Wb/nia/Halöŵö Zinenge/14

Fe'aso ndra Faulo Baranaba ba Nikonia

I. 1 Ba ba Nikonia, ba fao ira we'amöi ba zekola niha Yehuda, ba ba wangombakha'öra, ba faoma mamati, he niha Yehuda, ba he Dawa Heleni, ato ira. 2 Ba lafarou dödö niha baero niha Yehuda si lö molo'ö, lafabörö ba dalifusö. 3 Ba ara zui ma'ifu ira ba da'ö, lö aiŵö ira wangombakha, börö Zo'aya, samaduhu'ö taroma li fa'ebua dödönia; ibe'e khöra, lafazökhi tangara dandra, awö gila-ila.

4 Ba fabali dödö mbanua andrö, so zi fa'awö ba niha Yehuda, ba so zi fa'awö ba zinenge. 5 Ba me maoso dödö niha baero, awö dödö niha Yehuda, fabaya salaŵara, ba wamakao ya'ira ba ba wanebu kara,

6 ba me terongo khöra, ba moloi ira, lasaŵa mbanua Lika'onia, Lisitera ba Dareba, ba ba zi fasui andrö. 7 Ba da'ö la'ombakha'ö duria somuso dödö.

Fe'asora ba Lisitera

II. 8 Ba so ba Lisitera niha, sidao-dao, si tebai mofanö, sombuyu-mbuyu töla, moroi ba dalu ninania, alukhö mowaö-waö ia. 9 Ba irongo, me fahuhuo Waulo.

Ba inehegö ia Faulo, i'ila, so khönia wamati, wa tola döhö wökhönia, 10 ba imane, ebua linia: Atulö'ö wezizio ba gaheu!

Ba i'amaröga'ö ya'ia ba mowaö-waö.

11 Ba me la'ila niha sato nilau Waulo, ba lamane ba li Lika'onia: No tobali fakhili-khili ndra Lowalangi ba niha, ba no möi mitou khöda. 12 Ba labe'e töi Mbaranaba Yufitero ba töi Waulo, ba Merekuri, me ya'ia zi fahuhuo.

13 Ba i'ohe ba mbawa göli göröbao ba bunga ere Yufitero andrö, si so ba ngai mbanuara, ba möi awönia niha sato, lafosumange ira ena'ö.

14 Ba me larongo da'ö sinenge Baranaba ba Faulo, ba lasika nukhara, fagohi ira lasaŵa zato, mu'ao ira, lamane: 15 He ya'ami, hana wa mimanö? Niha göi ndra'aga, si mane ya'ami, sangombakha khömi turia somuso dödö, ena'ö miröi waya andrö, ba ena'ö mifuli ami khö Lowalangi sauri, samazökhi banua si yaŵa, awö danö, awö nasi, awö nösi fefu; 16 si no manehe ba götö si no numalö, latörö larara niha baero fefu; 17 he ŵa'ae lö ibini'ö ia, wanolo, wame'e khömi teu moroi yaŵa ba baŵa sowua zinanö, ba wangabuso tödömi ö ba fa'omuso dödö.

18 Ba me laŵa'ö da'ö, ba ha si'aikö fanenaŵa sato, fa lö lafosumange ira.

19 Ba so niha Yehuda, si otarai Gandriokhia ba Ikonia, ba lafarou niha sato, ba latebu kara Waulo, ba lafondröni hakhi baero mbanua, lawai no mate ia.

20 Ba me lafasui ia nifahaö, ba maoso ia, möi ia miyomo. Ba sara wongi aefa da'ö, ba mofanö ia, awö Mbaranaba, lasaŵa Ndrarebe.

Fangawulira ba Gandriokhia

III. 21 Ba la'ombakha'ö duria somuso dödö ba mbanua andrö, ba me no ato nibali'öra nifahaö, ba lafuli ira ba Lisitera ba ba Nikonia ba ba Gandriokhia. 22 La'a'aro'ö dödö nifahaö, lafarou dödöra, fa böi labulö'ö ira ba wamati; laŵa'ö khöra, lö tola lö oya zi göna ita famakao ba lala ba mbanua Lowalangi andrö. 23 Ba me no ladozigö banua, wanutuyu satua khöra, ba mangandrö ira ba mamoni, wanou'ö ya'ira ba danga Zo'aya, ba zamati ira.

24 Ba latörö Wizidia, lasaŵa Wambilia. 25 Ba me no la'ombakha'ö daroma li ba Werege, ba möi ira misi tou ba Gatalia. 26 Moroi ba da'ö moloyo ira, lasaŵa Gandriokhia, ba nitou'ö ya'ira ba wa'ebua dödö Lowalangi, ba halöŵö andrö, nihalöra.

27 Ba me larugi, ba lafalukha'ö mbanua, la'ombakha'ö he iwisa Lowalangi khöra, awö wa no ifolala ba wamati niha baero. 28 Ba ara ma'ifu ira ba da'ö, awö ndra nifahaö.

Famotokhi ba gahe

Fabaliŵa lala

Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö