Wb/nia/Nga'ötö II/3

Folau osali

I. 1 Ba ibörötaigö Selomo wolau osali Yehowa andrö ba Yeruzalema, ba hili Moriya andrö, ba ni'oroma'ö Yehowa ya'ia khö namania Dawido, ba naha andrö ni'asiwai Dawido, ba goloyama mbasitö khö Gorana, Iraono Yebusi. 2 Ba zi mendrua ba mbaŵa si dua, ibörotaigö wotomo andrö, me no alua medölu fakhe razo ia. 3 Ba da'e nifakhoi Zelomo, ba wolau osali Lowalangi andrö: Fa'anau, ba 60 hela — ba hela föna —, ba fa'ebolo, ba 40 hela. 4 Ba ewe'ewe föna nösi nomo, nifo'oto'oto, sebua ba 10 hela wa'ebolo, ba fa'anaunia, ba mbawa duasa nomo, ba 20 hela, ba fa'alaŵa, ba 20 hela [göi]. Ba tanö bakha, ba ifo'uli si ndruhu mbalaki. 5 Ba si hulö dalu zalo, ba ibagolöi bagalö senobari, ba awena ifo'uli balaki ba ifasua'ö wamaedo nohi ba si hulö rate. 6 Ba ifoadu feremata; ba ana'a andrö, ba ana'a Warawa'i. 7 Ba ifo'uli sa'ae baulu, ana'a, he buatö, ba he högö ba toyo mbawandruhö, ba he bagolö ba he lagö mbawandruhö, ba ifasua'ö wamaedo kerubi, ba mbagolö.

Fondrege ni'amoni'ö, kerubi, ba'a-ba'a ba taru nahe

II. 8 Ba i'oniagö wondrege ni'amoni'ö andrö; fa'anaunia, ba 20 hela, dali mbolo nomo, ba fa'ebolonia, ba 20 hela göi, ba ifo'uli balaki, 2.382.300 balaki. 9 Ba fa'abua gosö'osö, ba 50 fondruyu ana'a. Ba he bate'e ba zi sagötö, ba ifo'uli ana'a. 10 Ba si bakha ba wondrege ni'amoni'ö andrö, ba ifalau'ö kerubi, dombua, nilau duka wamaedo niha, ba ifo'uli ana'a. 11 Afi kerubi andrö, ba 20 hela wa'anau, ba wa'orudu; si sara, si 5 hela, ba irugi mbagolö nomo, ba si sara, si 5 hela göi, ba irugi mbute gafi kerubi si sambua. 12 Ba si manö gafi si sara, ba kerubi si sambua, 5 hela göi, ba irugi mbagolö; ba afinia si sara, si 5 hela göi, ba irugi mbute gafi kerubi si sambua. 13 Fa'anau gafi kerubi andrö, nibologö, ba 20 hela. Ba no sizizio ira ba la'otahögö nösi nomo. 14 Ba ifalau'ö mba'a-ba'a andrö, ungu sowu waruwaru ba soyo, ba kirimisi ba tarafali, ba ifofamaedo kerubi. 15 Ba föna nomo, ba dua ifalau'ö taru nahe, 35 hela wa'alaŵa, ba limalima hela högö si yaŵa. 16 Ba ifalau'ö zi hulö rate nibe'e ba högö daru nahe andrö; ba 100 ifalau'ö famaedo mbua dalimo, nibe'e ba rate andrö. 17 Ba taru nahe andrö, ba ba mbawa duasa gosali ifasindro, sara ba gambölö, ba sara ba gabera; si so ba gambölö, ba Yakhino ibe'e töi, ba ba gabera, ba Boasi.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö