Wb/nia/Amaedola Zelomo/20
Famangelama ba wemabu-mabu, ba wa'areu ba ba walimosa edit
1 No sango'aya nagu andrö ba si fagua-gua zi mabu ita; dozi ha niha zi mabu-mabu da'ö, ba tebai atua-tua.[1]
2 Fameta'u zalaŵa, ba no hulö wendröndröndröndrö zingo; ha niha zangandrö fönunia, ba no sama'ua famunu.[2]
3 I'ebua'ö duriania niha, na lö ihatö'ö ia ba wasosota; ba ha niha zi lö tödö, ba no somasi fagua-guasa.
4 Sareu, ba lö mangahalö na baŵa, ba na idöna-döna dania mbua nowi, na baŵa wamasi, ba lö hadia ia.[3]
5 Idanö sabakha nikhoi dödö niha barö doto, ba si so tödö, ba isousou yaŵa.[4]
6 Ahatö dozi niha falukha zebua tödö, ba ha niha zanöndra niha si lö faröi?
7 Na so zatulö tödö, sanörö lalania lö sinegu, ba falukha wa'ohahau dödö nononia furinia.[5]
8 Razo sidadao ba dadaoma wanguhuku, ba ifazawili fefu zi lö sökhi, hörönia.[6]
9 Ha niha zi tola manguma'ö: "No uhaogö dödögu; no aheta horögu?"[7]
10 Dombua zaga ba dombua zu'a-zu'a, ba no faoma ni'ogorofi Yehowa.[8]
11 Su'a nono matua sa'ae, ba oroma ba mbua-buania, na sohau-hau ba na sadölö dödönia.[9]
12 Tögi dalinga samondrongo ba hörö sangila niha, ba faoma niwöwöi Yehowa.
13 Böi omasi'ö wemörö, fa böi numana ndra'ugö; faboka höröu, ba lö ambö göu.[10]
14 "Si lö sökhi! si lö sökhi!" iŵa'ö sowöli; ba na no aefa ia, ba isuno ia.
15 So sa gana'a, ba no fahöna mani-mani, ba aya sebua böi mbewe si so fa'aboto ba dödö.
16 Na so zi möi ba wali ba niha bö'ö, ba halö mbarunia, ba halö gade khönia, börö niha bö'ö andrö.[11]
17 Ami ba mbawa niha gö nilimo, ba dania ba fazozo ba mbawania nene.[12]
18 Lua-lua wamagölö nihonogöi, ba haogö wamatörö, na manuwö'ö.
19 Samokai si tobini, ba no sanandraŵaisi awönia; andrö böi fabaya ndra'ugö ba zoya bewe.[13]
20 Sangelifi amania ba inania, ba no si mate fandru ba dalu zogömi-gömi.[14]
21 Ondröita, nikhamö ba wa'aösö wamobörö, ba lö howu-howu ba gafuriata.
22 Böi ŵa'ö; "Usulöni zi lö sökhi"; döna-döna khö Yehowa, ba itolo'ö.[15]
23 Famodombua saga ba i'ogorofi Yehowa, ba si lö sökhi waliera falimosa.[16]
24 Yehowa zanguhuku beka niha; ba niha andrö — he moroi wa'aboto ba dödönia lalania?
25 Tandraŵa niha, na iŵa'ö manö: "Ni'amoni'ö", ba na awena itulo tödönia, na no awai ifabu'u.
26 Razo satua-tua, ba ifazawili zebua horö, ba ifatörö khöra gaolo wamöbörö wakhe.[17]
27 Fandru nitunu Yehowa dödö niha, isului mbate'e mboto fefu.[18]
28 Nöu razo wa'omasi ba fa lö faröi; ba ibe'e tuwutuwu dadaomania wa'omasi andrö.[19]
29 Lakhömi nono matua wa'abölöra; ba aya zatua, ba huwa andrö.[20]
30 Fangeheta zi lö sökhi zokho sendro ba bözi-bözi sanösö ösi, irege ba zabakha.
Famotokhi ba gahe edit
- ↑ Faigi 23:29–35; 31:5
- ↑ Faigi 16:14; 19:12
- ↑ Faigi 6:6–8
- ↑ Faigi 18:4
- ↑ Faigi 14:26; Sin 112:2
- ↑ Sin 101:3–8
- ↑ Faigi 28:13; 30:12
- ↑ Ayati 23; Faigi 11:1
- ↑ Faigi 22:6
- ↑ Faigi 6:10
- ↑ Faigi 6:1–5; 27:13
- ↑ Faigi 9:17
- ↑ Faigi 24:6
- ↑ MozII 21:17
- ↑ Faigi 24:29; Rom 12:17–19
- ↑ Ayati 10
- ↑ Sin 101:8
- ↑ KorI 2:11
- ↑ Faigi 16:12
- ↑ Faigi 16:31
Fabaliŵa lala edit
Olayama Amaedola Zelomo: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö