Wb/nia/Moze V/4

Famarou tödö ba wolo'ö oroisa

I 1 Ba iya'e, ba mifondrondrongo gamakhoita andrö, awö huku andrö ba nifahaögu ya'ami, ya'ami Iraono Gizeraeli, ena'ö mi'o'ö ia ba ena'ö auri ami ba ena'ö möi khömi danö andrö, nibe'e Yehowa, Lowalangi ndra tuami andrö, khömi dania.

2 Oroisa andrö, nifa'emagu khömi, ba böi midou'ö ba böi miwuwu; oroisa andrö, nibe'e Lowalangimi, Yehowa, nifa'emagu khömi, ba mi'o'ö.

3 No hörömi zangila nilau Lowalangi, börö Mba'ali-Weoro andrö: dozi si olembai Ba'ali-Weoro andrö, ba no ihori ba hunömi Lowalangiu Yehowa, 4 ba ya'ami andrö, si lö faröi, si lö mamöhöi Lowalangimi Yehowa, ba ahori auri, irege ma'ökhö andre.

5 Hiza, no ufahaö ami ba gamakhoita ba ba huku, dali niŵa'ö Lowalangiu, Yehowa, khögu, ena'ö mi'o'ö dania ba da'ö, ba danö andrö, ba zi möi ami, ba wangokhögö ya'ia. 6 Mitöngöni ba mi'o'ö! Da'ö sa dania wa'atua-tuami ba fa'onekhemi wamaigi niha baero; na larongo dania gamakhoita andrö fefu, ba lamane: Si ndruhu, soi satua-tua ba sonekhe soi sebua andrö!

7 Heza atö so soi sebua si so Lowalangi, si no si manö fa'ahatö khöra, si mane Lowalangida, Yehowa [khöda], ero na ta'angaröfi li ia? 8 Ba heza so soi sebua, si no si manö fa'amo'ahonoa amakhoita, awö huku, si mane oroisa andrö fefu, ni'ombakha'ögu khömi ma'ökhö?

9 Ba angelama ba faigi-faigi, fa böi olifu'ö ngawalö andrö ni'ila höröu, ba fa böi aefa ba dödöu, götö wa'anau nosou; ö'ombakha'ö ba ndraonou ba ba ma'uwumö. 10 Baŵa andrö, me so'ö föna Lowalangiu Yehowa, ba gahe hili Horebi andrö, me imane khögu Yehowa: Falukha'ö khögu zato! Da'ufarongogö khöra daroma ligu andrö, ena'ö lafamaha ira ba wangata'ufi ya'odo, götö wa'anau nosora ba guli danö ba ena'ö lafahaö göi ndraonora.

11 Ba mi'ondrasi, mi'iagö gahe hili; ba humola-hola hili andrö, irugi mbanua si yaŵa, ba [baero ö, ba] fa'ogömi-gömi ba lawuo ba salu. 12 Humede khömi Yehowa moroi ba dalu galitö; linia, ba mirongo, ha li, ba lö soroma khömi nga'eu. 13 I'ombakha'ö khömi wawu'usa li andrö khönia, niŵa'önia khömi folo'ö, taroma li si fulu andrö, ba isura ba gara wanura si dombua.

14 Ba khögu iŵa'ö Yehowa, me luo da'ö, wamahaö ya'ami ba gamakhoita andrö ba ba huku andrö, ena'ö mi'o'ö ba danö andrö, si möi ami miyefo, ba wangokhögö ya'ia.

Famangelama ba wanawö ya'ia

II 15 Ba mifaigi sibai — nosomi mbalazi — me no lö ni'ilami hadia ia nga'eu, me luo humede khömi Yehowa moroi ba galitö, ba gahe hili Horebi, 16 fa böi miwöwöi wamakiko, wamazökhi khömi adu nifoe, hadia ia wamaedo, he nga'eu ndra matua, ba he nga'eu ndra alawe, 17 ba he nga'eu zaliŵa-liŵa ba danö, hadia ia, si öfa ahe, ba he nga'eu wofo so'afi, sihombo ba dalu mbanua, 18 ba he nga'eu zanana ba danö, ba he nga'eu gi'a, si so ba nidanö barö danö.

19 Ba na öfakhölö'ö miyaŵa ba mbanua, na öfaigi-faigi luo ba baŵa ba döfi, ngahönö andrö fefu ba mbanua si yaŵa, ba fa böi elungu'ö, wangalulu khönia, awö wamosumange ya'ia, me no ibe'e ba soi niha bö'ö fefu, ba guli danö misa Lowalangiu, Yehowa.

20 Ba ya'ami, ba no nihalö Yehowa khönia, no iheta ami ba galitö famahele zi'öli andrö, ba danö Miserayi, ena'ö soi tana khönia ami, si mane ma'ökhö.

21 Ba khögu, ba no mofönu Yehowa, börö ba khömi, irege tobali fahölu ia, lö tola u'ötö Yoridano, ba lö tola uhundragö danö si sökhi andrö, nibe'e Lowalangiu, Yehowa, khöu. 22 Ba danö andre mate ndra'o iŵa'ö, lö u'ötö Yoridano, ba ya'ami ba mi'ötö ba wangokhögö tanö si sökhi andrö.

23 Mifaigi sibai, fa böi olifu ami wawu'usa li andrö, me no fawu'u li khömi Lowalangimi, Yehowa, ba fa böi mifazökhi khömi nadu, famaedo hadia ia, nitenaŵa Lowalangiu, Yehowa, ya'ugö. 24 Alitö si manga-manga hadia ia sa Lowalangiu andrö, Yehowa, no Lowalangi solohu. 25 Ba na miwöwöi wamakikomi, na no mo'ono ndra'ugö ba na no tumbu ma'uwumö, na no ara ami ba danö, na mifazökhi khömi nadu, famaedo hadia ia, wamazökhi horö khö Lowalangimi, Yehowa, na tobali mofönu ia, 26 ba ukaoni si so ba mbörö ba khömi andrö mbanua si yaŵa ba tanö tou, ma'ökhö andre, wa lö arara dania, ba tehori ami ba danö andrö, ba zi möi ami dania, miyefo Yoridano, ba wangokhögö ya'ia, lö'ö sa ara dania ami ba danö; nise'e ami.

27 Ba niha baero ifazawili ami Yehowa; lö'ö sa atoto dania ami, si tosai, ba mbanua niha baero andrö, ba ni'oloi'ö Yehowa ya'ami dania. 28 Lowalangi nifazökhi danga niha dania mifosumange ba da'ö, eu ba kara, si lö mangila niha ba si lö mamondrongo li niha, ba si lö manga ba si lö mangago hua hadia ia.

Fa'ahakhö dödö Lowalangi mbanuania

III 29 Ba ba da'ö dania ö'alui Lowalangimö, Yehowa, ba ösöndra, na moroi si'aikö ba dödöu ba na moroi si'aikö ba gera-erau fefu wehulu dödöu khönia. 30 Ba ba wa'abu dödöu andrö dania, na no göna ndra'ugö da'ö fefu, ba ba gafuriata, ba öfalalini gera-erau, öfuli'ö khö Lowalangiu, Yehowa, ba öfondrondrongo linia. 31 Me no Lowalangi sahakhö tödö Lowalangimö andrö, Yehowa, lö iböhöli ndra'ugö, ba lö omasi ia tekiko ndra'ugö, ba lö olifu ia wawu'usa li andrö, me fawu'u li ia khö ndra tuau mege, si no möi ba hölu ia khöra.

32 Sofu atö, he wisa ba götö föna, me lö ya'ugö na, i'otarai luo andrö, me ifazökhi niha ba guli danö Lowalangi; sofu, i'otarai wondrege danö, numalö ba wondrege tanö sa, na no irai itörö si manö fa'ebua, na no murai murongo zi manö! 33 Na so na soi bö'ö, si no irai mamondrongo fehede Lowalangi, si oroi ba galitö, si mane nirongou, ba na lö si mate ira. 34 Ma na no so Lowalangi bö'ö, si no manandraigö fe'amöi, ba wangoroma'ö fa'abölö ba ba wolau tandra ba ila-ila ba fanuwö, ba wangai khönia sambua soi ba hunö mbö'ö, tangania sabe'e ba ta'ionia ni'oro'ö, ba ba wa'abölönia sahöli-höli dödöda; nifolau Lowalangimö andrö, Yehowa, khömi, ba danö Miserayi, ba zanehe ami mege!

35 Höröu mege zangila, ena'ö aboto ba dödöu, wa no Yehowa Lowalangi, awö wa lö Lowalangi baeronia. 36 Moroi ba zorugo ifarongogö khöu linia ba wamobawa lala khöu, ba ba guli danö i'oroma'ö khöu galitö sebua andrö khönia, ba moroi ba galitö andrö örongo mege daroma linia.

37 Ba me no i'omasi'ö ndra tuau ba me no ituyu ma'uwura furira, ba me no ya'ia zangeheta ya'ugö ba danö Miserayi, ba wa'abölönia andrö, si tenga inötö; 38 tödönia, itimba fönau soi sebua moroi khöu ba sabölö moroi khöu, ena'ö ya'ugö i'ohe ba danö ba ena'ö khöu ibe'e, 39 okhötamö, si mane ma'ökhö, ba ya'aboto sa'ae ba dödöu, ba ötanö ba dödöu, wa no Yehowa Lowalangi ba zorugo yaŵa ba ba guli danö tou, awö wa lö Lowalangi baeronia.

40 Ba ö'o'ö nifakhoinia andrö ba oroisania, nifa'emagu khöu ma'ökhö, ena'ö sohahau tödö ndra'ugö, fabaya iraonou furiu dania, ba ena'ö lö tebulö wa'anau nosou ba danö andrö, nibe'e Lowalangiu, Yehowa, khöu dania.

Banua fangorifi yefo Yoridanö ba famobörö famasugi oroisa

IV 41 Ba ihonogöi mbanua Moze, banua yefo Yoridano, tanö ba gatumbukha luo, tölu, 42 ena'ö ba da'ö isaŵa, na so zi no mamunu awönia si lö mu'odödögö ba si lö fatiusania khönia, mege sa'ae, ba ena'ö i'ila i'orifi ia, wanaŵa banua da'ö zambua:

43 Beseri andrö, ba danö si mate ba zalo'o hili, ba ba mado Rubeno, ba ba mado Gado, ba Ramoti ba Gileadi ba ba mado Manase, ba Golana ba Mbazana. 44 Ba da'ö goroisa andrö, nifa'ema Moze ba Ndraono Gizeraeli. 45 Da'ö lala ba da'ö, nifakhoi andrö, awö huku andrö ni'ombakha'ö Moze ba Ndraono Gizeraeli, me aheta ira ba danö Miserayi, 46 yefo Yoridano, ba ndraso, ba gamaudu Mbeti-Weoro, ba danö razo Ndraono Gamori andrö, Sihona andrö, ba Hesibona, ni'alani Moze ba Iraono Gizeraeli, me la'otarai danö Miserayi, 47 nihalöra tanö, si mane tanö Ogi andrö, razo Mbazana, tanö razo Ndraono Gamori andrö, si darua, yefo Yoridano, tanö ba gatumbukha luo, 48 i'otarai Garoeri, ba mbewe Garono, irugi hili Ziono, 49 ya'ia Heremono andrö, fabaya salo'o tanö andrö, ba zi tambai Yoridano, tanö ba gatumbukha luo, fefu, irugi zilua'asi andrö ba zalo'o tanö ba gahe hili Wisiga.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö