Wb/nia/Moze V/8

Fa'oböwö Lowalangi ba fangandrö saoha gölö

1 Oroisa andrö fefu, nifa'emagu khömi ma'ökhö, ba mi'o'ö, ena'ö auri ami ba ena'ö ato ami, ba ena'ö mirugi danö andrö ba wangokhögö ya'ia, tanö andrö nifabu'u Yehowa khö ndra tuami, fahölusa.

2 Törö-törö tödöu wamasao Lowalangiu, Yehowa ya'ugö, no öfa wulu fakhe wa'ara, ba danö si mate andrö, ba döröŵau andrö, fadoro, ba wangöhöndrögö ya'ugö ba ba wanandraigö ya'ugö, ena'ö isöndra he wisa dödöu, na edöna ö'o'ö goroisania, ba na lö'ö.

3 No ihöndrögö ndra'ugö, ifatörö khöu lofo, ba aefa da'ö, ba ibe'e öu "mana" andrö, si lö mirai mila, he ira tuau, ba wama'ele'ö khöu, wa tenga ha ba gönia auri niha, wa tola göi fangorifinia hadia ia daroma li, si otarai mbawa Yehowa.. 4 Nukhau andrö, ba lö sadudu, ba aheu, ba lö sabao, si öfa wulu fakhe andrö..

5 Ba yafaduhu sa'ae dödöu, i'ohe ba zi sökhi ndra'ugö Lowalangiu, Yehowa, nifamatörö si'aikö nama ononia. 6 Ba o'ö goroisa Lowalangiu, Yehowa andrö, wanörö lala andrö khönia, awö wangata'ufi ya'ia.

7 Ba danö si sökhi sa i'ohe ndra'ugö Lowalangiu, Yehowa, ba danö si so mbombo ba umbu nidanö ba baŵa, so'ulu ba zalo'o ba so'ulu ba hili; 8 tanö si so fakhe ba si so rigi ba agu ba bua ara ba dalimo, tanö si so falo ba si so ŵe ŵani; 9 tenga tanö sambö-ambö balazo, no tanö si so manö fefu hadia ia, tanö sosi'öli kara ba nikharu töla garamba ba hili.

10 Ba na no manga'ö dania, na no abuso'ö, ba ösuno Lowalangiu Yehowa, börö danö si sökhi andrö nibe'enia khöu..

Böi olifu ira wa'ebua dödö Lowalangi andrö

11 Faigi sibai, fa böi olifu'ö Lowalangiu, Yehowa, fa böi öbato wolo'ö oroisania andrö, awö huku andrö, awö gamakhoita, nifa'emagu khöu ma'ökhö.

12 Na abuso ndra'ugö dania ba ölau khöu nomo si sökhi, 13 na itugu oya zaŵiu ba biri-birimö ba na fahöna khöu wirö ba ana'a, na tedou fefu hadia ia zi so khöu, 14 ba böi fayaŵa dödöu, ba böi olifugö'ö Lowalangiu, Yehowa, si no mangeheta ya'ugö ba danö Miserayi andrö, ba danö, ba zi no möi'ö sawuyu, 15 si no mamatörö ya'ugö ba danö si mate andrö, sebolo sibai ba sata'u ita, ba zi so ulö sosöfu ba tongo, ba danö si no oköli-köli ba si lö idanö, si no mame'e öu idanö sangumbu-ngumbu moroi ba gara sabe'e,, 16 si no mame'e öu "mana" andrö, ba danö si mate, ö si lö larai mila ira tuau, ba wangöhöndrögö ya'ugö ba ba wanadraigö ya'ugö, ena'ö ihaogö khöu ba götö dania, 17 ba böi ömane dödöu: Fa'abölögu ba fa'abe'e dangagu mbörö, wa so khögu wo'ana'a andre.

18 Törö tödöu Lowalangiu, Yehowa, me no ya'ia zame'e fa'abölö, ba wangalui ana'a, ba wamalua amabu'ula linia andrö, si no möi ba hölu ia khö ndra tuau, si mane ma'ökhö.

19 Ba na olifu'ö zui Lowalangiu, Yehowa, wolo'ö Lowalangi bö'ö, na öfosumange da'ö, ba na mangalulu'ö khöra, ba ma'ifu lö ubini'ö khömi ma'ökhö, wa si tekiko ami dania. 20 Si mane niha baero andrö, nifakiko Yehowa fönami, si manö göi wa'atekikomi, fotu; me lö nifondrondrongomi li Lowalangimi, Yehowa.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö