Wb/nia/Moze V/16

Oroisa ba wolau fasa andrö

I. 1 Töngöni mbaŵa Abibi andrö, ba wolau fasa khö Lowalangiu, Yehowa; no ba mbaŵa Abibi iheta ndra'ugö ba danö Miserayi Lowalangiu, Yehowa, ba zi bongi. 2 Ba ötaba fasa khö Lowalangiu, Yehowa, mbiri-biri ba saŵi, ba naha andrö, nituyu Yehowa, ba wamonahia töina ba da'ö.

3 Ba lö tola ö'a hadia ia ni'aisöni, awönia; fitu ngaluo wa'ara ö'a roti si lö mu'aisöni, roti ba wa'anumana; — me no soloi ndra'ugö ba danö Miserayi mege — ena'ö itörö tödöu mbaŵa wa'ahetamö ba danö Miserayi, sagötö ya'ugö.

4 Fitu bongi wa'ara, ba lö tola falukha danömö roti ba mbanuami fefu, ba ösi nitabamö sumange, tanö owi, na luo si föföna andrö, ba lö tola tosai irege mahemolu mbanua.

5 Ba fasa andrö, ba lö tola ölau ba mbanua heza, nibe'e Lowalangiu Yehowa khöu, 6 ba naha andrö, nituyu Lowalangiu, Yehowa, dania, ba wamonahia töinia ba da'ö, ötaba wasa andrö, tanö owi, na aekhu luo, ba wa'alaŵa luo saheta'ö ba danö Miserayi, 7 ba örino ba ö'a ba naha andrö, nituyu Lowalangiu, Yehowa, dania, ba si hulö wongi mahemolu ö, ba öfazaŵa'ö, ba wangawuli.

8 Önö ngaluo wa'ara ö'a roti si lö mu'aisöni, ba na luo si fitu, ba owuloa khö Lowalangiu, Yehowa, ba lö tola öhalö hadia ia halöŵö ba da'ö.

Owasa ba wamasi

II. 9 Fitu migu ö'erai; ba mböröta sibai wamasi öbörögö wangerai migu andrö, si fitu. 10 Ba aefa da'ö, ba ölau gowasa migu andrö khö Yehowa, öbe'e zumange saoha gölö, nibe'e dangau, dali wa'ebua howu-howu andrö, nibe'e Lowalangiu, Yehowa, khöu.

11 Ba omuso dödöu föna Lowalangiu, Yehowa, ya'ugö ba onou matua ha onou alawe, ba sawuyumö, ira matua ba ira alawe, ba ono Lewi andrö, si so ba khömi, awö niha bö'ö andrö ba si lö ama, si lö ina, awö lakha mbanua, ba khömi, ba naha andrö, nituyu Lowalangiu, Yehowa, ba wamonahia töinia ba da'ö. 12 Ba ötörö-törö tödöu, wa no sawuyu ndra'ugö ba danö Miserayi mege, ba ötöngöni gamakhoita andrö, ba wolo'ö ya'ia.

Owasa nose daha geu

III. 13 Ba folaumö owasa nose daha geu, ba fitu bongi wa'ara, na no ö'ozaragö mbua nowi khöu, awö nösi mbua nagu.

14 Ba somuso tödö ndra'ugö ba gowasa andrö khöu, ya'ugö ba onou matua ba onou alawe ba sawuyumö, ira matua ba ira alawe, ba ono Lewi andrö, awö niha bö'ö andrö ba si lö ama, si lö ina, awö lakha mbanua si so ba khömi.

15 Fitu bongi wa'ara ölau, khö Lowalangiu, ba naha andrö, nituyu Yehowa dania; ifahowu'ö sa ndra'ugö Lowalangiu, Yehowa, ba mbua zinanöu fefu ba ba halö-halöŵö dangau fefu, andrö wa ö'omusoi'ö sibai dödöu.

16 Medölu zi döfi la'oroma'ö ira föna Lowalangiu, Yehowa, dozi motöi matua ba khömi, ba naha andrö, nituyunia dania: ba gowasa roti si lö mu'aisöni ba ba gowasa migu andrö ba ba gowasa nose daha geu, ba föna Yehowa, ba lö ta'oroma'ö ita lö ta'ohe hadia ia; 17 si tola itaha ölönia i'ohe zamösana, dali howu-howu andrö, nibe'e Lowalangiu, Yehowa, khöu.

Famataro sanguhuku. Fanenaŵa famazökhi adu

IV. 18 Fefu mado ba dozi banua khöu, nibe'e Lowalangiu, Yehowa, khöu, ba öfataro khöu zanguhuku ba kumandru, sangatulö'ö fanguhuku niha sato.

19 Böi fuyu'ö huku, böi ebua dödöu zambuana, böi a gana'a; ö ana'a andrö, ba abösi zatua-tua ibe'e, ba ifuyu'ö huhuo satulö. 20 Ha satulö öfaigi, ena'ö auri ndra'ugö ba ena'ö lö aefa khöu danö andrö, nibe'e Lowalangiu, Yehowa, khöu. 21 Böi taru'ö khöu geu ni'amoni'ö, hadia ia ngawalö geu, ba ngai naha wame'e sumange andrö, khö Lowalangiu, Yehowa, nifa'anömö khöu, 22 ba he gowe si fatuwu khö Lowalangiu, Yehowa, ba böi taru'ö.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö