Wikimedia Incubator

Wb/nia/Halöŵö Zinenge/10

< Wb | nia | Halöŵö Zinenge
Wb > nia > Halöŵö Zinenge > 10

Folo'ö gumandra Konelio andrö

edit

I. 1 Ba so ba Kaizaria niha, Konelio döinia, kumandra zaradadu Gitalia andrö;[1] 2 niha satulö tödö, sangata'ufi Lowalangi, awö zoroiyomonia fefu; oya ibe'e ba zi numana ame'ela, ba si lö mamalö-malö wangandrönia khö Lowalangi.[2] 3 Ba i'ila ba gangilata, oroma sibai, mala'ika Lowalangi, si möi yomo khönia, so labözi tölu, imane khönia:

He Konelio![3]

4 Ba itöngö, ata'u ia, imane: Hadia da'ö, Tua?

Ba imane khönia: No itörö tödö Lowalangi, si yaŵa, wangandröu ba ame'elamö andrö.[4] 5 Ba iada'e, ba fatenge niha ba Yofe, ba fakaoni'ö Zimoni andrö, 6 nifotöi Fetero; no möi ia tome khö Zimoni andrö, tuka guli zaŵi, ba mbewe nasi so nomonia.[5]

7 Ba me no mofanö mala'ika andrö, sihede khönia, ba humede ia ba zawuyunia, darua, ba ba zaradadu samösa, sangata'ufi Lowalangi, 8 ngoni-ngoninia, ba me no idunö-dunö khöra fefu hadia ia, ba ifatenge ira ba Yofe.

9 Ba sara wongi, me so ira ba lala, me ahatö sa'ae ira ba mbanua, ba möi yaŵa Wetero ba zi sagötö, mangandrö, so laluo.[6] 10 Ba olofo ia, omasi ia manga.

Ba me la'asiwai gönia, ba abeta nosonia.[7] 11 Ba i'ila, teboka mbanua si yaŵa, ba numalö mitou nahia, hulö lembe sebolo, nifotaŵi-taŵi fatalinga si öfa, wanada ya'ia ba guli danö. 12 So bakha fefu ngawalö zaliŵa-liŵa ba danö, si öfa ahe, ba fefu ngawalö guö-kuö ba danö, ba fefu ngawalö wofo ba dalu mbanua.

13 Ba so zihede khönia, imane: Faoso, Fetero, taba ba a!

14 Ba imane Fetero: Ai, tebai Tua, me lö urai u'a zi lö sökhi, awö zi ra'iö.[8]

15 Ba imane zui khönia sihede andrö: Böi bali si lö sökhi nihaogö Lowalangi.[9] 16 Ba medölu zi manö, ba i'anema'ö tedöni miyaŵa ba mbanua si yaŵa nahia andrö.

17 Ba me ibusi tödö Fetero, hadia gangilata andrö, ni'ilania, ba hiza, ba no so tou niha andrö, nifatenge Konelio, no lasofu nomo Zimoni.

18 Ba mu'ao ira, lasofu, na so ba da'ö tome Zimoni, nifotöi Fetero.

19 Ba me ifatou-tou na tödönia Fetero gangilata andrö, ba imane Eheha khönia: Hiza niha, sangalui ya'ugö,[10] 20 ba faoso, ae tou, ba ae awöra, böi manufa dödöu, me no ya'o zamatenge ya'ira.[11]

21 Ba möi tou Wetero, i'ondrasi niha andrö, imane: Hiza, ya'odo ni'aluimi. Hadia mbörö, wa so ami?

22 Ba lamane: Konelio andrö, kumandra, niha satulö tödö, sangata'ufi Lowalangi, si sökhi turia göi ba niha Yehuda fefu; no ifaŵa'ögö khönia Lowalangi ba mala'ika ni'amoni'ö, ifakaoni'ö ndra'ugö ba nomonia, ba wamondrondrongo niŵa'öu.

23 Ba i'ohe ira yomo, ibe'e göra. Ba sara wongi, ba möi ia, fao ia khöra: ba möi awönia dalifusö ösa, banua Yofe.[12]

24 Ba mahemolu ö, ba larugi Kaizaria. Ba no ibalo-baloi ira Konelio, no ikaoni zahatö khönia, awö zabölö fahuwu khönia.

25 Ba me möi yomo Wetero, ba ifaondragö ia Konelio, ituhi danö fönania, mangalulu.

26 Ba ifaoso Fetero, imane: Faoso! niha göi ndra'odo.[13]

27 Ba fahuhuo ira, möi ira yomo, ba i'ila zato, si no so ba da'ö, Fetero.

28 Ba imane khöra: Mi'ila, lö tola ba niha Yehuda, orudu ia ba niha bö'ö, ba lö tola möi ia khöra; ba khögu, ba no i'oroma'ö Lowalangi, böi uŵa'ö, si lö sökhi, ba ma si ra'iö niha, gofu ha niha ia.[14] 29 Andrö göi lö ufadaö we'amöi, me lafakaoni'ö ndra'odo. Usofu iada'e, hadia mbörö, wa no mifakaoni'ö ndra'o?

30 Ba imane Konelio: öfa bongi ma'ökhö, me mangandrö ndra'o, yomo ba da'e khögu, me labözi tölu, ba hiza niha, si so fönagu, sobaru sihaga,[15] 31 ba imane: He Konelio! No tefondrondrongo wangandröu ba no itörö tödö Lowalangi game'elamö andrö. 32 Andrö fatenge ba Yofe, ba fakaoni'ö Zimoni andrö, nifotöi Fetero; no möi ia tome ba nomo Zimoni, tuka guli zaŵi, ba mbewe nasi. 33 Ba u'anema'ö ufatenge khöu, ba sökhi me no so ndra'ugö. Ba no soga fefu iada'e, föna Lowalangi, ba wamondrondrongo fefu niŵa'ö Zo'aya khöu.

34 Ba humede Wetero, imane: Awena si ndruhu aboto ba dödögu, lö ifaigi mbawa niha Lowalangi,[16] 35 dozi sa, ha soi ira, sangata'ufi ya'ia, solau satulö, da'ö zomasi ia.[17] 36 Da'ö daroma li andrö, nifa'ohe'önia ba Ndraono Gizeraeli, wamaturiagö'ö fa'ohahau dödö khö Yesu Keriso, no da'ö Zo'aya niha fefu.[18]

37 No mirongo duria andrö, ba danö Yudaia ma'asagörö, si börögö ba Galilaia, me no aefa wamayagö idanö andrö, ni'ombakha'ö Yohane;[19] 38 Yesu andrö, banua Nazareta, fombayoini Lowalangi ya'ia, Eheha ni'amoni'ö ba fa'abölö, sanöröi tanö, wanolo niha ba famadöhö fökhö nifakao Gafökha fefu, me no itolo ia Lowalangi.[20]

39 Ba ya'aga zi so ba mbörö ba nilaunia fefu, he ba danö niha Yehuda, ba he ba Yeruzalema, ba no lataŵi ia ba döla geu, no labunu.[21] 40 Da'ö nisusugi Lowalangi, me no aefa zi dua wongi, ba no ibe'e oroma ia,[22] 41 tenga ba niha sato, ha ba zamaduhu'ö andrö, nihönagö Lowalangi wanutuyu ya'ira, khöma, si no orudu manga khönia, zi no mamadu idanö awönia, me no aefa maoso ia moroi ba ngai zi mate.[23]

42 Ba no iŵa'ö khöma wangombakha ba niha andre ba famaduhu'ö, wa da'ö nihonogöi Lowalangi sanguhuku niha sauri awö zi no mate.[24] 43 Ya'ia nifaduhu'ö zama'ele'ö, fefu, wa ba döinia lasöndra wameta horö dozi si faduhu tödö khönia.[25]

44 Ba lö'ö na saetu wehede andrö, ba aekhu Geheha ni'amoni'ö ba zamondrongo taroma li andrö fefu,[26]

45 Ba tobali dödö zamati niboto, fefu, ha wa'ato ira, zi no fao khö Wetero, we'amöi, me telau göi ba niha baero game'ela andrö, Eheha ni'amoni'ö.[27] 46 Larongo sa'ae, molau li bö'ö ira ba lasuno Lowalangi.

Ba imane Fetero: Hadia, tola tatenaŵa nidanö, fa böi tebayagö idanö da'e, si no manema Eheha ni'amoni'ö, si mane ya'aga?[28] 47 Ba iŵa'ö khöra lafabayagö'ö idanö ira, ba döi Yesu Keriso. Ba la'andrö khönia, ena'ö i'aragö ia ma'ifu khöra.

Famotokhi ba gahe

edit
  1. ↑ Mat 8:5
  2. ↑ Sin 112:9; Luk 7:5
  3. ↑ Luk 1:22
  4. ↑ Luk 1:12,29; Sin 141:2
  5. ↑ Faigi 9:43; 11:14
  6. ↑ Dan 6:10
  7. ↑ Faigi 11:5 b.t.; 22:17
  8. ↑ MozIII 11:4 b.t.
  9. ↑ Mat 15:11; TimI 4:5
  10. ↑ Faigi 8:29
  11. ↑ Faigi 15:7
  12. ↑ Faigi 11:12
  13. ↑ Faigi 14:15; Fam 19:10; 22:8,9
  14. ↑ Faigi 11:3; Yoh 18:28
  15. ↑ Faigi 1:10
  16. ↑ MozV 10:17; SamI 16:7
  17. ↑ Faigi 2:39; 15:9; Yes 56:6,7
  18. ↑ Faigi 13:26,46; Yes 52:7; Efes 2:14 b.t.; Fil 1:11
  19. ↑ Mat 4:12 b.t.; Mar 1:1 b.t.
  20. ↑ Faigi 2:22; Luk 4:14,18; Mat 9:35; Yoh 3:2
  21. ↑ Faigi 1:8; 2:23; 3:15; Luk 23:33; FetI 2:24
  22. ↑ Mat 28:6
  23. ↑ Faigi 13:31; Yoh 15:27; Luk 24:43; Mat 26:29
  24. ↑ Faigi 17:31; Yoh 5:22
  25. ↑ Faigi 4:12; Yes 53:11; Yer 31:34; Dan 9:24; Rom 3:21 b.t.
  26. ↑ Faigi 11:15
  27. ↑ Faigi 2:17,38
  28. ↑ Faigi 2:4; 19:6

Fabaliŵa lala

edit

Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Halöŵö_Zinenge/10&oldid=6458330"