Wikimedia Incubator

Wb/nia/Fama'ele'ö/19

< Wb | nia | Fama'ele'ö
Wb > nia > Fama'ele'ö > 19

Fanunö zi so ba zorugo

edit

I. 1 Me aefa da'ö, ba urongo, ba hulö zebua li niha sato, ba zorugo, lamane: "Haleluya, khö Lowalangida wangorifi andrö, awö lakhömi andrö, awö wa'abölö andrö,[1] 2 me no si ndruhu ba me no satulö wanguhukunia andrö: noa sa ihuku zohorö andrö, sebua, si no mamakiko uli danö, ba wohorö-horönia andrö, ba no ilau mbalö ndro genoninia andrö, ba dangania."[2] 3 Ba lamane zui: "Haleluya, numalö miyaŵa zimbonia andrö, irugi zi lö aetu."[3]

5 Ba latuhi danö satua andrö si dua wulu a öfa, awö zaliŵa-liŵa ba danö andrö si öfa nga'eu, mangalulu ira khö Lowalangi, sidadao ba dadaoma andrö, lamane: Yaduhu, Haleluya![4] 5 Ba so li, si otarai dadaoma andrö, imane: Misuno Lowalangida, dozi ami motöi enoninia, sangata'ufi ya'ia, he iraono, ba he satua.[5] 6 Ba urongo, ba hulö li zato, ba hulö wegoso-goso nidanö sebua, ba hulö we'ugu-ugu mbanua, sabölö-bölö, lamane: "Haleluya, me no razo Zo'aya, Lowalangida andrö, samatörö fefu hadia ia![6] 7 Data'omusoi'ö dödöda, ba ta'owua-wua'ö dödöda, ba tafosumange ia; me no irugi walöŵa Nono mbiri-biri andrö, ba me no ifa'anö ia ngambatönia,[7] 8 ba no tetehe khönia, ena'ö i'onukha zi ndruhu muko si sökhi, sihaga; muko si sökhi andrö sa, ba ya'ia wa'atulö niha ni'amoni'ö andrö."[8]

9 Ba imane khögu: Sura: Ya'ahowu nikaoni ba walöŵa Nono mbiri-biri andrö! Ba imane khögu: Da'ö li Lowalangi andrö, si ndruhu.[9]

Itenaŵa wangalulu khönia mala'ika

edit

II. 10 Ba utuhi danö föna gahenia, ba wangalulu khönia. Ba imane khögu: Böi! Awöu enoni ndra'odo, ba awö dalifusöu andrö, si so famaduhu'ö Yesu andrö. Khö Lowalangi angalulu. Famaduhu'ö Yesu sa, ba ya'ia Geheha wama'ele'ö andrö.[10]

Ilaŵa Keriso zaliŵa-liŵa ba danö awö zama'ele'ö

edit

III. 11 Ba u'ila, teboka mbanua si yaŵa, ba hiza kudo safusi ba si fakudo yaŵa, ba "Si lö faröi" ba "Si ndruhu" döinia, ba atulö wanguhukunia ba fanuwönia.[11] 12 Ba no hola-hola galitö hörönia, ba ba högönia, ba no oya dakula, so döinia nisura, si lö i'ila niha, ha ya'ia zangila;[12] 13 ba barunia, ba no mu'ungugö ba ndro, ba töinia, ba "Taroma li Lowalangi".[13]

14 Ba la'o'ö ia sanuwö andrö, ba zorugo, ba hulu kudo safusi, si ndruhu muko safusi mbarura. 15 Ba i'otarai mbawania gari satarö, ena'ö ibe'e famunu soi andrö. Ba ikubaloi dania ira, si'o si'öli, ba ihundragö wolazi nagu fönu saukhu andrö, khö Lowalangi, samatörö fefu, hadia ia.[14] 16 Ba so döinia, nisura ba dete mbarunia ba ba zolania: "Razo razo ba So'aya sokhö."[15]

17 Ba u'ila mala'ika, samösa, si so ba luo, ba mu'ao ia, ebua li, imane ba wofo fefu, sihombo ba dalu mbanua: Mi'aine, mi'owuloi ami, ba gowuloa sebua andrö, khö Lowalangi,[16] 18 ba wemanga nösi razo, awö nösi gumandra, awö nösi zabölö andrö, awö nösi kudo, fabaya si fakudo yaŵa, awö nösi zi tenga sawuyu, fefu, fabaya sawuyu, ba ösi ndraono, awö nösi zatua.

19 Ba u'ila me owulo ira zaliŵa-liŵa ba danö andrö razo ba guli danö, awö zabölö andrö khöra, ba wasuwöta ba zidadao ba kudo andrö ba ba zabölö andrö khönia.[17] 20 Ba te'ala zaliŵa-liŵa ba danö andrö labe'e, fabaya sama'ele'ö sofaya andrö, samazökhi tandra andrö, mege, fönania, famaelungu zi no manema tandra zaliŵa-liŵa ba danö andrö, si no mangalulu ba wamaedonia andrö; tetibo'ö auri zi darua andrö ba mbaŵa alitö andrö, sihola-hola talö balera.[18] 21 Ba tanö bö'ö andrö, ba nibunu gari zidadao ba kudo andrö, gari si otarai mbawania, ba abuso wofo fefu ösira andrö.

Famotokhi ba gahe

edit
  1. ↑ Faigi 12:10
  2. ↑ Faigi 16:7; 17:1 b.t.
  3. ↑ Faigi 14:11; 18:9,18; Yes 34:10
  4. ↑ Faigi 4:4,9,10
  5. ↑ Sin 134:1
  6. ↑ Faigi 14:2; 11:15,17
  7. ↑ Sin 118:24; Faigi 21:2,9
  8. ↑ Faigi 3:5; 15:6; Sin 132:9
  9. ↑ Faigi 14:13; Mat 22:2
  10. ↑ Faigi 22:8 b.t.; HalZin 10:25,26; Faigi 12:17
  11. ↑ Faigi 6:2; 3:14
  12. ↑ Faigi 1:14
  13. ↑ Yes 63:1–3. Yoh 1:1
  14. ↑ Faigi 1:16; 2:27; 14:19; Yes 63:2 b.t.
  15. ↑ Faigi 17:14
  16. ↑ Hes 39:4,17 b.t.
  17. ↑ Faigi 13:1; 17:12 b.t.
  18. ↑ Faigi 16:13; 13:11–17; 20:10–14; Dan 7:11

Fabaliŵa lala

edit

Olayama Zura Fama'ele'ö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Fama%27ele%27ö/19&oldid=6229902"