Wb/nia/Nga'ötö II/32

Isuwö ira Saneribi andrö

I. 1 Ba me aefa da'ö, fa'atarö dödö Hisikia [ba zi sökhi], ba so moroi sa Zaneribi, razo Asiria. Isaŵa danö mado Yuda ba isuwö mbanua saro, ena'ö na atu'a ia dödönia. 2 Ba me i'ila Hisikia, so moroi sa Zaneribi, ba wanuwö Yeruzalema, 3 ba mamagölö ia ba zatua mbanua andrö khönia, ena'ö na labunu hele baero mbanua; ba latolo ia [ba da'ö]. 4 Ba ato zowulo niha, ba wamunu hele, awö mbombo andrö, sanörö tanö andrö, lamane: Hana wa tabe'e lö ambö idanö khö ndra razo Asiria, na so ira? 5 Ba i'abe'e'ö dödönia [Hisikia], ba i'a'azökhi zaukha göli kara, fefu; möi ia ba malige andrö ba ba göli tanö baero, ba i'aro'ö Milo andrö ba mbanua Dawido, ba oya ifafazökhi'ö ono wana ba baluse. 6 Ba ifataro gumandra, solohe sato; ba ifalukha'ö khönia da'ö, ba newali, fönaföna mbawa göli, ba ihaogö wehedenia khöra, imane: 7 Mi'abe'e'ö dödömi, böi mangiwa! Böi mi'abusi tödö ba böi mibe'e nikeani razo Asiria ami; ba he ba zato sibai andrö ni'ohenia, ba böi tokea ami! Me no ebua nawöda, moroi ba nawönia. 8 Awönia, ba fa'abölö niha, ba awöda, ba Lowalangida Yehowa, ba wanolo ya'ita, ba ena'ö ya'ia zi fasuwö salahida!

Fayaŵasa zinenge Zaneribi

II. 9 Ba ifatenge genoninia Saneribi, razo Asiria (ba ya'ia, ba sanuwö Lakhisi, awö zato andrö khönia), ifatenge ba Yeruzalema, khö Hisikia razo mado Yuda, ba ba mado Yuda fefu, ba Yeruzalema, imane khöra: 10 Da'ö niŵa'ö Zaneribi, razo Asiria: Hadia dötönafömi, wa mi'iagö manö Yeruzalema, na lasasagö ami? 11 Si ndruhu, Hisikia andrö zamowöhö ya'ami, ena'ö ibe'e mate olofo ba mate owökhi dödö ami, wanguma'ö: I'efa'ö dania ita ba danga razo Asiria Lowalangida Yehowa! 12 Hadia, tenga Hisikia da'ö göi zanudugö mege hili-hili andrö khönia, fabaya naha wame'e sumange, ba sanguma'ö ba mado Yuda ba ba mbanua Yeruzalema: Ha sambua naha wame'e sumange, sangalulu ami, ba ha ba da'ö mitunu zumange? 13 Hadia, lö nirongomi he mawisa ba niha baero fefu misa, ira amagu ndra'aga? He wisa Lowalangi niha baero andrö, ba danöra misa, hadia no la'ila la'efa'ö ba dangagu danöra andrö? 14 Ha niha ba Lowalangi niha andrö fefu, nihori ndra amagu, zangila mege i'efa'ö ena'ö ba dangagu mbanuania, wa iefa'ö ena'ö ami göi ba dangagu Lowalangimi andrö? 15 Ba böi sa'ae mibe'e nifowöhö Hisikia ami, böi yamufaelungu ami ba zi manö! Böi mifati linia! Lö'ö sa Lowalangi ba niha fefu ba ba zalaŵa, heza, sangila mangefa'ö ba dangagu banuania, ba he ba danga ndra amagu mege; ba lö'ö göi i'efa'ö ami ba dangagu Lowalangimi andrö. 16 Ba latohugö na wanandraŵai si Lowalangi, Yehowa, ba enoninia Hisikia sinenge Zaneribi andrö. 17 Ba sura göi ifa'ohe'ö, ba wanandraŵaisi Yehowa, Lowalangi Ndraono Gizeraeli, ba ba wamöbögö khönia hadia ia, imane: Si mane Lowalangi niha baero andrö, si tebai mangefa'ö ba dangagu banuara, si manö göi Lowalangi Hisikia andrö, wa tebai i'efa'ö ba dangagu mbanuania. 18 Ba mu'ao ira [sinenge no mege] ba mbanua Yeruzalema andrö, si so ba dete göli kara, la'ebua'ö lira, li Ndraono Gizeraeli, ba wameta'u ya'ira, ena'ö tokea ira, ba ena'ö möi ba dangara [ba danga zanuwö] mbanua. 19 Itörö lira Lowalangi Yeruzalema andrö, lafaomagö ba Lowalangi niha baero andrö, nifazökhi danga niha.

Fanolo Lowalangi

III. 20 Ba me mangandrö razo Hisikia, awö Yesaya sama'ele'ö, ono Gamosi, börö da'ö no mege, me la'angaröfi li Yehowa, 21 ba ifatenge mala'ika Yehowa, sangohori sanuwö fefu, awö zolohe ya'ira, awö gumandra, ba nahia razo Asiria; ba tobali ifuli ia ba danönia, no tehawu ia fa'aila. Ba me möi ia ba gosali Lowalanginia, ba so ndraononia, ba labunu ia si'öli 22 Si manö wangefa'ö Yehowa Hisikia ba banua Yeruzalema ba danga Zaneribi, razo Asiria, ba ba danga danö bö'ö fefu, ba lö'ö sa'ae hadia ia khöra, fasui manö, ibe'e. 23 Ba ato zolohe ba Yeruzalema buala khö Yehowa, ba khö Hisikia, razo ba Yeruzalema, ba gama-gama sebua böli labe'e. Ba razo sebua ia, me aefa da'ö, wamaigi niha baero fefu.

Fökhö Hisikia ba fa'amatenia

IV. 24 Ba me luo da'ö, ba mofökhö Hisikia, fökhö fanunu. Ba mangandrö ia khö Yehowa. Ba humede khönia Yehowa ba ibe'e khönia dandra, sahöli-höli dödö. 25 Ba lö isulöni Hisikia nilau khönia, fa'ahakhö dödö andrö, fayaŵa ia; andrö wa tohare khönia wönu, fönu sabölö-bölö, khönia ba ba mado Yuda, ba ba mbanua Yeruzalema. 26 Ba mangalulu Hisikia, me no fayaŵa dödönia; andrö wa lö itörö ira na fönu Yehowa, fönu sabölö-bölö andrö, ba götö Hisikia. 27 Ba no ebua sibai gana'a Hisikia, ba no sabölö sibai ia. No ilau khönia mbate'e girö-girö, firö ba ana'a ba mani-mani ba rembaremba ba baluse ba hadia ngawalö gama-gama na, sebua böli, 28 ba omo ba nihöna hadia ia ilau, nahia mbua nowi ba agu ba fanikha; ba he kandra ngawalö gurifö, ba ilau göi, ba kandra mbiri-biri, ba mbenua. 29 Ba banua itaru'ö ba no oya sibai khönia gurifö, biri-biri ba saŵi; noa sa i'ebua'ö gana'ania Lowalangi. 30 Da'ö Hisikia andrö somba'a ungo nidanö Gihona si yaŵa, samatörö mitou ba ba mbanua Dawido, tanö ba gaekhula luo; ba hadia ia fefu, nilau Hisikia, ba mofozu. 31 Ba me so zinenge andrö, nifatenge razo Mbabeli khönia, ba wanofu tandra andrö sahöli-höli dödö, ba danö mege, ba ilulu Hisikia Lowalangi, ba wanandraigö ya'ia, ena'ö oroma fefu hadia ia zi so ba dödönia bakha. 32 Ba bö'önia hikaya Hisikia andrö, ba hadia ia nilaunia si sökhi, ba no mutanö ba zura wama'ele'ö andrö khö Yesaya sama'ele'ö, ono Gamosi, ba ba zura razo mado Yuda ba ba zura razo Ndraono Gizeraeli. 33 Ba mate Hisikia, itörö lala ndra amania, ba ba lewatö ma'uwu Dawido lako'o ia, tanö miyaŵa; ba lafosumange ia ba wa'amatenia mado Yuda fefu ba banua Yeruzalema. Ba fangalinia razo, ba ononia Manase.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö