Wb/nia/Moze V/22

Oroisa ba wangomasi'ö awö ba hadia ia zoadu

I. 1 Na ö'ila zaŵi dalifusöu si suna ba ma biri-birinia, ba böi zi lö ötolo; ö'ohe mangawuli khö dalifusöu. 2 Ba na aröu mbanua dalifusöu andrö, ba ma na lö ö'ila ha niha, ba öhalö khöu ua, öfonaha ba khöu, irege i'alui talifusöu andrö, ba öfuli khönia dania. 3 Ba ömanö göi na kalidenia, ba he na nukhania ba he hadia ia fefu, si no aekhu khö dalifusöu, na no ösöndra; lö tola lö örorogö. 4 Na ö'ila no alau galide dalifusöu, ba lala, ba ma saŵinia, ba böi zi lö ötolo, ölului khönia ba wamaoso.

5 Ira alawe, ba böi yamu'onukha nukha ndra matua, ba ira matua, ba böi yamu'onukha nukha ndra alawe; dozi sa solau si manö, ba sogoro Lowalangiu, Yehowa.

6 Na ö'ila ba zinga lala ba hogu geu, ba ma ba danö tou, gazuni wofo, si so ono, ba ma si so adulo ba na ifaukhu na nononia, ba ma adulo, ina, ba böi halö nina fabaya ono; 7 öfoloi nina ba öhalö khöu nono, ena'ö sohahau tödö ndra'ugö ba ena'ö anau nosou.

8 Na molau omo ndra'ugö, ba öfotarali zagö khöu, fa böi tohare ba nomou horö fange'e öbe'e, na so zaekhu tou, moroi yaŵa, niha.

9 Böi fodua balö zinanö ba kabu nagu khöu, fa böi tobali ni'amoni'ö fefu, he bua zinanö andrö, nitarumö, ba he bua nagu ba kabu andrö..

10 Böi faedo ira zaŵi galide ba wamotokhi tanö.

11 Böi fake nukha si dua balö bana, bu mbiri-biri ba tarafali, ba wanoso ya'ia mege.

12 Öfobowo-bowo watalinga mbarumö sebua andrö, si öfa, barumö luni-lunimö andrö.

He lawisa na so zamöbögö horö ba ndra alawe

II. 13 Na so zi no mangai ira alawe, ba na anuzu dödönia dania, na no orudu ia khönia, 14 na iböbögö khönia zi lö sökhi, na obou döinia ibe'e, wanguma'ö: No uhalö galawe andrö, ba orududo khönia, ba u'ila wa tenga ono alawe, 15 ba ndramuhalö ira ama nono alawe andrö dandra wa ono alawe ia, ba ndramu'ohe baero, ba mbawa göli ba zalaŵa mbanua, 16 ba imane dania ba zalaŵa ama nono alawe andrö: No ube'e ba niha andre nonogu, ba me anuzu dödönia iya'e, 17 ba iböbögö khönia horö, wanguma'ö: Tenga ono alawe nonou andrö, u'ila, ba ya'e dandra wa ono alawe nonogu! Ba ndramubologö lembe andrö föna zalaŵa mbanua.

18 Ba noa da'ö, ba ndramuhalö niha andrö salaŵa mbanua andrö ba ndramuŵa'ö wangotu'ö ya'ia, 19 ba lakhau göi ia, otu rufia, ba wame'e khö nama galawe andrö. Noa sa ibe'e obou döi nono alawe Ndraono Gizeraeli [niha andrö], ba böi yatebulö dongania, ba sagötö ya'ia lö tola itibo'ö.

20 Ba na si ndruhu niŵa'önia andrö, na tebai tefaduhu'ö, wa ono alawe zi bohou muhalö andrö, 21 ba la'ohe ba golayama namania galawe andrö, ba latebu kara ia banuara, wamunu ya'ia, me no horö sebua ifazökhi ba Ndraono Gizeraeli, me no mohorö ia baomo khö namania. Ömanö wangohori si lö sökhi ba khömi.

Huku zohorö

III. 22 Na so nira'u baewawö, na ihoröni ndronga zodonga, ba faoma mate ira, he ira matua, si horöni alawe andrö ba he ira alawe andrö. Ömanö wangohori si lö sökhi ba Ndraono Gizeraeli. 23 Na so zi falukha khö nono alawe, si no mufohu, bakha ba mbanua, ba na ihoröni, 24 ba mi'ohe baero mbawa göli mbanua andrö, faoma darua ira, ba mitebu kara, wamunu ya'ira, ono alawe andrö, me lö ni'ekhugönia niha, bakha ba mbanua, ba ira matua andrö, me no ihoröni ndra alawe nawönia. Ömanö wangohori si lö zökhi ba khömi.

25 Ba na ba danö falukha ndra matua andrö khö nono alawe andrö, si no mu'onihagö, ba na ilangögö manö, na ihoröni, ba ha ira matua, si horöni ya'ia, zi mate. 26 Ba ono alawe andrö, ba böi lababaya; lö'ö sa nifazökhinia horö börö wamunu; ba zi manö, ba no timba na itema ibunu nawönia niha. 27 Me no ba danö falukha ia khönia, ba ma no mu'ao nono alawe andrö, si no mufohu, ba ma lö si möi manolo ya'ia.

28 Ba na so zi falukha khö nono alawe si lö mufohu na, ba na ira'u ba na ihoröni, ba na nira'u baewawö, 29 ba 50 rufia ibe'e khö nama nono alawe andrö niha andrö, si horöni ya'ia, ba labe'e khönia, dongania, me no ihoröni, ba sagötö ya'ia, ba lö tola itibo'ö.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö