Wikimedia Incubator

Wb/nia/Halöŵö Zinenge/28

< Wb | nia | Halöŵö Zinenge
Wb > nia > Halöŵö Zinenge > 28

Nilau Waulo ba Melite

edit

I. 1 Ba me no aefaga ba wamakiko andrö, ba marongo, Melite döi hulo andrö.[1] 2 Ba ebua sibai dödö niha bö'ö andrö khöma, la'ebua'ö galitö, ba lafonaha ndra'aga fefu, me no ilabu teu ba me o'afuga.[2]

3 Ba me ira'ui zandra'u nono geu Faulo, ba wame'e ba galitö, ba hiza gulö, soloi ba wa'aukhu galitö, ira'u danga Waulo.

4 Ba me la'ila niha andrö gulö andrö, sanaŵa-naŵa ba dangania, ba faoma lamane khö nawöra: Oroma, wa sange'e niha andrö, ibunu ia "solau balö", he ŵa'ae no aefa ia ba nasi.[3]

5 Ba ifazaumba ba galitö gulö andrö, ba lö göna ia hadia ia, safökhö.[4]

6 Ba labalo-baloi, ma abao, ba ma i'ozumagö manö alau tou ia ba mate. Ba ara labalo-baloi, ba la'ila, lö hadia zafökhö, si göna ia, ba tobali, Lowalangi ia laŵa'ö.[5]

7 Ba ba zahatö ba mbanua andrö motanö gumandru hulo andrö, Fubelio döinia. Ba ifa'amöiga khönia, tölu bongi wa'ara ibe'e-be'e göma, wa'oböwö.

8 Ba mofökhö nama Wubelio andrö, akhömö ba mendro dalu.

Ba möi khönia si bakha Waulo, mangandrö, itufa tanga zofökhö, ifadöhö wökhö.[6] 9 Ba me aefa da'ö, ba mangondra göi zofökhö bö'ö ba hulo andrö, ba tefadöhö wökhöra.[7]

10 Ba lafosumange sibai ndra'aga, ba me mofanöga, ba labe'e zoguna khöma.

Irugi Roma

edit

II. 11 Ba tölu waŵa, ba moloyoga, ba nowo si no mombaloi fa'aefa mbaŵa deu ba hulo andrö, moroi ba Alesandria, sotandra sifaero andrö. 12 Ba manaoga ba Zirakuso, tölu bongima ba da'ö. 13 Ba me no mafasui, ba marugi Regio. Ba sara wongi aefa da'ö, ba ilau angi moroi raya, ba mahemolu ö, ba marugi Wuteoli. 14 Falukhaga dalifusö ba da'ö, ba la'andrö khöma, ma'iagö khöra, fitu bongi; ba marugi sa'ae Roma.[8]

Irugi Roma Faulo, nirate dangania

15 Ba so moroi ba da'ö dalifusö, me no larongo ndra'aga, lafaondragö ndra'aga ba Gafiforo ba ba Daretabene. Ba me i'ila da'ö Faulo, ba isuno Lowalangi ba terara dödönia.[9]

16 Ba me no marugi Roma, ba latehe khö Waulo, sambua nahania, awönia zaradadu samösa, sanaro ya'ia.[10]

Mangombakha ia ba da'ö

edit

III. 17 Ba tölu bongi, ba ifalukha'ö Faulo zatua niha Yehuda, si so ba da'ö.

Ba me so ira, ba imane khöra: He ya'ami, ira talifusö, he ŵa'ae lö horögu ba khöda, ba he ŵa'ae lö si sala ndra'o ba huku ndra tua, ba no laböbö ndra'o ba Yeruzalema, ba no labe'e ba danga Ndrawa Roma ndra'odo.[11] 18 Ba la'efa'ö ndra'o mena'ö da'ö, me no lasekhegö, me lö hadia ia mbörö wamunu ya'o khögu.[12] 19 Ba me mamadaö niha Yehuda, ba lö lala bö'ö khögu, baero wamuli khö kaizaro, tenga sa taŵa'ö so ni'adugögu talifusögu.[13] 20 Da'ö sa mbörö, wa ufakaoni'ö ami, ena'ö u'ila ami, ba fahuhuodo khömi: fanötöna Ndraono Gizeraeli andrö sa mbörö, wa terate ndra'o rate andre.[14]

21 Ba lamane khönia: Lö'ö sa nitemama sura, ba khömö, moroi ba Yudaia, ba lö'ö göi si möi dalifusö, sangombakha hadia ia zi lö sökhi ba khöu. 22 Ba niŵa'öma, sökhi marongo khöu, he wisa gera-erau; ba zi faehu huku andrö sa, ba no marongo, tefadaö manö niŵa'öra, fefu gofu heza so ira.[15]

23 Ba la'ötö khönia mbongi, ba ato zi möi khönia ba zi mörö ia.

Ba ibotokhi khöra mbanua Lowalangi andrö ba ifaduhu'ö dödöra khö Yesu, moroi ba goroisa Moze ba moroi ba zura zama'ele'ö, i'otarai si hulö wongi, irugi tanö owi.[16]

24 Ba so ösa zi faduhu tödö ba niŵa'önia, ba so göi zi lö mamati.[17] 25 Ba me lö ha sara dödö, ba mofanö ira, me iŵa'ö zambua li Faulo, me imane: Duhu niŵa'ö Geheha ni'amoni'ö, ni'ombakha'ö Yesaya, sama'ele'ö andrö, khö ndra tuami,[18] 26 me imane: "Ae ba niha andrö, ba ömane: Mirongo tögi dalingami, ba lö'ö manö aboto ba dödömi, ba anehe hörömi, ba lö'ö manö mi'ila geluaha.[19] 27 Noa sa abe'e dödö niha andrö ba no afiso-fiso dögi dalingara, ba höröra, ba no lafakifu, fa lö la'ila höröra, fa lö larongo tögi dalingara, fa lö aboto ba dödöra, fa lö lafuli ira, fa lö u'orifi ira." 28 Ba ya'aboto ba dödömi, no tefa'ohe'ö ba niha baero wangorifi andrö, khö Lowalangi, ba mamondrongo göi da'ö.[20]

29 Ba me aefa iŵa'ö, ba mofanö niha Yehuda, wa'abölö wasosotara khö nawöra.

30 Ba alo'o mendrua fakhe Waulo ba nomo andrö niwawalönia, ba ifa'amöi fefu zi möi yomo khönia. 31 Ituriagö mbanua Lowalangi ba ifahaö niha ba duria Zo'aya, Yesu, ma'ifu lö aiŵö ia ba lö mutenaŵa.[21]

Famotokhi ba gahe

edit
  1. ↑ Faigi 27:26,39
  2. ↑ KorII 11:27
  3. ↑ Luk 13:2; MozV 32:24; Amos 9:3
  4. ↑ Mar 16:18
  5. ↑ Faigi 14:11
  6. ↑ Mat 8:14; Yak 5:14 b.t.
  7. ↑ Mat 4:24
  8. ↑ Faigi 21:4
  9. ↑ Rom 1:10 b.t.
  10. ↑ Faigi 23:11; 27:3
  11. ↑ Faigi 25:8
  12. ↑ Faigi 26:32
  13. ↑ Faigi 25:11,12
  14. ↑ Faigi 26:6 b.t.; TimII 1:16
  15. ↑ Faigi 24:5,14; Luk 2:34
  16. ↑ Faigi 18:5 b.t.; 19:8; Luk 24:27
  17. ↑ Faigi 17:4; 14:4
  18. ↑ FetII 1:21
  19. ↑ Yes 6:9 b.t.; Mat 13:14 b.t.
  20. ↑ Faigi 13:46 b.t.
  21. ↑ Efes 6:18—20

Fabaliŵa lala

edit

Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Halöŵö_Zinenge/28&oldid=6229762"