Wb/nia/Samueli II/12
Itegu Dawido Natano, niŵa'ö Yehowa khönia. Fangesa dödö Dawido edit
I. 1 Ba lö omasi Yehowa nilau Dawido, ba ifatenge khö Dawido Natano andrö, sama'ele'ö. Ba möi yomo khönia da'ö, ba imane khönia: So niha föna, darua, ha sambua mbanuara, so'ana'a zi samösa, ba si numana zi samösa. 2 Ba khö zo'ana'a andrö, ba oya sibai mbiri-biri ba saŵi, 3 ba ba zi numana andrö, ba lö hadia ia, ha si'ai sara nono mbiri-biri, ni'ölinia ba ni'e'ebuania, ebua ia khönia, si faedo ononia. I'a wöfö gönia ba i'amadugö mako khönia, ba gahetania mörö ba timba nono alawe khönia. 4 Ba so dome zo'ana'a andrö, ba alimagö khönia, ihalö zageu mbiri-birinia ba ma saŵinia, ba wame'e ö domenia andrö, si no möi khönia, ba ihalö nono mbiri-biri zi numana andrö ba ibe'e ö domenia. 5 Ba mofönu sibai Dawido ba niha andrö, ba imane khö Natano: Ba wa'aduhu wa'auri Yehowa, niha andrö, solau da'ö, ba nibunu, 6 ba ono mbiri-biri andrö, ba mewitu i'ali, me no ilau da'ö ba me lö fa'ahakhö dödönia![1] 7 Ba imane Natano khö Dawido: Ya'ugö niha andrö! Da'ö niŵa'ö Yehowa, Lowalangi Ndraono Gizeraeli: No ya'odo zamayoini razo Ndraono Gizeraeli ya'ugö ba no ya'odo zangefa'ö ya'ugö ba danga Zaulo, 8 ba no ube'e khöu gödo zokhö ya'ugö mege, ba ira alawe zokhö ya'ugö, ba no ube'e khöu, nitalagui; ba ma'uwu Gizeraeli ba ma'uwu Yuda, ba no ube'e barö mbawau, ba na ambö na da'ö ena'ö, ba unönö na wame'e khöu, hadia ia na. 9 Ba hana wa ö'ositengagö li Yehowa ba hana wa ölau zi fatuwu khönia? Uria andrö, ma'uwu Kheti, ba no öbunu si'öli, ba fo'omonia ba no öhalö dongau, ba ya'ia, ba no öbunu si'öli Ndraono Gamoni.[2] 10 Ba böi sa'ae yamuböhöli zi samba omo ya'ami si'oli, götö-götö wa'ara, fotu, me no lö ba dödöu ya'o, ba me no öhalö dongau wo'omo Guria andrö, ma'uwu Kheti![3] 11 Imane Yehowa: Moroi yomo khöu u'asogö wamakao ya'ugö, ba uhalö ngambatöu, ba zanehe ndra'ugö, ba ube'e ba danga niha bö'ö, ena'ö orudu ia khöra, ba zi moluo.[4] 12 Ya'ugö, ba no ba zi tobini ölau da'ö, ba ya'odo, ba ba zanehe Ndraono Gizeraeli fefu ba ba zi moluo ulau niŵa'ögu andre! 13 Ba imane Dawido khö Natano: Horögu da'ö khö Yehowa. — Ba itema li Dawido Natano, imane: Ba noa göi i'efa'ö khöu horöu Yehowa; lö mate ndra'ugö. 14 Ba me no ö'o'aya Yehowa ba nilaumö andrö, ba si mate nono andrö, si no tumbu khöu.[5]
Mate nono Mbaseba andrö ba he wisa Dawido ba da'ö. Fa'atumbu Zelomo edit
II. 15 Ba mangawuli khöra Natano. Ba ibözi nono andrö Yehowa, ono wo'omo Guria andrö khö Dawido, ba mofökhö. 16 Ba i'angaröfi li Lowalangi Dawido ba nono andrö, ba mamoni ba gö ia ba möi ia si bakha, ba tou ba zalo manö so ia, sara wongi. 17 Ba möi khönia zatua baomonia, ba wangandrö khönia, ena'ö maoso ia, ba lö i'o'ö ba lö manga ia awöra. 18 Ba önö bongi, ba mate nono andrö. Ba ata'u genoni Dawido andrö, la'ombakha'ö khönia, wa no mate nono andrö, lamane dödöra: Lö'ö sa ifondrondrongo khöda, me auri na nono, me humede ita khönia, ba he tawisa wangombakha khönia: No mate nono, ma dania ilau hadia ia. 19 Ba i'ila Dawido, me fangöngö-ngöngö genoninia andrö; ba da'ö aboto ba dödönia, wa no mate nono. Ba imane Dawido ba genoninia andrö: Hadia, no mate nono? Ba lamane: Noa. 20 Ba maoso Dawido, isasai mbawania, ibayoini ia fanikha ba ifohani ia. Ba möi ia ba nose Yehowa mangalulu ia, ba ifuli ia ba nomonia mangandrö gö; ba me no lahalö gönia, ba manga ia. 21 Ba lasofu khönia enoninia andrö, lamane: He wisa wolaumö andrö, ba khö nono andrö? Me auri ia na, ba mamoni ba gö ndra'ugö, ba mege-ege'ö — ba iada'e, me no mate nono, ba maoso ndra'ugö ba manga'ö! 22 Ba imane: Fatua auri na nono, ba mamoni ba gö ndra'o ba mege-egedo, me no umane dödögu: Ha zangila, ma dania ahakhö dödö Lowalangi, fa böi mate nono andrö. 23 Ba iada'e, me no mate ia, ba hadia, wa mamoni ba gö ndra'o? Hadia, u'ila u'orifi? Möido sa khönia dania, ba lö'ö sa ifuli ia khögu. 24 Ba me no irara dödö wo'omonia Baseba andro Dawido, ba möi ia si bakha khönia, orudu ia khönia. Ba mo'ono ia, ono matua. Ba Selomo ibe'e töi nono andrö Dawido; ba i'omasi'ö Yehowa nono andrö. 25 Ba ibe'e rorogöfö Natano, sama'ele'ö andrö, Dawido, ba ibe'e töinia Yedidiya (omasiö Yehowa) Natano, börö Yehowa.
Atu'a Dawido ba Raba andrö edit
III. 26 Ba isuŵosuwö Raba, banua Ndraono Gamoni, Yoabi, ba atu'a ia ba mbanua nidanö andrö.[6][7] 27 Ba ifatenge zinenge khö Dawido Yoabi, imane khönia: No usuwö Raba ba no atu'a ndra'o ba mbanua nidanö andrö — 28 ba owuloi zi tosai sabölö, ba suwö mbanua andrö, ba ya atu'a ndra'ugö, fa böi ya'o zatu'a ba mbanua ba fa böi töigu nitötöi, na lafatunö. 29 Ba i'owuloi khönia zabölö fefu Dawido, ba lasaŵa Raba, lasuwö, ba atu'a ira. 30 Ba ihalö zaembu ba högö [nadu] Milikomo, 49 kilo [ana'a] wa'abua, si so mani-mani, sambua, sebua sibai böli. Ba i'anaembu Dawido, ba ebua sibai la'ohe misa, sahulu ira ba mbanua andrö. 31 Ba la'ohe göi niha andrö, si so ba mbanua, ba ifataro sogaragazini eu ba samaku tanö ba solau eu ba samazökhi kara tembo. Ba si manö göi wolaunia ba mbanua Ndraono Gamoni bö'ö, fefu. Ba mangawuli ba Yeruzalema Dawido, awö zato fefu.
Famotokhi ba gahe edit
Fabaliŵa lala edit
Olayama Samueli II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö