Wb/nia/Amaedola Zelomo/22
I. Amakhoita hadia ia, ba gamuata niha
edit1 Sebua böli döi si sökhi moroi ba gana'a sebua, ba si sökhi moroi ba wirö ba moroi ba mbalaki wa'ebua dödö.[1]
2 Falukha ira zo'ana'a zi numana; somböi ya'ira fefu, ba ya'ia Yehowa.
3 Satua-tua, ba i'ila wamakao, ba ibini'ö ia; ba sowöhö-wöhö, ba latörö manö, ba te'ala.[2]
4 Luo wa lö fayaŵa, luo wangata'ufi Yehowa, ba fa'ebua gana'a ba fa'ebua döi ba fa'auri.
5 Ba lala zabila tödö, ba so ndroi ba so wesu gahe; ba sondrorogö nosonia, ba ihene.
6 Fahaö nono matua, faigi ginötö; ba lö'ö göi iböhöli, na satua ia.[3]
7 Samatörö si numana zo'ana'a; ba samalali ana'a, ba tobali sawuyu zame'e nifalali.
8 Sanaru si lö atulö, ba ibasi wamakiko; ba bözi-bözinia, na mofönu ia, ba ariri.[4]
9 Si sökhi tödö, ba falukha howu-howu; me ikhete ö zi numana mbalazonia.[5]
10 Fofanö zango'aya, ba fao khönia wasosota; ba tebato wagua-guasa ba fangaila.[6]
11 Somasi fa'ohau-hau dödö, si so bewe omasiö, khönia fahuwu razo.[7]
12 Hörö Yehowa zondrorogö fa'aboto ba dödö; ba fehede zi faröi andrö, ba lö boto ibe'e.
13 Imane zareu; "So zingo baero, ma dania nibunu ndra'o ba golayama."[8]
14 Kohokoho sabakha mbawa ndra alawe bö'ö, ba da'ö bakha alau zofönu Yehowa.[9]
15 Ba dödö nono matua, ba no faböbö wa'owöhö mowa; ba bözi-bözi fangotu'ö wameta ya'ia khönia.[10]
16 Na lafakao zi numana, ba mohare ia; ba na mame'e ba zo'ana'a, ba fa'ate'alania.
II. Famarou dödö ba wamondrongo li wa'atua-tua andrö
edit17 Be'e mbörö dalingau ba fondrondrongo, li zatua-tua ba faudugö tödöu wa'aboto ba dödögu andrö.
18 Sökhi sa, na ö'irö'ö ba dödöu; ena'ö na lö awu'a ia fefu, ba mbeweu.
19 Ena'ö manötöna ndra'ugö khö Yehowa, ba da'ö ufahaö ndra'ugö ma'ökhö, ya'ugö nifahaögu.
20 Hadia, tenga si sökhi nisuragu khöu, famobawa lala ba famotokhi?
21 Ena'ö ufarongogö khöu zi duhu, taroma li saro, fa ö'ohe li salakha lö mangiwa dödö, ba zamatenge ya'ugö.
III. Amakhoita ni'ozaragö
edit22 Böi osindra'ui zi so khö zi numana, me no si numana ia, ba böi hundragö zi no göna famakao, ba mbawa göli.
23 Yehowa sa zolohe ba lala huhuora, ba i'etu'ö noso zi anagöi ya'ira.[11]
24 Böi ae awö zofönufönu, ba böi fao-fao ndra'ugö ba zi ono wönutö.[12]
25 Fa böi öfamaha ndra'ugö ba nitörönia andrö, ba fa böi öwöwöi dandraŵa wamunumö.
26 Böi orudugö ndra'ugö ba zi fara'ura'u tanga, ba zi möi ba wali ba gömö.[13]
27 Na lö khöu famu'a gömö dania, ba hana wa ölulu dofou baröu?
28 Böi wu'ai nola föna, nitaru'ö ndra tuau.[14]
29 Na ö'ila niha satarö tödö ba halöŵönia, ba tola möi ia enoni razo, alakha lö möi ia ba zi lö töi.[15]
Famotokhi ba gahe
editFabaliŵa lala
editOlayama Amaedola Zelomo: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö