Wb/nia/Samueli II/10

I'o'aya zinenge Dawido razo Ndraono Gamoni

I. 1 Ba aefa da'ö, ba mate razo Ndraono Gamoni, ba fangalinia razo, ba ononia Hanuno. 2 Ba imane Dawido: Da u'oroma'ö wa'ebua dödögu khö Hanuno andrö, ono Nahasi, si mane fa'ebua dödö namania mege khögu. Ba ifatenge khönia Dawido, ena'ö larara dödö Hanuno enoni Dawido andrö, ba khö namania. Ba me larugi danö Ndraono Gamoni sinenge Dawido, 3 ba lamane satua Ndraono Gamoni khö razora Hanuno: Hadia, faduhu dödöu, wa sumange namau khö Dawido wamatengenia khöu sondrara tödöu? Faya na tenga ba wamauze banua ifatenge khöu genoninia Dawido, ba wamauze ua ba ba wanudugö dania. 4 Ba ifara'u'ö zinenge Dawido Hanuno, tambai ifatöwö'ö gambira ba barura, ba lafalo'ö irege ba daro'ö, ba ifatenge mangawuli ira. 5 Ba me te'ombakha'ö da'ö khö Dawido, ba ifatenge zamaondragö ya'ira — noa sa mu'o'aya sibai ira — imane khöra Dawido: Mi'iagö Yerikho, irege ifuli anau gambimi, ba awena dania mifuli ami.

Fasuwö ira. Abölö Dawido

II. 6 Ba me aboto ba dödö Ndraono Gamoni, wa no abao dödö Dawido khöra, ba lafatenge, la'oni Ndrawa Garamo ba Mbeti Rehobo ba Dawa Garamo ba Zoba, 20.000 zabölö, si lö kudo, awö razo Ma'akha ba banua Gisitoba, 12.000. 7 Ba me irongo da'ö Dawido, ba ifatenge Yoabi, awö zabölö fefu, saradadu andrö. 8 Ba so moroi yomo Ndraono Gamoni, la'angenoligö ira fönaföna mbawa göli mbanua, ba Dawa Garamo no mege, banua Zoba ba banua Rehobo ba banua Gisitoba ba banua Ma'akha, ba baero ba mbenua la'iagö. 9 Ba me i'ila Yoabi, faoma dania lalau khönia, he moroi föna, ba he moroi furi, ba ituyu zabölö ba nono matua Ndraono Gizeraeli fefu, ba i'ohe, ba wamaondragö Dawa Garamo andrö. 10 Ba si tosai, sato, ba ibe'e ni'ohe nakhinia Abiza'i, ba wolau ba Ndraono Gamoni. 11 Ba ibe'e li ba da'ö, imane: Na tebai ulaŵa Ndrawa Garamo, ba möi'ö manolo ya'odo; ba na tebai ölaŵa Ndraono Gamoni, ba so ndra'o, ba wanolo ya'ugö. 12 Abe'e'ö dödöu ba ena'ö faoma abe'e ita, ba wangorifi banuada ba banua Lowalangida andrö — ba yamulau zomasi ia Yehowa! 13 Ba ifaondragö Ndrawa Garamo Yoabi, ba wolau khöra, i'ohe zabölö andrö, si fao khönia, ba moloi Ndrawa Garamo ibe'e. 14 Ba me la'ila Iraono Gamoni moloi Ndrawa Garamo andrö, ba moloi göi ira föna Gabiza'i, lawuwu ira miyomo ba mbanua. Ba iböhöli Ndraono Gamoni Yoabi, ifuli ia ba Yeruzalema. 15 Ba me la'ila Dawa Garamo andrö, no te'ala ira labe'e Iraono Gizeraeli, ba la'owuloi ira, 16 ba ifatenge Hadadezeri, ifakaoni'ö Ndrawa Garamo yefo Oifarati. Ba larugi Helami, ba solohe ya'ira, ba Sobakhi, kumandra andrö khö Hadadezeri. 17 Ba me te'ombakha'ö da'ö khö Dawido, ba i'owuloi Ndraono Gizeraeli fefu, ba la'ötö Yoridano ba larugi Helami. Ba lafaondragö Dawido Dawa Garamo, fasöndra khönia. 18 Ba moloi Ndrawa Garamo labe'e Iraono Gizeraeli, ba labunu ira Dawido kudo Ndrawa Garamo, 700, kudo sondröni kureta, ba 40.000 niha nibunu; ba mesokho göi gumandrara Sobakhi, labe'e, ba mate ia ba da'ö. 19 Ba me la'ila razo andrö fefu, si so barö mbawa Hadadezeri, no te'ala ira labe'e Iraono Gizeraeli, ba la'atulö'ö ira ba Ndraono Gizeraeli, möi barö mbawara, ba ata'u sa'ae Ndrawa Garamo, latolo na Ndraono Gamoni.

Famotokhi ba gahe

Fabaliŵa lala

Olayama Samueli II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö