Wb/nia/Nga'ötö II/26

Usia, razo somasi Lowalangi, ba sofozu wolaunia

I. 1 Ba lahalö Usia andrö niha sato ba danö, ba lafataro razo ia, fangali namania Amasia, he ŵa'ae ha meweleönö fakhe na wa'ebuania. 2 Da'ö zangaro'ö Eloto, ifuli ihalö banua mado Yuda, me no mate razo [amania]. 3 Meweleönö fakhe wa'ebua Usia andrö, me tobali razo ia, ba 52 fakhe razo ia ba Yeruzalema. Ba töi ninania, ba Yekholia, banua Yeruzalema. 4 Ba somasi Yehowa ilau, i'ohia'ö sibai nilau namania Amasia mege. 5 I'alu-alui zi lö aefa ia khö Lowalangi, götö wa'anau noso Zakharia andrö, samahaö ba wangata'ufi Lowalangi; ba fatua lö iböhöli Yehowa, ba mofozu nilaunia ibe'e Lowalangi. 6 Möi ia musuwö Ndrawa Wilisiti, idudugö göli Gata ba öli Yabene ba öli Gasoto ba itaru'ö mbanua ba ngai Gasoto ba heza na ba danö Ndrawa Wilisiti. 7 Ba itolo ia Lowalangi ba Ndrawa Wilisiti ba ba Ndrawa Ara andrö, ba Guri-Mba'ali ba ba mbanua Moini andrö. 8 Ba Iraono Gamoni göi, ba mame'e beo khö Usia, ba irugi danö Miserayi, ba terongo duriania, me no sabölö sibai ia. 9 Ba ilau malige Usia, ba Yeruzalema, ba mbawa göli ba watalinga ba ba mbawa göli ba ndraso ba ba zanalinga si'u, ba i'a'aro'ö. 10 Ba ilau göi malige ba danö si mate, ba oya ifakhao'ö ba'a. Me no oya sibai gurifö khönia he ba ndraso, ba he ba zalo'o, ba sonowi khönia ba tuka kabu nagu, he ba hili, ba he ba danö nowi ba zalo'o; me no somasi fangahalö ia. 11 Ba ato khö Usia sabölö, ato sibai na möi fasuwö; ha wa'ato ni'ofaya durutuli andrö, Yeieli, ba kumandru andrö, Ma'aseya, barö mbawa Hanania, kumandru sebua khö razo. 12 Fa'ato högö ngafu andrö, niha sabölö, ba no 2.600. 13 Da'ö zolohe sato, 307.500, sabölö sibai ba wasuwöta, ba wanolo razo ba nemali. 14 Khöra fefu ifaigi wangöna Usia: baluse ba toho ba tetenaulu ba öröba ba kara riboribo. 15 Ba ifafazökhi'ö na nekhe-nekhe fana ba Yeruzalema, nibe'e ba malige andrö, ba ba watalinga göli; ba wamazaumba ono wana ba kara sebua. Ba aröu misa humöngö duriania, me no sahöli-höli dödöda wanolo [Yehowa] ya'ia, irege sabölö sibai ia.

Fayaŵasania. Göna bou auri ia ba mate ia

II. 16 Ba me no sabölö sa'ae ia, ba fayaŵa dödönia, famakiko, ba mosala ia khö Lowalanginia Yehowa; möi ia ba gosali Yehowa, ba wanunu kumöyö ba naha wanunu. 17 Ba la'o'ö ia Asaria ere andrö, awö gere bö'ö, 80, ere Yehowa, sadölö tödö. 18 Latenaŵa razo Usia, lamane khönia: Tenga halöŵöu wanunu kumöyö khö Yehowa, ya'ugö Usia, halöŵö gere nga'ötö Ga'aroni da'ö, ere si no mu'amoni'ö ba wanunu kumöyö. Heta'ö ba ni'amoni'ö andre, no mosala ndra'ugö; tenga fangebua döimö khö Yehowa, Lowalangi! 19 Ba mofönu Usia, naha gumöyö ba dangania, ba wanunu. Ba barö wofönunia ba gere andrö, ba tumbu ba gangangonia mbou auri, ba zanehe gere andrö, ba gosali Yehowa, ba ngai naha wanunu kumöyö. 20 Ba me lanehegö ia Asaria, ere sebua ba ere andrö fefu, ba hiza, ba no mobou auri ia ba gangango. Ba lafangaösö ia, lafofanö, ba ya'ia göi, ba aösö we'amöi baero, me no ibözi ia Yehowa. 21 Ba sobou auri razo Usia, irugi mate ia; ba yomo so ia si no tonia, sobou auri; lö'ö sa tola möi ia ba gosali Yehowa. Ba satua baomo ba gödo, razo, ba ononia Yotamo, ya'ia göi zamatunö huhuo niha ba danö. 22 Ba bö'önia hikaya Usia, he famobörö, ba he safuria andrö, ba no Yesaya sama'ele'ö, ono Gamosi, zanura. 23 Ba mate Usia, itörö lala ndra amania, ba ba ngai ndra amania lako'o ia, ba mbenua, ba ngai lewatö razo; lamane sa: Sobou auri! Ba fangalinia razo, ba ononia Yotamo.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö