|
Ashan ne Venezuelajchanejket yawit kishpejpenat se yankwik tatuktiani ipal ne kalpuli. Nikan tik Yajyankwik Tik Nawat tiawit tinat tay tikmatit ipanpa ne teishpejpenalis.
Melka nemit chikume candidatoj, mumati ka sema ume ne welit kisat: Nicolás Maduro wan Henrique Capriles.
Maduro katka ne ipatka-achtumutaliani (vicepresidente) itan Hugo Chavez wan muchiwki achtumutaliani kwak mikik Chavez tik ne Metzti Yey.
Capriles kipuluj ne teishpejpenalis ipal ne shiwit panutuk, kwak mukwepki kisa Chavez.
Chavez inak ka kinekituya ma wiki Maduro ka iipan ken tatuktiani ipal Venezuela, wan Maduro kinhilwia ne Venezuelachanejket tik ini campañaj ka yaja senpa kielnamiki Hugo Chavez wan yawi kichiwa ken yajuni kinekituya ma muchiwa.
Capriles ina ka su kinekit se tapatalis, ma kishpejpenakan yajasan. Ina ka yawi kiyektia ne inseguridad wan yawi kipalewia ne economiaj.
Ini ne ume wejwey tay kinkakasuat ne Venezuelajchanejket: ne criminalidad wan ne takwal. Ne inhumeshtin tajtaketztiwit inpanpa ini tik ne campañaj. Miak takat wan siwat mumiktijtiwit. Capriles ina ka ne kalpuli ipal Chavez kipia ne culpaj. Ipal Maduro, ne culpaj ipal ne capitalismoj wan ne prensaj. Ipanpa ne economiaj, ina Capriles ka itan Chavez nentuk wey inflacion wan te kanaj takwal tik ne tiajtiankis. Maduro ina ka ne culpaj ipal ne especulacion: ne kipiat wey tumin kikuat wey wan kianat, wan ne te kipiat wey tumin te kipiat taiwan panut.
Ká yawit teishpejpenat?
edit
19 millon tukniwan welit teishpejpenat.
Tik ne tipan teishpejpenalis (ne kipuluj Chavez, ne ashan miktuk), ne 80% ipal ne tukniwan yajket teishpejpenat. Wan ashan? Tiawit tikitat keski yawit teishpejpenat.
Uni tay tikmatit, wan tiawit tikitat ken ijtuk, wan kwak tiawit tikmatit mas tiawit tinat ka nikan. Shikishpelwi su tikneki tikmati!
Nicolás Maduro
- Ashan kwak mikik Hugo Chavez, yaja kichiwa witz ne itekiw ne achtumutaliani
- Chavez kinekik ma yaja muchiwa achtumutaliani ka iipan
- Itan Chavez yaja tekiti katka ken ipatka-achtumutaliani wan ken "ministro de exterior"
- Yaja socialistaj wan sindicalistaj
- Katka itekiw motoristaj pal se tawikani
Henrique Capriles
- Mumachtij ken abogadoj
- Ashan yaja gobernador ipal Miranda (se estadoj pal Venezuela)
- Muishpanuj pal achtumutaliani tik ne teishpejpenalis pal ne shiwit panutuk
- Ina ka yaja "centristaj"
- Igustoj Lula da Silva, ne katka achtumutaliani pal Brasil
> Ka chikwasen horaj mutzaktiwita ne tejtepatznaj pal teishpejpenat. Ina ne kalpuli ka anka 80% teishpejpentiwit. Ini kenha ken ne teishpejpenalis pal ne shiwit panutuk.
> Inat ka muchiwtiwit hackear sejse cuejcuentaj pal ne kalpuli ka matapan.
> Inatiwit ka tejkia ka muchiwket hackear icuejcuentaj Maduro wan ne ipartidoj. Ashan mukutuntuk ne matapan ijtik Venezuela. Inatiwit tik se tweet ka yaja ne kalpuli, kikutuntuk ne matapan ipanpa uni hajhackeoj.
> Ashan inatuk se pal ne kalpuli ka CANTV, ne empresaj pal wejkatanutza (telefonoj) tik Venezuela, nemi itan se ciberataquej kistuk itech ukse techan. Mumati ka ne matapan tea nemi kutuntuk. Muchi tejchiat kenhayuk pal kimatit ken kistuk ne teishpejpenalis.
|
.jpg)
.jpg)
