Wb/nia/Moze V/2

Fanolo Lowalangi ya'ira ba Ndraono Moabi ba ba Ndraono Gamoni

I. 1 Ba tafuli ita, tasaŵa danö si mate, lala ba nasi zukhu tatörö, dali niŵa'ö Yehowa khöda.

Ba me no ara ita wamasui hili Ze'ira andrö, 2 ba imane khögu Yehowa: 3 Noa sa'ae wa'ara wamasuimi hili andrö, miyöu sa'ae misaŵa. 4 Ba öbe'e li ba zato, ömane: So fönami wanörö tanö dalifusömi andrö, tanö ndraono Gezau ba Ze'ira, ba ata'u ira ami dania; 5 ba mi'angelama sibai, fa böi misuwö ira, samba lahe sa lö ube'e khömi tanöra; hili Ze'ira andrö, ba noa sa utehe khö Gezau, tana khönia ba ba nga'ötönia. 6 Ömi, ba mi'öli khöra, mibe'e gana'a, soguna ömi; ba ömi idanö, ba mi'öli göi khöra. 7 Noa sa ato ifahowu'ö ndra'ugö Lowalangiu Yehowa, ba nilaumö, fefu; no irorogö ndra'ugö ba wanöröu tanö si mate andre, si no ebolo sibai: öfa wulu fakhe iada'e zi no fao-fao khöu Lowalangiu Yehowa; lö hadia ia zambö khöu.

8 Ba me taröi dalifusöda andrö, iraono Gezau, ba Ze'ira, wanörö lala ba danö si mate, moroi ba Gelata ba ba Gesionogeberi, ba tadölö ita ba danö si mate andrö, tanö Ndraono Moabi. 9 Ba imane khögu Yehowa: Böi suwö Ndraono Moabi andrö, böi fasuwö ami; ma'ifu sa lö ube'e khöu tanöra, me no utehe tana ba nga'ötö Loti andrö Gari andrö. 10 (Meföna, ba Dawa Gemi zi so ba danö andrö, niha sebua sibai, ba si no ato, salaŵa boto, timba nga'ötö Genaki andrö. 11 Dawa Refa'i göi ira, si mane nga'ötö Genaki andrö, ba töira ba Ndraono Moabi, ba Dawa Gemi. 12 Ba sowanua ba Ze'ira meföna, ba Dawa Hori, ba latimba da'ö iraono Gezau ba lahori, ba fangalira ba danö, ba ya'ia ndraono Gezau andrö; nifolau Ndraono Gizeraeli ba danö andrö, nibe'e Yehowa tana khöra).

13 Ba mifazaŵa sa'ae ami ba mi'ötö mbombo Saredi andrö! Ba ta'ötö mbombo Saredi. 14 Tölu ngafulu a ŵalu fakhe ita ba lala, i'otarai Gadesi Mbarenea, irugi wangötöda mbombo Saredi andrö, irege no ahori mate ba golombaseŵa zi sagötö niha andrö, sabölö andrö, itörö niŵa ö Yehowa khöra, si no möi ba hölu ia. 15 Udura na göi danga Yehowa, ba wangohori ya'ira ba golombaseŵa, irege samösa lö si tosai. 16 Dozi solohe baluse ba khöra, ba no mate.

17 Ba humede khögu Yehowa, imane: 18 "Ötörö iada'e danö Ndraono Moabi, Ari andrö; 19 ba ahatö sibai dania ndra'ugö ba Ndraono Gamoni andrö; böi suwö ira, böi fa'udu ami! Ma'ifu sa lö ube'e khöu tanö Ndraono Gamoni, me no utehe tana ba ma'uwu Loti andrö mitou."

20 Ya'ia göi, ba tanö Ndrawa Refa'i laŵa'ö; meföna, ba Dawa Refa'i zi so ba danö; Dawa Zamisumi labe'e töira Iraono Gamoni. 21 Niha sebua sibai ba sato, salaŵa boto, si mane nga'ötö Genaki andrö. Ba no ihori ira fönara Yehowa, tobali Iraono Gamoni zi okhögö tanö, la'iagö fangalira, 22 irege ma'ökhö andre, nifolaunia ba ndraono Gezau, ba Ze'ira, wangohori fönara Dawa Hori andrö, wa tobali la'okhögö danö, ba la'iagö fangalira, irege ma'ökhö andre.

23 Ba Dawa Gawi andrö göi, si fahalama, irugi tanö ba Gasa, ba Dawa Gafatori, si otarai Gafatori, zangohori, ba la'iagö danö, fangalira.

Fangalanira Sihona razo Hesibona

II. 24 Ba mifazaŵa ami ba mi'ötö Garono. Hiza, ube'e ba dangau Ndraono Gamori andrö, Sihona, razo ba Hesibona, fabaya tanönia; börötaigö okhögö [danö] ba suwö ia! 25 I'otarai da'e, ba uhawui fa'ata'u ba fehokha mbu ba khöu andrö fefu soi ba guli danö, fefu gofu heza: ha larongo ndra'ugö, ba manizi-nizi ba mogikhi dödö ba khömö andrö." 26 Ba ufatenge zinenge khö Zihona andrö, razo ba Hesibona, moroi ba danö si mate Kedemoti, huhuo nihaogö u'oroi'ö, umane: 27 Omasido utörö danöu, ba ha sambalö lala sebua utörö, lö uhole'ö ndra'odo, he ba gambölö, ba he ba gabera. 28 Öma, fa böi olofo ndra'aga, ba ö'amawa khöma, mabe'e gana'a, ba ba göma idanö, ba mabe'e khöu mböli. Ha lala barö gahegu, ba wanörö, u'andrö, — 29 noa göi latehe khögu da'ö iraono Gezau, ba Ze'ira, ba Iraono Moabi, ba Gari, — irege u'ötö Yoridano, miyefo, ba danö andrö, nibe'e Lowalangima, Yehowa, khöma dania.

30 Ba lö edöna Zihona, razo ba Hesibona, itehe khöda wanörö, me no tebai alulu gera-erania ba no abe'e dödönia ibe'e Lowalangiu, Yehowa, ena'ö ibe'e ba dangau ia, si no alua ma'ökhö.

31 Ba imane khögu Yehowa: Hiza, noa sa'ae ube'e ba dangau Zihona andrö, fabaya tanönia, ba börötaigö okhögö, wangai khömi tanönia.

32 Ba me ifaondragö ita Sihona, awö zabölö khönia fefu, me möi fasöndra khöda ba zinga Yahasi, 33 ba ibe'e ba dangada ia Lowalangida, Yehowa, tobali ta'alani ia, awö nononia, awö zabölö andrö khönia fefu. 34 Ba atu'a ita ba mbanuania fefu, me luo da'ö, ba dozi banua, ba talakha'ö, he ira matua, ba he ira alawe, ba he iraono; samösa lö ta'orifi. 35 Ha urifö andrö ba hadia nihalöda ba mbanua andrö, si no atu'a ita, ba tahalö khöda ahuluada.

36 I'otarai Garoeri, ba mbewe Garono ba i'otarai mbanua ba ndraso andrö, numalö ba Gileadi, ba lö banua saro, si no töra fa'alaŵa khöda mena'ö; ahori ibe'e ba dangada Lowalangida, Yehowa. 37 Ha tanö Ndraono Gamoni andrö, ba lö öbabaya, fefu, tanö ba Yaboko, ba banua ba hili andrö, ba hadia ia fefu, nitenaŵa Lowalangida, Yehowa, ya'ita.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö