Wikimedia Incubator

Wb/nia/Fama'ele'ö/11

< Wb | nia | Fama'ele'ö
Wb > nia > Fama'ele'ö > 11

Oroisa ba wanu'a osali

edit

I. 1 Ba labe'e khögu zukhu, hulö zi'o, ba lamane khögu: Faoso ba su'a gosali Lowalangi andrö, awö naha wame'e sumange, awö zangalulu bakha;[1] 2 ba olayama gosali tanö baero, ba be'e baero, ba böi su'a ia, me nibe'e ba danga niha baero, ba lahundragö dania mbanua ni'amoni'ö andrö, öfa wulu a rua waŵa wa'ara.[2]

Samaduhu'ö si darua ba si göna ira

edit

II. 3 Ba ube'e ba zamaduhu'ö andrö khögu, si darua, ba mama'ele'ö ira, hönö a dua ngaotu a önö ngafulu wongi wa'ara, goni-goni mbarura.[3] 4 Da'ö zi dua geu töla falo andrö, ba si dombua naha wandru andrö, si so föna Zo'aya tanö.[4] 5 Ba na so zamakiko ya'ira ena'ö, ba i'otarai mbawara alitö, ba i'a zi fa'udu khöra; na so zamakiko ya'ira ena'ö, ba si manö wamununia.[5] 6 No mutehe khöra andrö wokusi banua si yaŵa, fa lö aekhu ba danö deu, götö mbaŵa wama'ele'öra andrö; ba no mutehe khöra nidanö andrö, ba wamali'ö do ya'ia, ba famatörö ba danö famakao, fefu, hadia ia, ha wa'asese zomasi ira.[6]

7 Ba na no la'o'ozui wamaduhu'öra andrö, ba isuwö ira saliŵa-liŵa ba danö andrö, si otarai moroi si tou gawuwukha, ba ya'ia zi möna, ibunu ira.[7] 8 Ba botora, ba tou ba newali so, ba mbanua sebua andrö, nifotöi Sodoma ba tanö Miserayi, amaedola, ba niforöfa göi So'aya ya'ira.[8]

9 Ba la'ila mbotora andrö niha, ha mado ira, ba ha iwa, ba hadia lira, ba ha soi, tölu ngaluo a matonga wa'ara, ba lö labe'e niko'o mbotora andrö.[9] 10 Ba omuso dödö niha, sowanua ba guli danö, ba khöra andrö, owua-wua dödöra, ba faoma mama'ohe'ö buala ira khö nawöra, me no lafakao zowanua ba guli danö sama'ele'ö andrö, si darua.[10]

11 Ba me no aefa zi dua ngaluo a matonga, ba isaŵa ira noso fangorifi, moroi ba Lowalangi, ba muzizio ira, ba ihawui fa'ata'u sabölö-bölö zamaigi ya'ira. 12 Ba larongo li sebua, moroi ba mbanua si yaŵa, imane khöra: Mi'ae miyaŵa ba da'e! Ba möi ira yaŵa ba zorugo, ba lawuo; ba lafaigi ira si fa'udu khöra andrö.

13 Ba faudu da'ö, ba so ziheu sabölö-bölö, ba sambua ni'ofulu mbanua adudu, ba fitu ngahönö zi mate niha, ba ziheu andrö, ba si tokea zi tosai, ba lafosumange Lowalangi zorugo andrö.[11] 14 No numalö wa'afökhö fanete zi föföna andrö, hiza, alio itörö fa'afökhö fanete zi dua balö andrö.[12]

Ilau dorofe mala'ika fanete zi daönö

edit

III. 15 Ba ilau dorofe mala'ika fanete zi daönö, ba terongo li segebua ba zorugo, lamane: No möi khö Zo'aya ya'ita wamatörö andrö, ba guli danö, ba khö nibayoini andrö khönia, ba razo ia, irugi zi lö aetu.[13]

16 Ba latuhi danö, lafalögu tou ira satua andrö, si dua wulu a öfa, sidadao föna Lowalangi, ba dadaomara andrö, mangalulu ira khö Lowalangi,[14] 17 lamane: Ma'andrö saoha gölö khöu, ya'ugö So'aya, Lowalangi, samatörö fefu, hadia ia, si so, ba si no so föna, me no öhalö khöu wa'abölö andrö khöu, si no ebua, ba me no razo ndra'ugö.[15]

18 Ba no mofönu soi niha baero; ba no tesao wönumö, ba no irugi inöto, ba zi mate andrö, ena'ö tehuku ira, ba ena'ö öbe'e luo andrö, ba genoniu andrö, sama'ele'ö, awö ni'amoni'ö, awö zangata'ufi töimö andrö, he side-ide, ba he sebua, ba ena'ö öfakiko zamakiko uli danö andrö.[16]

19 Ba tebokai gosali Lowalangi andrö, ba zorugo, ba oroma dawöla gamabu'ula li andrö khönia, ba gosalinia andrö; ba so gari mbanua, ba li niha, ba fe'ugu-ugu mbanua, ba siheu, ba teu kara sabölö-bölö.[17]

Famotokhi ba gahe

edit
  1. ↑ Faigi 21:15; Sakh 2:1 b.t.; Hes 43:13
  2. ↑ Luk 21:24; Faigi 13:5; Dan 8:13 b.t.
  3. ↑ Faigi 12:6,14; Yoel 1:13
  4. ↑ Sakh 4:3,11,14
  5. ↑ RazII 1:10,12; Yer 5:14
  6. ↑ RazI 17:1; MozII 7:19
  7. ↑ Faigi 13:1-8; 17:8; Dan 7:21
  8. ↑ Faigi 16:19; Sin 79:2; KorI 2:8
  9. ↑ Dan 7:21
  10. ↑ Esit 9:19
  11. ↑ Faigi 9:20; 16:18; Mat 27:52
  12. ↑ Faigi 9:12
  13. ↑ Faigi 10:7; 12:10; Dan 2:44; 7:27
  14. ↑ Faigi 4:4,10
  15. ↑ Faigi 4:8; 19:4,6
  16. ↑ Faigi 6:17; 20:12 b.t.; 14:7; Dan 7:9 b.t.
  17. ↑ Faigi 15:5,8; Heb 9:4; Faigi 16:18,21

Fabaliŵa lala

edit

Olayama Zura Fama'ele'ö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Fama%27ele%27ö/11&oldid=6229894"