Wb/nia/Mataio

Nga'örö högö Zura Ni'amoni'ö ni'ali H. Sundermann faoma Salaŵa Fali'era (Ama Mandranga) moroi Dahana. Da'a Zura Ni'amoni'ö si föföna sibai si so bakha sura Amabu'ulali Siföföna ba Amabu'ulali Sibohou.

Da'a newali zura Turia Somuso Dödö Nisura Mataio, nihalö moroi ba Zoera Ni'amoni'ö nifa'anö Heinrich Sundermann, nga'örö 5-48.

Famasao

Molo'ö nidunö-dunö, isura Injil si föföna andre Mataio, nikaoni göi Lewi. Me ikaoni ia Yesu tobali nifahaönia (Mataio 9:9 ba Mareko 2:13), mohalöŵö Mataio ba gödo zangowuloi beo (li Indonesia: kantor pajak) khö zamatörö moroi ba Roma.

Heŵa'ae laböbögö khönia wanura Injil andre, sindruhunia tenga si'ai Mataio zanura ya'ia. Tesura Injil andre arakhagö 80 fakhe aefa wa'atumbu Yesu (80 M), eluahania me no ara mate Mataio sa'ae. Na simanö haniha zanura ya'ia? Te samösa moroi ba gotalua ndra nifahaö Mataio samösa. Tola manö wa so nisura Mataio samösa ba li Ibrani, ba i'oguna'ö da'ö nifahaö andrö ba wama'anö Injil ba li Yunani si so khöda iada'a.

Ba ndröfi 70 aefa wa'atumbu Yesu, ladudugö Yerusalema ira niha Roma, ba börö da'ö oi muzawili ndra niha Yahudi misa ba danö zotanö.

Andrö wa tebörögö so gangowuloa simane ira farizaio ba wangowuloi niha Yahudi andre fefu fuli tobali sambua soi.

Ba zalua simane andre so ma'ifu wanimba dödö khö ndra solo'ö Yesu nifotöi niha Keriso, börö me hulö niha baero iraa ba gotalua ndra solo'ö khö ndra farizaio. Heŵa'ae laŵa'ö wa ya'ira andrö föfö Ndraono Gizeraeli, ba itaria na'i laŵa'ö wa sindruhu duho Ndraono Gizara'eli andrö ira, so so khöra wangiwa dödö.

Da'ö mbörö wa tesura Injil Mataio: ba wangaro'ö tödö ndra niha Keriso, wa sindruhu soi nifili Lowalangi ira, heŵa'ae lö latema'ö ira ira banuara.

Iforoma'ö khöra Injil andre wa no aheta ndra niha Yahudi moroi ba ngenoli "soi nifili Lowalangi" awö moroi ba wawu'usali andrö, börö me lö latema Yesu tobali sangefa'ö ma Mesia.

Iada'a niha Keriso andrö zi no tobali soi nifili Lowalangi si bohou, si no te'osambua'ö bakha ba Gereja. No te'owuloi ira moroi ba gotalua niha Yahudi ba ba moroi ba gotalua soi tanöbö'ö ba zi sagörö ulidanö. Tobali ira föfö soi Lowalangi si bohou tenga börö wa'aniha-yahudi ba hiza börö wanema'öra Yesu tobali Mesia ba Ono Lowalangi, ba börö wolo'öra oroisania (Mataio 28:18–19).

I'ositengagö ere sebua niha Yahudi wa Mesia Yesu (26:6-66), bahiza ifadahu'ö ia Simoni Fetero awö ndra nifahaö bö'ö (16:13-20). Börö da'ö no tobali fangali mado ndraono Gizeraeli ndra nifaha'ö si-12 andrö. No tobali ira börö soi Lowalangi si bohou.

Ifa'oli gamakhoita si bohou moroi khö Yesu andrö Mataio ba zi lima waosatö, si fakhili ba zi lima waosatö gamakhoita nifa'oli Moze:

• Oroisa si bohou ni'odane-danegö ba goroisa Moze (faza 5-7)
• Goi-goi ni'o'ö ndra tenge-tenge Lowalangi (faza 10)
• Ngawalö gamaedola sanandrösa ba gamatöröŵa Lowalangi (faza 13)
• Mene-mene khö ndra niha Keriso (faza 18)
• Lala wa'auri ndra solo'ö khö Yesu bakha ba Gerejania ba zi so föna, aefa wa'adudu Yerusalema andrö (faza 23-25).

Angolifa nösi

Faza: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Fabaliŵa lala

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö