Wikimedia Incubator

Wb/nia/Fama'ele'ö/2

< Wb | nia | Fama'ele'ö
Wb > nia > Fama'ele'ö > 2

Sura ba mbanua niha Keriso ba Nefeso

edit

I. 1 Ba mala'ika mbanua andrö, ba Nefeso, ba da'ö sura: Da'ö niŵa'ö zolohe tangania kambölö dofiandrö si fitu, sowaö-waö ba gotalua naha wandru ana'a andrö, si fitu:[1]

2 No u'ila mbua-buau andrö, ba fa'erege dödöu, ba fa'anau gölöu, awö wa tebai ötaha zi lö sökhi; ba no ötandraigö zanguma'ö sinenge ira, ba tenga sa ya'ia, ba no ösöndra, wa sofaya ira;[2] 3 ba no ötaha dödöu ba no ötaögö wamakao, börö döigu andrö, ba lö satage ndra'ugö. 4 Ba da'ö zi fatuwu khögu, ba khömö andrö, wa no öböhöli wa'omasiu ba mböröta andrö. 5 Andrö törö-törö tödöu hadia zi fahole khöu, ba falalini gera-erau, ba alui mbua-bua ba mböröta andrö; ba na lö ö'o'ö da'ö, ba möido khöu ba utuli'ö naha wandru andrö khöu ba nahania, na lö öfalalini gera-erau.[3] 6 Ba da'ö zi so khöu; ö'ogorofi wolau nikola'iti andrö, ni'ogorofigu göi.[4]

7 Si so tögi dalinga, ba yamufondrondrongo hadia niŵa'ö Geheha ba mbanua andrö: Ha niha zi möna ba ube'e önia mbua geu fangorifi andrö si so ba waradaiso andrö, khö Lowalangi![5]

Sura ba mbanua niha Keriso ba Zimina

edit

II. 8 Ba ba mala'ika mbanua andrö ba Zimina, ba da'ö sura: Da'ö niŵa'ö zi föföna andrö ba safuria, si no mate föna, ba si no auri iya'e.[6]

9 No u'ila wamakaomö andrö, ba fa'anumanamö—ba no so'ana'a ndra'ugö—ba fanandraŵaisi ya'ugö andrö, ba zanguma'ö niha Yehuda ira, ba tenga sa ya'ia, ha sekola Zatana ira.[7] 10 Böi ata'ufi hadia ia, nitaögöu dania. Hiza, ibe'e ba gurunga ösa ami Afökha, ena'ö tetandraigö ami, ba nifakao ami, fulu bongi. Böi faröi ndra'ugö, irugi wa'amate, ba ube'e khöu dakula fa'auri andrö.[8]

11 Si so tögi dalinga, ba yamufondrondrongo hadia niŵa'ö Geheha ba mbanua andrö: Ha niha zi möna, ba tebai i'alani fa'amate si samuza andrö.[9]

Sura ba mbanua niha Keriso ba Weregamo

edit

III. 12 Ba ba mala'ika mbanua andrö, ba Weregamo, ba da'ö sura: Da'ö niŵa'ö zi so gari satarö andrö, si faoma bawa.[10]

13 U'ila heza so nahau, ba zi so dadaoma Zatana andrö. Ba lö niböhöliu töigu andrö, ba lö ni'osilö'ögöu famati andrö khögu, me luo Gandrifa andrö, samaduhu'ö ya'o, si lö faröi andrö, nibunu ba khömi, ba zi so naha Zatana.[11] 14 Ba so ma'ifu zi fatuwu khögu, ba khömö andrö, me no so khöu ba da'ö zolo'ö famahaö Mbile'amo andrö. Samahaö Balaki andrö, ba wamobörö fangala föna Ndraono Gizeraeli, ba wemanga gö nadu ba ba wohorö.[12] 15 Ba so khöu göi zolo'ö famahaö nikola'iti andrö, si manö göi.[13] 16 Falalini gera-erau. Ba na lö da'ö, ba alio möido khöu, ba usuwö ira gari mbawagu andrö.[14]

17 Si so tögi dalinga, ba yamufondrondrongo hadia niŵa'ö Geheha, ba mbanua andrö: Ha niha zi möna, ba ube'e khönia "mana" si tobini andrö, ba ube'e khönia gara safusi, ba töi si bohou nisura ba dete gara andrö, si lö i'ila niha, baero zanema ya'ia andrö.[15]

Sura ba mbanua niha Keriso ba Diatira

edit

IV. 18 Ba ba mala'ika mbanua andrö ba Diatira, ba da'ö sura: Da'ö niŵa'ö Nono Lowalangi andrö, si so hörö andrö, si hulö hola-hola galitö, ba si so ahe, si hulö garamba.[16]

19 No u'ila mbua-buau andrö, ba fa'omasi andrö, ba famati andrö, ba fanolou andrö, ba fanaha tödö andrö, awö wa tedou mbua-buau safuria andrö, moroi ba zi föföna.[17] 20 Ba da'ö zi fatuwu khögu, ba khömö andrö, wa ötehe galawe andrö, Izebela, sanguma'ö sama'ele'ö ia, ba no samahaö enonigu andrö ba samaelungu ya'ira, ba wohorö, ba ba wemanga gö nadu.[18] 21 Ba no ufonoso ia, ena'ö ifalalini gera-erania, ba lö edöna ia ifalalini, ba wamöhöi fohorönia andrö ena'ö. 22 Hiza, utuli'ö tou ia ba zalo; ba awönia sohoröni ya'ia, ba ube'e ba wamakao sabölö-bölö, na lö lafalalini gera-erara, ba wamöhöi bua-buania andrö. 23 Ba ononia, ba ububunu ba ya'aboto ba dödö mbanua niha Keriso fefu misa, ya'o zanekhegö bua, awö dödö, ba udozigö ami wanulöni bua-bua zamösana.[19] 24 Ba uŵa'ö khömi, ya'ami zi tosai ba Diatira, ha wa'ato zi lö famahaö andrö, si lö aboto ba dödö fa'abakha dödö Zatana andrö, niŵa'öra: Lö'ö sa'ae ufonoro ami noro bö'ö. 25 Ba hadia zi so khömi, ba böi miböhöli, irege sodo.[20] 26 Ba ha niha zi möna, ba si lö mamöhöi halöŵö khögu, irugi gamozua, ba ube'e barö mbawania niha baero,[21] 27 ba ikubaloi ira si'o si'öli, si mane na larasa mbowoa tanö, si mane fanemagu göi mege khö Namagu;[22] 28 Ba ube'e khönia madala andrö.[23]

29 Si so tögi dalinga, ba yamufondrondrongo hadia niŵa'ö Geheha ba mbanua andrö![24]

Famotokhi ba gahe

edit
  1. ↑ Faigi 1:13-20
  2. ↑ TesI 1:3; Efes 5:11; YohI 4:1
  3. ↑ Faigi 1:20
  4. ↑ Faigi 2:15; Sin 139:21-22; FetII 2:2 b.t.
  5. ↑ Mat 11:15; Faigi 21:7; 22:2; MozI 2:9
  6. ↑ Faigi 1:17-18
  7. ↑ KorII 6:10; Faigi 3:9; Yoh 8:39,44
  8. ↑ Mat 10:28; FetI 4:12; KorI 9:25; Yak 1:12
  9. ↑ Faigi 20:6,14
  10. ↑ Faigi 1:16
  11. ↑ Faigi 3:8
  12. ↑ MozIV 31:16; Yud 11
  13. ↑ Faigi 2:6
  14. ↑ Yes 11:4; Faigi 19:15
  15. ↑ Yoh 6:32; Yes 62:2
  16. ↑ Faigi 1:14-15; HalZin 16:14
  17. ↑ Heb 6:10
  18. ↑ RazI 16:31; MozII 34:15
  19. ↑ RazII 10:7-18; Sin 7:10; Mat 16:27; Faigi 20:12-13
  20. ↑ Faigi 3:11
  21. ↑ Faigi 20:4; 22:5; KorI 6:2
  22. ↑ Faigi 19:15; Sin 2:8-9
  23. ↑ FetII 1:19
  24. ↑ Faigi 3:6

Fabaliŵa lala

edit

Olayama Zura Fama'ele'ö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Fama%27ele%27ö/2&oldid=6463709"