Wikimedia Incubator

Wb/nia/Halöŵö Zinenge/11

< Wb | nia | Halöŵö Zinenge
Wb > nia > Halöŵö Zinenge > 11

Ibu'a ba hulunia Fetero me no ifa'amöi banua Yesu niha baero

edit

I. 1 Ba larongo sinenge ba talifusö, ba Yudaia misa, la'o'ö göi li Lowalangi niha baero.[1]

2 Ba me so moroi si tou Wetero, me möi ba Yeruzalema, 3 ba lategu ia niboto, lamane: No möi'ö ba niha si lö muboto, no orudu manga ndra'ugö khöra.[2]

4 Ba ibörötaigö Fetero, izara-zara wanutunö khöra, imane: 5 Sodo ba Yofe, mangandrö ndra'o; ba u'ila, me abeta nosogu, gangilata, nahia silalö mitou, hulö lembe sebolo, nifotaŵi-taŵi fatalinga si öfa, wanada ya'ia moroi ba mbanua si yaŵa, ba irugi ndra'odo.[3] 6 Ba utöngö, ufaigi-faigi, ba u'ila bakha zaliŵa-liŵa ba danö, si öfa ahe, awö gutu ndru'u si fara'u ba kuökuö ba fofo ba dalu mbanua. 7 Ba urongo göi li, imane khögu: Faoso Fetero, taba ba a! 8 Ba umane: Ai tebai, Tua, me lö irai itörö mbawagu si lö sökhi ba si ra'iö. 9 Ba itema zui ligu sihede andrö, moroi ba mbanua si yaŵa, imane: Böi bali si lö sökhi nihaogö Lowalangi. 10 Ba medölu zi manö, ba tedöni zui miyaŵa, ba mbanua si yaŵa, fefu.

11 Ba hiza, ba da'ö sibai so baolayama nomo andrö, ba zi soga, niha andrö, nifatenge khögu, moroi ba Kaizaria. 12 Ba iŵa'ö khögu Eheha, möido awöra, böi manufa dödögu. Ba möi göi awögu dalifusö, si daönö andre, ba möiga yomo ba nomo niha andrö.[4]

13 Ba i'ombakha'ö khöma, he wisa wangilania mala'ika andrö, yomo khönia, sanguma'ö: Fatenge ba Yofe, ba fakaoni'ö Zimoni andrö, nifotöi Fetero, 14 da'ö zanguma'ö khöu taroma li, fangorifiu, ba fangorifi zoroiyomou fefu.[5]

15 Ba me ubörötaigö fahuhuo, ba aekhu Geheha ni'amoni'ö ba khöra, si mane ba khöda göi, ba mböröta.[6] 16 Ba itörö tödögu niŵa'ö Zo'aya, me imane: "Idanö nibayagö Yohane, ba ya'ami, ba nibayagö Eheha ni'amoni'ö."[7] 17 Ba na faoma game'ela, nibe'e Lowalangi khöra nibe'enia khöda, samati khö Zo'aya ya'ita, Yesu Keriso, ba ha niha ndra'o? Hadia tola utenaŵa Lowalangi?[8]

18 Ba me larongo da'ö, ba lö hede-hedera, ba lasuno Lowalangi, lamane: Ba noa sa ibe'e ba niha baero göi Lowalangi wamalalini era-era ba wangorifi.[9]

Si föföna molo'ö ba Gandriokhia

edit

II. 19 Ba latöröi danö si no musaewe andrö, moroi ba wamakao andrö, si no tesao ba khö Zitefano, irugi danö Wönikia ba Kifero ba Andriokhia, ba lö la'ombakha'ö daroma li Loŵalangi, gofu ha khö, ha ba niha Yehuda.[10] 20 Ba so ösa ba khöra, Dawa Gifero ba banua Girene, da'ö zangombakha ba Ndrawa Heleni göi, me larugi Gandriokhia, laturiagö khöra Yesu, So'aya.[11] 21 Ba itolo ira tanga Zo'aya, ba ato zi faduhu tödö, la'o'ö khö Zo'aya.[12]

22 Ba terongo duria andrö khöra, ba dögi dalinga mbanua Yesu ba Yeruzalema, ba lafatenge Mbaranaba, ba Gandriokhia.[13] 23 Ba me irugi, me i'ila wa'ebua dödö Lowalangi andrö, ba omuso dödönia, ba ifarou dödöra fefu, ena'ö na la'aro'ö dödö wangiagö khö Zo'aya,[14] 24 me no niha si sökhi ia ba me no fahöna khönia Geheha ni'amoni'ö, awö wamati. Ba ato niha si tefaböbö khö Zo'aya.[15]

25 Ba möi ia ba Dareso, ba wangalui Saulo andrö, ba me no isöndra, ba i'ohe ba Gandriokhia.[16] 26 Ba tobali döfi wa'ara falukha-lukha ira ba mbanua andrö, ba ato nifahaöra niha, ba ba Gandriokhia mböröta, wa labe'e töi nifahaö niha Keriso.[17]

Agabo

edit

III. 27 Ba me luo da'ö, ba möi misi tou ba Gandriokhia zama'ele'ö moroi ba Yeruzalema.[18] 28 Ba maoso zi samösa da'ö, Agabo döinia, ifa'ele'ö moroi ba Geheha lofo sebua, si so dania ba guli danö ma'asagörö; salua me luo Kaizaro Kalaudio.[19] 29 Ba lahonogöi ira nifahaö fefu, lafa'ohe'ö dolo-tolo ba dalifusö ba Yudaia, ebua labe'e sebua ana'a.[20] 30 Ba alua göi lafa'ohe'ö khö zatua, Baranaba ba Saulo zolohe.[21]

Famotokhi ba gahe

edit
  1. ↑ Faigi 10:44 b.t.; Efes 3:1 b.t.
  2. ↑ Faigi 10:28
  3. ↑ Faigi 10:9 b.t.
  4. ↑ Faigi 10:23
  5. ↑ Faigi 10:6; 16:30,31
  6. ↑ Faigi 10:44
  7. ↑ Faigi 1:5
  8. ↑ Faigi 17:47
  9. ↑ Faigi 5:31
  10. ↑ Faigi 8:1,4
  11. ↑ Faigi 8:35
  12. ↑ Faigi 2:47
  13. ↑ Faigi 9:27
  14. ↑ Faigi 13:43
  15. ↑ Faigi 6:5
  16. ↑ Gal 2:11 b.t.
  17. ↑ Faigi 26:28; FetI 4:16
  18. ↑ Faigi 13:1; Efes 4:11
  19. ↑ Faigi 21:10
  20. ↑ Rom 15:25,26
  21. ↑ Faigi 12:25

Fabaliŵa lala

edit

Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Halöŵö_Zinenge/11&oldid=6458332"