7 Mu'ao Zime'i, imane wangelingelifi: Labu'ögö, labu'ögö, si tebai abuso do, si si lö yaŵa! 8 No ilau khöu mbalö ndro zi samba omo ndra Saulo Yehowa, Saulo si no möi'ö fangali razo, ba fa'arazomö andrö, ba no ibe'e khö nonou Abisalomi Yehowa, ba hiza, ba itörö'ö sa'ae famakao, me no si tebai abuso do ndra'ugö! 9 Ba imane Abiza'i andrö, ono Zeruya, khö razo: Hana wa tola i'elifi zokhö ya'o, razo, asu si mate andrö? Damöido mangetu'ö baginia! 10 Ba imane razo: Hana ami khögu, ya'ami iraono Zeruya andrö! Na mangelifi ia, ba na no Yehowa zanguma'ö khönia: Ae elifi Dawido! ba ha niha zi tola manofu: Hana wa ölau zi manö? 11 Ba imane Dawido khö Gabiza'i ba ba genoninia fefu: Na i'alui wamunu ya'odo onogu andrö, nga'ötögu, ba tenga mendrua manö mado Mbeniyami andrö? Böi mitenaŵa ia; hana na mangelifi ia, noa sa Yehowa zanguma'ö khönia. 12 Ma atö inehegö wamakaogu andre Yehowa, ba ma ifatörö khögu wa'ohahau dödö, fangali wangelifi andrö, si göna ndra'o ma'ökhö. 13 Ba mofanö Dawido ba awönia fao, ba fao göi Zime'i, itörö gahe hili, ba mangelingelifi ba wofanö andrö, ba itebu kara Dawido ba ihawui tanö. 14 Ba irugi ndraso Yoridano Dawido, awö zato andrö fefu, si fao khönia, no erege dödö; ba molombase ia ba da'ö.

Möi ba Yeruzalema Gabisalomi ba i'o'ö wamowöhö Gahitofeli andrö ya'ia

III. 15 Ba no irugi Yeruzalema Abisalomi, awö ndra matua Ndraono Gizeraeli fefu; ba awönia göi Gahitofeli. 16 Ba me irugi Gabisalomi si fahuwu khö Dawido no mege, Huza'i, ma'uwu Garakhi, ba imane khö Gabisalomi: Ya'ahowu razo! Ya'ahowu razo! 17 Ba imane Abisalomi khö Huza'i: Hadia da'ö, fa'omasiu zi fahuwu khöu? Hana wa lö möi'ö awö zi fahuwu khöu andrö? 18 Ba imane Huza'i khö Gabisalomi: Lö'ö, khö nituyu Yehowa ba soi andre, Iraono Gizeraeli fefu, ndra'odo, khönia sodo. 19 Ba sambalö na: Ha khö möido enoni? Hadia, tenga khö nononia? Si mane me möidomöido enoni namau mege, si manö we'amöigu enoniu dania. 20 Ba imane Abisalomi khö Gahitofeli: Mifobawa lala khöda, he tawisa! 21 Ba imane Ahitofeli khö Gabisalomi: Ae förö ba ngai ndronga namau, donga ba döi andrö, niröinia furi, awö nomo, ba larongo mötö Iraono Gizeraeli fefu, wa no aböu döimö khö namau öbe'e, ba abe'e dödö zolemba khöu, fefu. 22 Ba lalau nose khö Gabisalomi, yaŵa be dete nomo, ba möi mörö ba ngai ndronga namania Gabisalomi, donga ba döi andrö, ba zanehe Ndraono Gizeraeli fefu. 23 Hadia niŵa'ö Gahitofeli andrö, me luo da'ö, ba no hulö nisofu khö Lowalangi — si manö wa'afaduhu dödö ndra Dawido Abisalomi khö Gahitofeli.

Famotokhi ba gahe

Fabaliŵa lala

Olayama Samueli II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö