1 Khö duka wanunö andrö. Khö genoni Yehowa andrö, Dawido andrö, sanandrösaigö khö Yehowa taroma li zinunö andre, me no i'efa'ö ia Yehowa ba wa'abölö zi fa'udu khönia, fefu, ba ba danga Zaulo. Imane:[1]
2 Omasido ndra'ugö, Yehowa, fa'abölögu!
3 Hili dödögu Yehowa ba saŵatögu ba sangorifi ya'o. Lowalangigu, ba no nahiagu, khönia manötöna ndra'o, no balusegu ia ba tandru fangorifi khögu ba hatigu.[2]
4 U'angaröfi li Yehowa, si nangea nisuno andrö, ba te'orifi ndra'o, aefa ndra'o ba zi fatiu tödö khögu.
5 Noa sa ifasui ndra'o dulu ba no ifeta'u ndra'o hohou famunu.[3]
6 No ikabi ndra'o böbö moroi ba mbanua tou, ba no ihawui ndra'o tandraŵa famunu.
7 No mu'ao ndra'o khö Yehowa, ba wa'atosasagu andrö, no u'angaröfi li Lowalangigu, no ifondrondrongo ligu ba gödonia andrö ba no irugi dögi dalingania we'aogu andrö khönia.
8 Ba humeu danö, moduru, ba humisi dayadaya hili ba mangiwa, me no tesao wönunia.
9 Manimbo nikhunia ba i'otarai mbawania alitö si manga badia ia, humola mbo galitö, si oroi khönia.[4]
10 Idada mbanua, möi ia tou, sogömi-gömi barö gahenia.[5]
11 Ba hulu Kerubi möi ia, humombo misa, manahanahae ia ba gafi nangi.[6]
12 Ibali'ö balu-balunia zogömi-gömi, osenia fasui, salu ba lawuo saitö.[7]
13 Moroi ba haga andrö fönania itörö lawuo andrö teu kara ba bo galitö.
14 Ba mu'ugu-ugu Yehowa ba mbanua si yaŵa, ba ifarongogö linia Fondrege zalaŵa andrö.
15 I'efa'ö nono wana khönia, ifazawili, ba ifazaumba gari mbanua, ifakuyu.[8]
16 Ba oroma nungo nidanö ba aheta mbalu-balu dayadaya danö, ba wanegumö andrö, ya'ugö Yehowa, ba wangöhöfu geheha nikhumö andrö.
17 I'oro'ö dangania moroi yaŵa, ira'udo, isöbido moroi ba nidanö sebua.[9]
18 Ifadöni ndra'o ba zi fatiu tödö khögu, sabölö, ba ba zi fa'udu khögu, me no tebai ulaŵa ira.
19 No lahawui ndra'o, me baŵa wa'ate'ala khögu, ba no tobali tolo-tolo khögu Yehowa.
20 Ba no i'ohe baero ndra'o ba zebolo tanö, no i'efa'ö ndra'odo, me no omasi ia ndra'o.[10]
21 No isulöni khögu wa'atulö dödögu Yehowa, no ibe'e khögu zulö, me no lö hadia ia zi falemba ba dangagu.
22 Noa sa utörö lala Yehowa, lö solalö ndra'o ba khö Lowalangigu.
23 Noa sa so ba gametahögu huku andrö khönia, fefu, ba amakhoitania andrö, ba lö ni'aröu'ögu khögu.[11]
24 No adölö dödögu khönia ba no u'ata'ufi, fa böi ufazökhi zi lö atulö.[12]
25 Ba no isulöni khögu wa'atulö dödögu Yehowa, balazi wa lö hadia ia zi falemba ba dangagu, wamaiginia.
26 Ba zebua tödö ebua dödöu, ba ba zadölö tödö adölö dödöu,
27 Ba zohau-hau ohau-hau ndra'ugö, ba ba zabila tödö abila ndra'ugö.
28 Ya'ugö sa zanolo niha si göna famakao, ba öhöndrögö hörö si fayaŵa.[13]
29 Ya'ugö sa zamohaga fandrugu, ifohaga zogömi-gömi andrö khögu Yehowa, Lowalangigu.
30 Na ötolodo, ba ududugö göli kara, ba na awögu Lowalangigu, ba usawö mba'a-ba'a.[14]
31 Lala Lowalangi andrö, ba no mo'ahonoa, taroma li Yehowa, ba no muhaogö; baluse ia ba zanötöna khönia, fefu.[15]
32 Ha niha sa Lowalangi, baero Yehowa? ba ha niha nahia saro, baero Lowalangida!
33 Lowalangi andrö, same'e böbö talugu fa'abölö, sangehao lala khögu;
34 sombali'ö ahe mböhö ahegu, ba samataro ya'o ba hili.
35 Samahaö tangagu ba wasöndrata ba ta'iogu ba wogai fana.[16]
36 Ba no öbe'e khögu mbaluse fangorifi andrö khöu, ba no ituwu ndra'o kambölöu, ba fangide-ide'öu ya'ugö zangebua'ö ya'odo.[17]
37 No ö'ebolo'ö naha gahegu ba lö sangiwa mbu'u kawonogu.[18]
38 No ugohi nemaligu, ba no ukhamö, ba lö nifuligu ya'o furi, balazi no ufakiko ira.
39 No urasa ira, fa tebai maoso sa'ae, tegaölö tou ira barö gahegu.
40 Ba no öfoböbö talu ndra'o fa'abölö ba wasöndrata, no öfaöndrö barögu zi fa'udu khögu.
41 Moloi khögu zi fatiu tödö khögu, öbe'e, ba si fa'udu khögu, ba no uhori.
42 Mangarö-ngarö ira, ba lö sangorifi — khö Yehowa, ba lö itema lira.[19]
43 Ba no ufufu ira, si mane gawu-gawu nangi; hulö dambu baewali utibo'ö ira.
44 No ö'efa'ö ndra'o ba wasöndrata niha, no öfataro högö soi niha ndra'odo; tobali la'o'ö khögu niha si lö urai mila.
45 Ha larongo ligu, ba la'o'ö khögu, lahaogö-haogö wehedera khögu ono niha bö'ö.
46 Ariri nono niha bö'ö, laröi gödora, manizi-nizi.
47 Sauri Yehowa, ba nisuno nahiagu saro andrö, ba ni'ebua'ö döi Lowalangi fangorifigu andrö!
48 Lowalangi andrö, sanolo ya'o ba wolau balö, same'e barö mbawagu soi niha;
49 sangefa'ö ya'o ba nemaligu andrö. Si ndruhu, no öbe'e yaŵa zi fa'udu khögu ndra'odo; no ö'efa'ö ndra'o ba niha andrö samakao awönia.
50 Andrö usuno ndra'ugö, ya'ugö Yehowa, ba niha baero, usuno döimö.[20]
51 Ya'ugö, sangebua'ö fangorifi razo, sangebua'ö tödö ba nibayoinimö andrö, khö Dawido ba khö ma'uwunia, irugi zi lö aetu.
Famotokhi ba gahe
editFabaliŵa lala
editOlayama Sinunö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66 • 67 • 68 • 69 • 70 • 71 • 72 • 73 • 74 • 75 • 76 • 77 • 78 • 79 • 80 • 81 • 82 • 83 • 84 • 85 • 86 • 87 • 88 • 89 • 90 • 91 • 92 • 93 • 94 • 95 • 96 • 97 • 98 • 99 • 100 • 101 • 102 • 103 • 104 • 105 • 106 • 107 • 108 • 109 • 110 • 111 • 112 • 113 • 114 • 115 • 116 • 117 • 118 • 119 • 120 • 121 • 122 • 123 • 124 • 125 • 126 • 127 • 128 • 129 • 130 • 131 • 132 • 133 • 134 • 135 • 136 • 137 • 138 • 139 • 140 • 141 • 142 • 143 • 144 • 145 • 146 • 147 • 148 • 149 • 150
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö