Wb/nia/Amaedola Zelomo/24

I. Nibologö dödö

edit

1 Böi afökhö dödöu ba niha si lö sökhi tödö, ba böi omasi ndra'ugö, möi'ö awöra.
2 Famalangögö awöra sa zomasi dödöra, ba famakao nilau mbewera.
3 Fa'atua-tua wangotomosi nomo, ba era-era ba dödö wangaronia.
4 Ba fa'aboto ba dödö wamo'ösi naha girö-girö, girö-girö sebua böli ba girö-girö omasiö.[1]
5 Sabölö niha satua-tua, ba ba niha si so fa'aboto ba dödö, ba oi so wa'abe'e.
6 Na sökhi wamatörö, ba möna ndra'ugö ba wanuwö; ba ba zi lö ambö samolala tödö, ba so wangorifi.[2]
7 Si lö tödö, ba lö ikhamö wa'atua-tua, ba lö hede-hedenia ba mbawa göli.
8 Sangalui folau si lö sökhi, ba lafotöi sanao horö.
9 Fa'owöhö mowa horö andrö, ba sogoro niha bö'ö zango'aya.
10 Na hulö zi lö döladöla ndra'ugö, na baŵa wamakao, ba si lö boto wa'abölöu.
11 Orifi nisöbi ta'io ba wamunu, ba sanaŵa nitaba bagira lö döladöla, ba tenaŵa![3]
12 Ba na öŵa'ö ena'ö: "Lö nirongoma hadia ia", ba si ndruhu, aboto ba dödö zanulo tödö niha andrö, ba sangila zamaigi-maigi nosou, ba isulöni ba niha wolaunia.[4]
13 A ŵe ŵani, ya'ugö onogu, me no si sökhi, ba sami ba gararou nösi gawa'awa.
14 Amaedola da'ö be'e ba dödöu wa'atua-tua andrö: na no ösöndra ia, ba so na sa zi so fönau, ba tebai tobali faya wanötönamö.[5]
15 Böi darodarogö nahia zatulö tödö, ya'ugö sebua horö, ba böi dudugö waratenia.
16 Mewitu sa alau zatulö tödö, ba mewitu ifuli maoso; ba sebua horö, ba tetaru mbagi, na göna famakao.[6]
17 Na alau zi fatiu tödö khöu, ba böi omusoi'ö tödö; ba na tetaru mbaginia, ba böi owua-wua dödöu.[7]
18 Fa böi i'ila Yehowa, ba abua khönia, ba lö'ö sa'ae mofönu ia ba da'ö no mege.
19 Böi maoso dödöu ba zamazökhi si lö sökhi, ba böi afökhö dödöu ba zebua horö.[8]
20 Lö'ö sa si so föna zi lö sökhi; fandru zebua horö, ba mate.[9]
21 Ata'ufi Yehowa, ya'ugö onogu, ba ata'ufi razo, böi ae awö zolaŵa.[10]
22 Itörö dania ira famakiko, lö mudöna-döna; ha zangila ha wa'ara, ba faoma tekiko ira.[11]

II. Tohu-tohu niŵa'ö zatua-tua

edit

23 Niŵa'ö zatua-tua göi da'e: Na ebua dödö zambuana ba wanguhuku, ba no si lö sökhi.[12]
24 Sanguma'ö ba zi so horö: "Lö horöu", ba ni'elifi niha sato, ni'elifi soi niha.
25 Ba sangatulö'ö fanguhuku, ba falukha wa'ohahau dödö, möi khöra howu-howu ba si sökhi.
26 Si fa'ago bawa khö nawönia zi göna fanema li.[13]
27 Asiwai halöŵöu baero, haogö wonowi, awena dania molau omo ndra'ugö khöu.
28 Böi ae sasi ba khö nawöu, lö börö; hadia, edöna'ö ölau waya beweu?[14]
29 Böi ömane: "Nilaunia khögu ulau khönia göi, usulöni ba zamösana wolaunia."[15]
30 No utörö hinölu nowi niha sareu, ba singa kabu nagu ba niha si lö tödö,
31 ba hiza, no tehawu o'o, no tobalu du'u mbolonia, ba ölinia, ba no aso'a.
32 Ba unehegö, utöngöni, ufaigi ba uhalö fanenaŵa khögu.
33 Femörö ma'ifu, fa'alau hörö ma'ifu, famatahö tanga ma'ifu, ba wolombase.[16]
34 Ba itörö'ö moroi sa fa'anumana, hulö niha sanörö tanö, awö wa'ambö, timba zi no mangaro.[17]

Famotokhi ba gahe

edit
  1. Faigi 31:10–31
  2. Faigi 20:18; 11:14
  3. Yob 29:12; Sin 82:4
  4. Faigi 16:2; SamI 16:7; Rom 2:6
  5. Faigi 23:18
  6. Yob 5:19; Sin 37:24
  7. Yob 31:29
  8. Faigi 3:31; Sin 37:1; 73:3
  9. Faigi 13:9
  10. FetI 2:17
  11. Rom 13:2
  12. MozIII 19:15
  13. Faigi 15:23
  14. Faigi 19:5
  15. Faigi 20:22
  16. Faigi 6:9–11
  17. Faigi 10:4

Fabaliŵa lala

edit

Olayama Amaedola Zelomo: 12345678910111213141516171819202122232425262728293031

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö