Fama'ele'ö nitandrösaigö ba Gogi ba ba Magogi.
I. Gogi zi möi manuwö ba danö ni'amoni'ö andrö
edit1 Ba so niŵa'ö Yehowa khögu, 2 imane: He ono niha, otahögö Gogi andrö ba danö Magogi, razo ba Rosi ba ba Mesekhi ba ba Dubala, ba ama'ele'ö nitandrösaigö khönia,[1] 3 ömane: Da'ö niŵa'ö Zo'aya, Yehowa: Hiza, ulau khöu, ya'ugö Gogi, razo ba Rosi ba ba Mesekhi ba ba Dubala, ba udönisi ndra'ugö, 4 ugaini zimbimö, u'ohe baero ndra'ugö, awö zabölö andrö khöu fefu, fabaya si fakudo, oi si no mangehao, fondrege zi sökhi nukha, ato sibai ira, samaluse ba sodange, sara wöda ba danga zamösana.[2] 5 Awöra Warasa ba Khusi ba Futi, oi samaluse ba sotetenaulu.[3] 6 Gomeri ba sabölö andrö khöra fefu ba ma'uwu Dogarima, fondrege yöu ba sabölö andrö khöra fefu — oya soi nawöu![4] 7 Angaro ba fa'anö fefu hadia ia khöu, ya'ugö ba sabölö andrö khöu, fefu, si no owulo khöu, ba iagö nitöngönira. 8 Na ara dania, ba teŵa'ö li khöu, ba götö na furi, ba örugi danö, si no mufadöni ba mbaŵa zi'öli [ba niha] si no mu'ozaragö ba niha baero misa, soya soi, si no mufataro ba hili Ndraono Gizeraeli, si no lö mamalö-malö, wa lö niha-niha mege; moroi ba niha baero te'ohe miyaŵa ira mege; ba dozi la'iagö danö, lö hadia ia. 9 Ba so ndra'ugö moroi sa, timba deu sabölö-bölö fabaya angi, timba lawuo ndra'ugö moroi sa, ba wangahawui tanö, na so'ö, ya'ugö ba sabölö andrö khöu fefu, ba soi soya, awöu. 10 Da'ö niŵa'ö Zo'aya, Yehowa: Na luo da'ö, ba so zi tesao ba dödöu ba si lö sökhi nikhoi dödöu, 11 ba ömane: "Da'usuwö zi fahalama, niha sahono-hono uhawui, niha si lö hadia ia; lö mu'öli nahiara, lö bawa göli ba lö lazi!"[5] 12 Ba wamaigi sahulu ndra'ugö, ba ba worabu, ba wolau ba gadudula andrö, si so niha zui, ba ba niha ni'ozaragö ba niha baero, niha sangalui ana'a, sowanua ba wusö danö.[6] 13 Seba ba Dedano ba saniaga andrö, banua Darisi ba ono zingo andrö khöra fefu, ba lamane khöu: Hadia, ba wamaigi sahulu ndra'ugö so'ö? Hadia ba worabu ö'owuloi zabölö khöu, ba wangoloi'ö firö ba ana'a, ba wolohe misa nibaya-baya, ahulua sebua? 14 Ba ama'ele'ö, ya'ugö ono niha, ömane khö Gogi andrö: Da'ö niŵa'ö Zo'aya, Yehowa: He wisa? Na luo ahono-hono ba danö mbanuagu Iraono Gizeraeli, na lö hadia ia khöra, 15 maoso ndra'ugö, ba so'ö moroi sa ba nahiamö ba wondrege yöu, ya'ugö ba soi soya andrö, awöu, oi si fakudo, ato sibai, ato zabölö, 16 ba moi'ö musuwö mbanuagu Iraono Gizeraeli, hulö lawuo, ba wangahawui tanö? Ba götö safuria andrö u'ohe miyaŵa ndra'ugö, ba wanuwö ba danögu, ena'ö aboto ba dödö niha baero ndra'odo, na u'oroma'ö ba khömö andrö, ya'ugö Gogi, wa ni'amoni'ö ndra'odo, ba zanehe ira.
17 Da'ö niŵa'ö Zo'aya, Yehowa: Hadia, ya'ugö nitörö ligu me föna, nifa'ema genonigu sama'ele'ö andrö, ba Ndraono Gizeraeli, si no mama'ele'ö me luo da'ö, ha me uga fakhe wa'ara, wa u'ohe khöra ndra'ugö sanuwö ya'ira?[7] 18 Ba na luo da'ö, na luo so Gogi, ba wanuwö Iraono Gizeraeli, iŵa'ö So'aya, Yehowa, ba humola wönugu ba nikhugu. 19 Ba wa'aukhu dödögu ba ba galitö wa'abao dödögu andrö uŵa'ö ia: Si ndruhu, na luo da'ö, ba itörö danö Ndraono Gizeraeli siheu sabölö-bölö. 20 Humisi dania fönagu gi'a ba nasi ba fofo ba dalu mbanua ba utu ndru'u ba danö ba kuökuö fefu, sanana ba danö, awö niha fefu ba guli danö; ba hili, ba adudu, ba kara sisindro, ba aso'a, ba öli kara fefu, ba adudu tou ba danö. 21 Ba ba hili andrö khögu fefu, ba muhededo ba zi'öli famununia, iŵa'ö So'aya, Yehowa; dozi ira, ba faoma lalau khö nawöra zi'öli. 22 Ba fahuhuodo khönia ba wökhö waba ba ba wa'aduwa ndro, ba deu sabölö-bölö ba ba deu kara; moteu alitö ba talö balera ia ba sabölö andrö khönia, awö soi soya andrö, awönia, ube'e.[8] 23 Ba u'oroma'ö, wa no sebua ndra'o, awö wa ni'amoni'ö ndra'o ba ufa'ele'ö ndra'o ba zanehe soi soya, ena'ö aboto ba dödöra, wa no ya'odo Yehowa.
Famotokhi ba gahe
editFabaliŵa lala
editOlayama Hezekieli: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö