Wb/nia/Halöŵö Zinenge/5
Anania ba Safira edit
I. 1 Ba i'amawa mbenua khönia si samösa, Anania döinia, ba awönia wo'omonia, 2 Safira, ba ihalö khönia ösa, mbölinia, fo'omonia göi zangila, ba i'ohe ösa, ibe'e ba danga zinenge.[1]
3 Ba imane Fetero: He Anania, hana wa no fahöna ba dödöu Zatana, fa ölimo Geheha ni'amoni'ö ba öhalö khöu ösa, mböli mbenua andrö?[2] 4 Tenga khöu, na lö mu'amawa ia mena'ö, ba me no mu'amawa, ba tenga ba dangau manö so? Ba hana wa öfa'amöi ba dödöu wolau si manö? Tenga niha nilimou, no Lowalangi ölimo.
5 Ba me irongo niŵa'önia andrö, ba alau tou ia, ba aetu noso.
Ba ihawui fa'ata'u dozi samondrongo da'ö.
6 Ba maoso nono matua, laheta ia, la'ohe baero ba lako'o.[3]
7 Ba so mato tölu za gotalua, ba so wo'omonia, lö nirongonia da'ö no mege.
8 Ba imane khönia Fetero: Ombakha'ö khögu, na si manö wa'ebua mböli mbenua andrö khömi?
Ba imane: E, si manö.[4]
9 Ba imane khönia Fetero: Hana wa mamagölö ami, ba wanandraigö Eheha Zo'aya? Hiza, so sa'ae moroi tou zogo'o fo'omou mege, ba la'ohe baero ndra'ugö göi.
10 Ba i'anema'ö alau tou ia, fönania, ba aetu noso.
Ba me möi yomo nono matua, andrö, ba la'ila, no mate ia, ba la'ohe baero, lako'o ba ngai wo'omonia.
11 Ba ihawui fa'ata'u sebua mbanua fefu, awö dozi samondrongo da'ö.
Tandra nifazökhi zinenge edit
II. 12 Ba oya nifazökhi ndra sinenge tandra ba ila-ila, ba niha. Ba no orudu ira, ba newali Zelomo andrö, (ewali nifolose) ha sambua dödö.[5] 13 Ba ata'u danö bö'ö fefu, orudu khöra, ba lasuno zui ira niha sato. 14 Ba ato sa nifa'anö, samati khö Zo'aya, ato ndra matua ba ato ndra alawe,[6] 15 irege la'ohe baero baolayama zofökhö, ba gaso ba ba hea-hea, ena'ö na mato samösa na atö zi göna lumö Wetero, na so ia.[7] 16 Ba la'ondrasi göi niha sato, moroi ba mbanua si fasui Yeruzalema, la'ohe zofökhö, awö nifakao mbekhu si ra'iö, ba ahori tefadöhö.[8]
Lakuru zui zinenge ba te'efa'ö dania edit
III. 17 Ba maoso gere sebua ba awönia fefu, si faehu huku andrö, sadukaio, mofönu dödöra.[9] 18 Lara'u zinenge, ba lakuru, ba gurunga gumandru.
19 Ba ba zi bongi, ba ibokai mbawandruhö gurunga mala'ika Lowalangi, i'ohe baero ira ba imane:[10]
20 Mi'ae mi'oroma'ö ami ba mi'ombakha'ö ba gosali ba niha sato daroma li fangorifi andrö fefu.[11]
21 Ba me no larongo da'ö, ba möi ira ba gosali, me moluo sibai, mamahaö ira.
Ba me so gere sebua ba awönia, ba lafakaoni'ö zalaŵa rafe sebua ba satua ba Ndraono Gizeraeli fefu, ba lafatenge, ba wangai ya'ira.
22 Ba me möi genoni, ba lö lasöndra ba gurunga. Ba lafuli ira, la'ombakha'ö, 23 lamane: Noa sa muhaogö wokusi kurunga, me soga, no so ba zinga mbawandruhö zanaro, ba me no mabokai, ba lö niha bakha.
24 Ba me larongo niŵa'öra andrö kumandra ba gosali ba ira ere sebua, ba abu dödöra, ba khöra andrö, he wisa da'ö dania.
25 Ba so zangombakha khöra: Hiza, niha andrö, nibe'emi ba gurunga, no so ba gosali, mamahaö niha.
26 Ba möi gumandra, awö genoni andrö, lahalö ira. Tenga ni'anösö'ö, ata'u sa ira niha sato, fa lö latebu kara ira.[12] 27 Ba la'ohe ira ba rafe sebua.
28 Ba isofu, khöra ere sebua, imane: No mahaogö wanguma'ö khömi, böi mamahaö ami, wangombakha töi andrö, ba hiza, anönö Yeruzalema famahaömi mibe'e, ba edöna ami mi'ohe ba huluma ndro niha andrö.[13]
29 Ba latema linia Fetero ba ira sinenge, lamane: Ni'o'ö khö Lowalangi, moroi ba wolo'öda ba niha.[14] 30 No isusugi Lowalangi ndra tuada Yesu andrö, nibunumi, nifanaŵa ba döla geu.[15] 31 Da'ö ni'alaŵa'ö Lowalangi yaŵa, tangania kambölö, solohe ba sangorifi, ba wame'e famalalini era-era ba Ndraono Gizeraeli, ba fangefa horö.[16] 32 Ba ya'aga zi so ba mbörö, ba niŵa'ö andre, awö Geheha ni'amoni'ö, nibe'e Lowalangi ba zolo'ö khönia.
33 Ba me larongo da'ö, ba afökhö sibai ba dödöra, ba mamagölö ira, ba wamunu ya'ira.[17]
Gamalieli edit
IV. 34 Ba maoso zamösa ba rafe sebua, farizaio, Gamalieli döinia, samahaö ba goroisa, ni'omasi'ö niha sato, iŵa'ö lafofanö baero ma'ifu niha andrö.[18] 35 Ba imane khöra:
He ya'ami, Iraono Gizeraeli, mi'angelama, ba nilaumi ba niha andrö. 36 Lö ara na sa, ba maoso Doida andrö, sanguma'ö sebua ia, ba möi awönia niha, mato öfa ngaotu; ba no labunu ia ba tefazawili fefu, ha wa'ato zi fao khönia, ba tobali faya.[19] 37 Aefa da'ö, ba maoso Yuda andrö, banua Galilaia, me luo latanö ba zura döi niha, ba idönisi niha, ba wolo'ö khönia; ba nibunu göi da'ö, ba nifazawili fefu, ha wa'ato zolo'ö khönia.[20] 38 Ba iada'e ba uŵa'ö khömi: Miböhöli niha andrö, ba böi mitegu ira. Na moroi ba niha lala andrö, awö nilau andrö, ba si lö fozu dania.[21] 39 Ba na moroi ba Lowalangi, ba tebai mitenaŵa, fa böi göi samadaö khö Lowalangi ami.[22]
40 Ba la'o'ö khönia; ba humede ira ba zinenge no mege, lafabözi'ö, ba laŵa'ö khöra, böi latötöi döi Yesu andrö; ba la'efa'ö ira.[23]
41 Ba laröi sa'ae rafe sebua, omuso dödöra, me no tetehe khöra, la'o'aya ira, börö döi andrö.[24] 42 Ba lö labato wamahaö ba fangombakha Yesu Keriso ba gosali ba ba nomo misa, ero ma'ökhö.[25]
Famotokhi ba gahe edit
- ↑ Faigi 4:35
- ↑ Luk 22:3; Yoh 8:44
- ↑ MozIII 10:5
- ↑ Yos 7:19
- ↑ Faigi 2:43; 4:30; 3:11
- ↑ Faigi 4:4
- ↑ Faigi 19:11,12; Yoh 14:12
- ↑ Faigi 8:7; Mar 16:17
- ↑ Faigi 4:1; 3:6
- ↑ Faigi 12:7 b.t.
- ↑ Yoh 6:68; 17:3
- ↑ Faigi 4:21
- ↑ Faigi 4:18; Mat 27:25
- ↑ Faigi 4:19 b.t.
- ↑ Faigi 3, 13 b.t.; 10:39
- ↑ Faigi 2:33,36
- ↑ Faigi 7:54
- ↑ Faigi 22:3
- ↑ Faigi 21:38
- ↑ Luk 2:2
- ↑ Mat 15:13
- ↑ Amaed 21:30; Yes 8:10; Faigi 23:9
- ↑ Faigi 4:17,18
- ↑ Mat 5:10—12; Luk 21:17; FetI 4:13
- ↑ Mar 16:15
Fabaliŵa lala edit
Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö