Wb/nia/Amaedola Zelomo/25

Orudua niŵa'ö Zelomo ni'ozaragö me luo razo Hisikia

1 Niŵa'ö Zelomo göi da'e. Ni'ozaragö zi so khö Hisikia razo mado Yuda andrö.
2 Ba Lowalangi, ba fangebua duriania, na ibini'ö hadia ia, ba ba razo niha, ba fangebua duria, na la'alui sibai, na so hadia ia.
3 Si mane fa'alaŵa mbanua si yaŵa ba si mane fa'abakha danö si tou, si manö göi dödö razo, wa tebai tesöndra.
4 Na laheta gakhozila ba wirö, ba mofozu gama-gama nifazökhi duka gana'a.
5 Nifofanö ba ngai razo zolau si lö sökhi, ba möi fangaro dadaomania wa'atulö.
6 Böi mohokha ndra'ugö föna razo, ba böi bali'ö nahau naha zebua.
7 Sökhi na lamane khöu: Fa'ese'ö miyaŵa; moroi na tanö tou labe'e ndra'ugö, ba zanehe zalaŵa, si no ö'ila mege.
8 Böi alio fasoso ndra'ugö; he öwisa sa dania, na no aila ndra'ugö ibe'e awöu?
9 Fatunö huhuou khö nawöu, ba böi bokai hadia zi tobini khö nawöu;
10 Fa böi i'ailasi ndra'ugö samondrongo, ba tebai sa'ae döhö duriamö si lö sökhi.
11 Si mane bua gae balaki ba wiga firö, si manö daroma li ba ginötö.
12 Si mane walewale ana'a ba aya balaki, si manö zame'e lala ba dögi dalinga samondrongo.
13 Si mane fa'okafukafu deu si baku, na baŵa wamasi, si manö zinenge si lö faya, ba zamatenge ya'ia; okafukafu dödö zokhö ya'ia ibe'e.
14 Si mane lawuo, awö nangi si lö teu, si manö niha sanuno ya'ia ba mbuala, si lö ibe'e.
15 Fa'ebolo dödö wangai dödö zanguhuku, ba famatö döla lela si lö fönu.
16 Na ösöndra ŵe ŵani, ba a ndrohu-ndrohu, ena'ö böi töra fa'abuso, fa böi öfuli ö'uta'ö.
17 Böi asese'ö we'amöi yomo ba nomo nawöu, fa böi aföli ia ndra'ugö ba fa böi fatuwu ndra'ugö khönia.
18 Farökha ba gari ba ono wana satarö niha, si möi sasi sofaya ba khö nawönia.
19 Amaedola mboha si no obou hunö ba amaedola gahe si no fabesu wanötöna ba zi faröi na baŵa wamakao.
20 Si mane sameta baru na baŵa wa'oafu ba si mane folau asio ba gigimö, si manö zanunö ba zabu tödö.
21 Na olofo zi fatiu tödö khöu, ba be'e gönia, ba na owökhi dödönia, ba fabadugö khönia nidanö.
22 Na ömanö, ba ö'owuloi mbo galitö ba högönia, ba Yehowa zanulöni khöu.
23 Angi moroi yöu, ba ifa'aso deu, ba falelalelasa nibini'ö, ba ifobörö wa'abao mbawa.
24 Sökhi na ba mbumbu nomo yaŵa so ita, moroi na orudu yomo ita ba ndra alawe si fasoso-soso.
25 Si mane idanö kafu ba lela si no odufodufo, si manö duria si sökhi, moroi ba danö saröu.
26 Si mane umbu si no olotu ba si mane ba'a nifakuyu, si manö zatulö sangiwa föna zebua horö.
27 Na abölö oya ta'a ŵe ŵani, ba lö sökhi; ba na ta'alu-alui tödöda zafökhö fangalui, ba ebua döida.
28 Si tebai manaha tödönia, ba no hulö mbanua si no atu'a sanuwö, banua si lö öli.

Famotokhi ba gahe

Fabaliŵa lala

Olayama Amaedola Zelomo: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö