Wikimedia Incubator

Wb/nia/Fama'ele'ö/14

< Wb | nia | Fama'ele'ö
Wb > nia > Fama'ele'ö > 14

Ono mbiri-biri ba samosumange ya'ia

edit

I. 1 Ba u'ila, ba hiza Nono mbiri-biri andrö, ba hili Ziona so, ba otu a öfa wulu a öfa ngahönö nawönia, nisura ba gangangora töinia ba töi Namania andrö.[1]

2 Ba urongo li moroi ba mbanua si yaŵa, hulö wegoso-goso nidanö sebua, ba hulö we'ugu-ugu mbanua sabölö-bölö; ba hulö li mbiola, na lalau, li andrö nirongogu.[2] 3 Ba manunö ira, sinunö si bohou, föna dadaoma andrö, ba föna zaliŵa-liŵa ba danö andrö si öfa nga'eu, ba föna zatua andrö. Ba lö sangila mamodomaesi sinunö andrö, ha si otu a öfa wulu a öfa ngahönö andrö, nihöli moroi ba guli danö.[3] 4 Ya'ira da'ö zi lö si fabaya hadia ia, ba ndra alawe; amaedola nono alawe sa ira. Ya'ira zolo'ö Ono mbiri-biri andrö, heza möi. Ya'ira nihöli ba niha, nibe'e si a'a khö Lowalangi, ba khö Nono mbiri-biri andrö,[4] 5 ba lö mu'ila ba mbewera waya. Si lö sinegu sa ira.[5]

Datölu mala'ika samangelama

edit

II. 6 Ba u'ila mala'ika bö'ö sihombo ba dalu mbanua si yaŵa, si so turia somuso dödö si lö aetu ba wanuriagö ba zi so ba guli danö, ba ngawalö soi fefu, ba ba ngawalö niwa, ba ba ngawalö li, ba ba ngawalö mado fefu,[6] 7 no ebua linia, imane: Mi'ata'ufi Lowalangi, ba mibe'e khönia zumange, me no irugi inötö wanguhuku andrö khönia, ba mi'angalulu khö zamazökhi banua si yaŵa, ba tanö, ba asi, ba umbu nidanö andrö.[7]

8 Ba i'o'ö mala'ika bö'ö, samösa tö, imane: No adudu, no adudu Mbabilona sebua andrö, si no mamabadugö ba ngawalö soi niha fefu agu wönu andrö, ba wohorönia.[8] 9 Ba i'o'ö ira mala'ika bö'ö, datölu möi da'ö, mu'ao ia, ebua linia, imane: Na so zangalulu ba zaliŵa-liŵa ba danö andrö, ba ba wamaedonia, nifatöfa tandra andrö ba gangangonia,[9] 10 ba ma ba dete dangania, ba ibadu göi wöfö nagu wönu andrö, khö Lowalangi, si no mufazökhi, lö mufaruka, ba mako wönunia andrö, ba nifakao alitö ba talö balera ia, föna mala'ika ni'amoni'ö ba föna Nono mbiri-biri andrö.[10]

11 Ba numalö dania miyaŵa zimbo ba wamakao ya'ira andrö, irugi zi lö aetu. Ba lö folombase khöra, bongi ma'ökhö, khöra si no mangalulu ba zaliŵa-liŵa ba danö andrö ba ba wamaedonia, awö zi no mufatöfa tandra döinia andrö.[11]

12 Ba da'e so wa'anau gölö ni'amoni'ö andrö, solo'ö oroisa Lowalangi andrö, ba si lö mamulö'ö famati andrö khö Yesu.[12]

Fa'odöŵa-döŵa dödö niha si no mate

edit

III. 13 Ba urongo li moroi ba mbanua si yaŵa, imane: Sura: Ya'ahowu zi no mate, si mate ba khö Zo'aya, i'otarai da'e. Si ndruhu, iŵa'ö Eheha, ena'ö molombase ira me no aefa wa'erege dödöra andrö; i'o'ö sa ira bua-buara.[13]

Famasi

edit

IV. 14 Ba u'ila, ba hiza lawuo safusi ba so zidadao ba dete lawuo andrö, si hulö Nono Niha, so ba högönia dakula ana'a ba ba dangania, ba sabi satarö.[14]

15 Ba so mala'ika bö'ö, si otarai gosali andrö, mu'ao ia, ebua linia, ba zidadao ba lawuo andrö, imane: Fatörö zabimö andrö ba amasi, noa sa irugi inötö wamasi, me no oköli-köli mbasitö andrö ba danö![15]

16 Ba ifatörö ba danö zabinia sidadao ba lawuo andrö, ba tebasi danö.[16]

Faneteu bua nagu

edit

V. 17 Ba so mala'ika bö'ö, si otarai gosali andrö, ba zorugo, so khönia göi zabi satarö;[17] 18 ba so mala'ika bö'ö, si otarai naha wame'e sumange andrö, ba no mube'e ba dangania galitö andrö, ba mu'ao ia, ebua linia, ba zi so sabi satarö andrö, imane: Fatörö zabimö satarö andrö, ba taba mbua nagu ba döla, ba guli danö, me no asoso mbuania andrö![18]

19 Ba ifatörö ba danö zabinia mala'ika andrö, itaba mbua nagu andrö, ba guli danö, ba itibo'ö ba wolazi sebua andrö, fönu Lowalangi.[19] 20 Ba baero mbanua tehundragö wolazi andrö, ba mangele ndro, moroi ba wolazi andrö, irugi kaka mbawa kudo, felendrua ngaluo fofanö wa'aröu.[20]

Famotokhi ba gahe

edit
  1. ↑ Faigi 5:6 b.t.; 7:3,4
  2. ↑ Faigi 1:15; 5:8; 19:6
  3. ↑ Faigi 5:9
  4. ↑ Faigi 3:4; KorII 11:2
  5. ↑ Efes 5:27; Sef 3:13
  6. ↑ Mat 24:14
  7. ↑ Faigi 15:4; HalZin 14:15; Sin 146:6
  8. ↑ Faigi 17:2,4,5; 18:2,3
  9. ↑ Faigi 13:15-17
  10. ↑ Faigi 16:19; 19:20; Sin 75:9; Mar 9:44
  11. ↑ Faigi 19:3; Yes 34:9,10; Mat 25:46
  12. ↑ Faigi 13:10; 22:14
  13. ↑ Faigi 19:9; Yes 57:1,2; Hebr 4:9,10
  14. ↑ Faigi 1:13; Dan 7:13 b.t.
  15. ↑ Yoel 3:13
  16. ↑ Mat 13:39
  17. ↑ Faigi 15:5
  18. ↑ Faigi 16:7
  19. ↑ Faigi 19:15
  20. ↑ Hes 32:6; Yes 63:3 b.t.

Fabaliŵa lala

edit

Olayama Zura Fama'ele'ö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Fama%27ele%27ö/14&oldid=6229897"