Pejtuk se yankwik tepewa itukay Wikitongues. Inat ka kinekit kisentepewat muchi ne 7000 taketzalis ipal ne taltikpak. Nusan kipiat se tepewa tik Ishkalamat. Nemi yek, tikinpalewikan! (Vilaweb)
Ini mapaj kilwitia kan nemit mas tukniwan "Hispanicoj" tik ne ESA
ESA
Ken ne takamet wan siwatket "Latinojmet" (o "Hispanicojmet") tik ne ESA? Ken muitat, ken kinhitat? Tay intekiw? Tay welit kichiwat? Tik ini videoj welit tikitat tay ina se artistaj ne kichiwtuk se amat wan miak fotoj. (BBC)
Mali
Africa
Ken ijtuk wan se camelloj
Ne kalpuli pal Mali kinekik kilwia padiush François Hollande, ne tatuktiani ipal Francia, ika kipalewijtuk kinsumat ne tasumanimet fundamentalistaj ka ajkuikpa. Yajika kitakulijket se camellojkunetzin. Ne achtumutaliani (presidentej) pakik wan inak ka yawi kalwika ne animal ka Francia pal kitalia tik se zoologicoj. Pero uij, yajika kilwij se familiaj ka né tik Timbuktu (se wey techan tik Mali) ka kineki kiajkawa ne camelloj inwan. Inaket ka yek. Pero kwak yaja yajki, kimiktijket, kimanket iayu camelloj wan kikwajket ajwiak. Tamik uni camelloj. Ashan inatuk se tik ne kalpuli pal Mali ka yawit kitakuliat ukse camelloj mas wey wan yawit kituktiat itech Hollande tik Francia.
(CBS)
Juan Manuel Santos
Tatzinu America
Miak kistiwit nujme ne tejtechan ipal Colombia pal inat ka kinekit nejmachnemilis. Juan Manuel Santos, ne tatuktiani ipal Colombia, nemik inwan tik Bogota. Ne ikalpuli nemi tajtaketza iwan ne tatuktianimet ipal ne FARC, tik Cuba. Ne ipartidoj Álvaro Uribe, ne katka ne tatuktiani pal Colombia, wan nusan ne itejtekuyu wejwey tal, inat ma te tajtaketza iwan ne tasumanimet ipal ne FARC.
Italkwachti Iran
Tajku Taneskan
Ulinik ne tal tik Iran te wejka se central nuclear. Yaja se talulin ipal 6,3. Mumati ka miktiwit 37 wan mushutaket 850. Mupatantiwit sejse ichti pal wejkatanutza (telefonoj); melka uni, inat ka te panuk tatka iwan ne central nuclear. (BBC)
Ban Ki-moon
Asia
Ban Ki-moon, ne Wey Tajkwiluani ipal ne Tejtechan Senputzujtuk, inatuk tik Roma ka sujsul tesajsay ne ken ijtuk tik ini tujtunal iwan Ajkuikpa Korea. Majmawi ka weliskia pewa se guerraj ika ne kalpuli ipal Ajkuikpa Korea kipia mijmisil wan yajasan ina ka yawi kitasa sejseuk techan inwan, ken Tatzinu Korea, Japon o sejseuk. (BBC)
Barack Obama
ESA
Obama taketzki iishpan ne Congresoj ipal ne ESA pal kitajtani ma kichiwakan se yankwik tajtuli pal tea welit muchi kipiat se tamutani (armaj). Ashan sejse metzti se takat kinmiktij 26 kunet wan tamachtianimet tik se tamachtiluyan tik Connecticut. Tik ne ESA ne Yekkan (derecha) ina ka muchi welit kipiat ajarmaj ika ne constitucion ina ijkiuni.
Ashan Kenya kipia se yankwik tatuktiani, Uhuru Kenyatta. Muishpejpen tik ne Metzti Yey. Ne ukse candidatoj Raila Odinga inak ka te kichiwket yek ne teishpejpenalis. Melka uni, te pejtiwit musumat nujme ken panuk tik 2007 kwak nusan inaket ka te muchiwki yek wan musunket. Kwakuni mikiket 1000 wan chulujket 600.000. Tipakit ika te mukwepki panu ijkiuni.
Pablo Neruda
Tatzinu America
Kishtijtiwit tik se shaput tik Chile ne iujumiu ne poetaj Pablo Neruda pal welit kitat su tejkia ka kimiktijket o te. Neruda mikik tik 1973. Melka kukuya katka, miak kimatit ka ne militares ipal Pinochet tatuktijket ma kimiktikan. Nikan se videoj kutu.
Ewropa
Ne actriz wan takwikani Sara Montiel mikik ashan; kipiatuya 85 shiwit. (El Mundo)
Beyonce Knowles
ESA/Caribe
Ne takwikani Beyonce nemi tik Habana wan ne ESA kwalanik iwan: tik ne kalpuli tesu pakit wan kitajtanit taika yajki pashalua ka ne, ika ne ESA kineki kichiwilia boycot ne Cuba. (BBC)
YSUES Radio Universitaria tik 660AM: "Cultura Latinoamericana" ne lujlunes ka 10 horaj ka peyna. Wejkatanutza: 2511-2020. Shiwi tuwan!
Curso de náhuat: Centro Cultural Ne Yawal (Av. Izalco casa 102A, Colonia Centroamérica), los sábados 9-11:30 am, $1 la sesión a partir del 11 de enero 2014. Niveles Básico y Avanzado. Tamachtiani: Werner Hernández.
Clases de náhuat (nivel básico): Escuela de Artes de la UES, los viernes 2-4 pm, $0.50 x clase. Cuando lleguen pregunten dónde es el salón o por Guishtemi (77132406).
Taller de náhuat. Centro de Artes Hermanos Aguilar. Sábados 3:00pm. Inicio: 6 de abril 2013. Info. tel. 2222-3418.
.jpg)
