Wb/nia/Nga'ötö II/11

Tetenaŵa Rehabeamo ba wanuwö Iraono Gizeraeli. Banua saro khönia

I. 1 Ba me no irugi Yeruzalema Rehabeamo, ba ifakaoni'ö mado Yuda, awö mado Mbeniyami, 180.000 zabölö, nitutuyu, ba wanuwö Iraono Gizeraeli, ena'ö mangawuli khö Rehabeamo wa'arazo. 2 Ba humede Yehowa khö Zemaya, enoni Lowalangi, 3 imane: Hede khö Rehabeamo, ono Zelomo, razo mado Yuda, ba ba Ndraono Gizeraeli, ma'uwu Yuda ba ma'uwu Mbeniyami, 4 ömane: Da'ö niŵa'ö Yehowa: Böi mi'ae'e, ba wanuwö talifusömi; yamufuli ia khöra zamösana, me no ya'o zanguma'ö, wa si manö. Ba me larongo niŵa'ö Yehowa, ba lafuli ira, lö alua möi ira manuwö Yerobeamo. 5 Ba i'iagö Yeruzalema Rehabeamo. Ba i'aro'ö ösa mbanua ba danö mado Yuda; 6 ya'ia Mbetilekhema ba Etama ba Tekoa, 7 ba Beti Zuri ba Sokho ba Adula, 8 ba Gata ba Maresa ba Sifi, 9 ba Adora'i ba Lakhisi ba Aseka, 10 ba Sorea ba Ayalona ba Heberona, banua ba mado Yuda ba ba mado Mbeniyami, ibali'ö banua saro. 11 Aro sibai mbanua saro andrö ibe'e, ba ifataro gumandra, ba ihöna gö, ba fanikha ba agu, 12 ba idozigö banua andrö baluse ba toho, ba i'aro'ö sibai. Ba no khönia mado Yuda, awö mado Mbeniyami.

Lasaŵa Yeruzalema ere ba Ono Lewi

II. 13 Ba ere ba Ono Lewi si so ba Ndraono Gizeraeli heza, ba so moroi ba danö heza, ba la'oro'ö ira enoninia. 14 Laröi mbenuara ba hadia ia zi so khöra ere andrö, ba lasaŵa danö mado Yuda ba Yeruzalema. Noa sa latibo'ö ira Yerobeamo ba ononia, fa böi sa'ae mo'ere ira föna Yehowa. 15 Ba no ifataro khönia gere Yerobeamo, ere ba hili-hili andrö, ba ba wamaedo nambi si matua ba ba wamaedo nono zaŵi andrö, nifafazökhi'önia. 16 Ba moroi ba mado Ndraono Gizeraeli fefu, ba fao khö ndra Rehabeamo zi so ba dödö wangalui Yehowa, Lowalangi Ndraono Gizeraeli. Lasaŵa Yeruzalema, ba wame'e sumange khö Yehowa, Lowalangi ndra tuara. 17 Ba abölö nöri mado Yuda labe'e, ba aro Rehabeamo, ono Zelomo, medölu fakhe, me no sanörö lala ndra Dawido Selomo ira, medölu fakhe wa'ara.

Ngambatö Rehabeamo ba ononia

III. 18 Ba Rehabeamo, ba ihalö Mahalata, ono Yerimoto ono Dawido; Abihaila, ono Geliabi ono Giza'i ninania; 19 ba mo'ono da'ö khönia, ono matua, Ye'usi ba Semaria ba Sahama. 20 Ba ihalö na göi Ma'akha, ono Gabisalomi; ba mo'ono da'ö khönia, Abia ba Ata'i ba Sisa ba Selomiti. 21 Ba abölö i'omasi'ö Ma'akha, ono Gabisalomi, Rehabeamo, moroi ba wa'omasinia ndrongania bö'ö, awö ndrongania ba döi; 18 sa nihalönia ira alawe, ba 60 ndrongania ba döi, ba 28 nononia matua ba 60 nono alawe. 22 Ba Abia andrö, ono Ma'akha, ba ibe'e amaedola zatua baomo amania Rehabeamo, ibe'e högö dalifusönia, ibali'ö razo dania ia, dödönia. 23 Onekhe Rehabeamo, ifosasi nononia ösa, ifataro ba danö mado Yuda ba ba danö mado Mbeniyami misa, ba mbanua saro andrö fefu; itaha mbalazora, si lö ambö, ba oya ihalö khöra ira alawe.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö