Wb/nia/Moze V/31

Iheta ia ba halöŵönia Moze ba ifataro Yosua andrö solohe sato

I. 1 Ba möi muhede ba Ndraono Gizeraeli fefu Moze, 2 imane khöra: Otu a dua wulu fakhe wa'aragu ba guli danö iada'e, ba si tebai fao-fao sa'ae ndra'odo; ba noa göi imane khögu Yehowa; Lö ö'ötö Yoridano andrö!

3 Lowalangiu, Yehowa zangötö fönau, ba ya'ia zangohori niha andrö fönau, ba ö'ila ö'okhögö danöra. Yosua andrö zangolöi'ö ya'ugö; dali niŵa'ö Yehowa. 4 Ilau khöra Yehowa wolaunia me ifakiko razo Ndraono Gamori andrö, Sihona ba Ogi, fabaya tanöra. 5 Ibe'e ba dangami ira Yehowa, ba mi'o'ö sibai goroisa andrö, mibe'enia khömi, wolau khöra. 6 Böi atalö dödömi, mi'abe'e'ö ami! Böi mi'ata'ufi ba böi toke'a ami khöra! Fao sa khöu Lowalangiu, Yehowa, lö iböhöi ndra'ugö, lö faröi ia khöu.

7 Ba humede Moze khö Yosua ba imane khönia, ba zi so Ndraono Gizeraeli, fefu. Böi atalö dödöu, abe'e'ö ndra'ugö! Ya'ugö sa zolohe ya'ira ba danö andrö, nifabu'u Yehowa fame'e khö ndra tuara mege, si no möi ba hölu ia khöra, ba ya'ugö zamaosa khöra. 8 Ba Yehowa zowaö-waö fönau, itolo ndra'ugö, lö iböhöi'ö ba lö faröi ia khöu. Böi ata'ufi ba böi abu dödöu.

Ibe'e ba danga gere zura goroisa ba wombaso ba zato

II. 9 Ba isura goroisa andrö Moze ba ibe'e ba danga gere andrö, ono Lewi, sangosa'ö tawöla zura goroisa Yehowa andrö, ba ba danga zalaŵa Ndraono Gizeraeli fefu.

10 Ba iŵa'ö li khöra Moze, imane: Na no irugi mewitu fakhe, na döfi wangefa andrö, ba na owasa nose daha geu, 11 na möi falukha khö Lowalangiu, Yehowa, Ndraono Gizeraeli fefu, ba naha andrö nituyunia dania, ba öbaso zura goroisa andre, öfarongogö khöra. 12 Falukha'ö zato, ira matua ba ira alawe ba iraono, awö niha bö'ö andrö khöu, si so ba mbanuami, ena'ö larongo ba ena'ö latöngöni, ba wangata'ufi Lowalangimi, Yehowa, ba ba wolo'ö sibai taroma li oroisa andre fefu. 13 Ba iraonora andrö, si lö mangila ya'ia na, ba ndramufondrondrongo, ena'ö lafahaö ira ba wangata'ufi Lowalangimi, Yehowa, götö we'asomi ba danö andrö, ba zi möi ami miyefo Yoridano, ba wangokhögö ya'ia.

Oroisa Yehowa khö Moze ba wanura sinunö fangona andrö, famaduhu'ö ba zato

III. 14 Ba imane Yehowa khö Moze: Hiza, no irugi inötö wa'amateu; hede khö Yosua ba mi'ae ba nose wama'ele'ö, ena'ö uŵa'ö li khönia. Ba möi ndra Moze Yosua, lasaŵa baose wama'ele'ö.

15 Ba oroma Yehowa baose, ba mboto lawuo andrö, ba i'agö zinga mbawandruhö nose boto lawuo andrö. 16 Ba imane Yehowa khö Moze: Hiza, si möi mörö ndra'ugö ba ngai ndra tuau; ba maoso dania niha andre ba lafosumange Lowalangi bö'ö, ba khöra, ba danö andrö ba zi möi ira, ba la'erogö ndra'odo, ba fawu'usa li andrö khögu, si fawu'u li ndra'o khöra, ba ladudugö. 17 Ba na luo da'ö, ba tesao wönugu khöra ba faröi ndra'o khöra ba ubini'ö mbawagu khöra, ba famakiko lasaŵa, oya ngawalö zi göna ira famakao ba fangabu dödö. Ba na luo da'ö, ba lamane: Hadia, tenga andrö göna ita famakao andrö, me lö'ö sa'ae Lowalangida ba khöda? 18 Ba ya'odo, ba ufaulugö ubini'ö mbawagu, na luo da'ö, börö zi lö sökhi andrö fefu, nilaura, me no lasaŵa Lowalangi bö'ö.

19 Ba mitanö ba zura khömi zinunö andrö, ba mifahaö Ndraono Gizeraeli ba da'ö, böi aefa ba mbewera, ena'ö amaedola zi so ba mbörö khögu ba Ndraono Gizeraeli zinunö andrö.

20 U'ohe sa ira ba danö andrö, nifabu'ugu khö ndra tuara fahölusa, tanö si falawu susu ba ŵe ŵani, ba manga ira ba abuso ba esolo, ba aefa da'ö, ba la'otahögö Lowalangi bö'ö ba lafosumange da'ö, ba ya'odo, ba si lö ba dödöra dania, ba fawu'usa li andrö khögu, ba adudu labe'e.

21 Ba na oya dania zi göna ira famakao ba fangabu dödö, ba sinunö andrö dania, wamaduhu'ö khöra lö'ö sa atö aefa-aefa dania ia ba mbewe madoura — u'ila sa gera-erara, si so ba dödöra ma'ökhö [sa'ae], he lö ni'ohegu ya'ira na ba danö andrö, nifabu'ugu khö ndra tuara, fahölusa.

22 Ba me luo da'ö itanö ba zura zinunö andrö Moze, ba ifahaö Ndraono Gizeraeli ba zinunö andrö. 23 Ba iŵa'ö li khö Yosua, ono Nuni andrö, [Lowalangi], imane khönia: Böi atalö dödöu, abe'e'ö ndra'ugö! me ya'ugö zolohe Iraono Gizeraeli ba danö andrö, nifabu'ugu khöra fahölusa, ba ya'o zanolo ya'ugö.

Sura goroisa andrö, ba nibe'e barö dawöla andrö

IV. 24 Ba me no ahori itanö ba zura daroma li oroisa andrö fefu Moze, 25 ba ibe'e li ba nono Lewi andrö, sangosa'ö tawöla andrö, naha zura goroisa Yehowa, imane:

26 Mihalö zura goroisa andre ba mibe'e ba ngai dawöla naha zura goroisa Lowalangimi, Yehowa, ena'ö amaedola zi so ba mbörö ia ba khömi, ba da'ö. 27 Noa sa u'ila wanandrou ba fa'abe'e mbörö du'imö. He iada'e sa'ae, ba we'asogu na ba khömi, ba noa sa'ae te khömi niŵa'ö Yehowa; ba mendrua manö dania, na no mate ndra'o!

28 Mifalukha'ö khögu zalaŵa madomi fefu, awö gumandru khömi, ena'ö ufarongogö khöra daroma li andre ba ena'ö ukaoni si so ba mbörö ba khöra andrö mbanua si yaŵa ba tanö tou. 29 U'ila sa, na no mate ndra'o dania, ba mifakiko manö wolau, wondröi lala andrö, nituturugu khömi; ba göna dania ami famakao andrö, me solau si fatuwu khö Yehowa ami, wangandrö fönunia folau-laumi andrö.

30 Ba ahori ifarongogö ba Ndraono Gizeraeli fefu daroma li sinunö andre Moze, imane:

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö