Wb/nia/Amaedola Zelomo/14

Fanuno fa'atua-tua ba niha

1 Fa'atua-tua ndra'alawe, ba i'otomosi nomonia; ba falötödö andrö ba idudugö tangania.
2 Sadölö tödö wanörö lalania, ba no sangata'ufi Yehowa, ba sanörö lala sabila, ba no sangositengagö ya'ia.
3 Ba mbawa zi lö tödö, ba so mbözi-bözi ba wayaŵasa; ba bewe zatua-tua, ba no ba'a-ba'a zi lö sökhi.
4 Ba zi lö saŵi, ba lö ösi luha; ba ebua tesöndra balazo ba wa'abölö göröbao.
5 Sasi si ndruhu, ba lö ifakhai waya; ba sasi sofaya, ba ifalua baeha waya.
6 Sango'aya, ba i'alui wa'atua-tua, ba lö falukha; ba ba zi so tödö, ba aoha wangalui fa'aboto ba dödö.
7 Erogö niha si lö tödö; lö'ö sa atö ö'ila wa'aboto ba dödö ba mbewenia.
8 Da'ö wa'atua-tua zi so tödö, na aboto ba dödönia lalania andrö; ba fa'owöhö mowa zi lö tödö, ba no famaelungu.
9 Ba zi lö tödö, ba tobali fango'aya ya'ira zumange fameta horö; ba sadölö tödö, ba no si sökhi tödö khö nawöra.
10 [Ha] tödö zangila safökhö khönia; ba tebai ihalö khönia niha bö'ö wa'omuso dödö zamösana.
11 Omo zebua horö, ba nidudugö; ba ose zadölö tödö, ba no amaedola zobowo.
12 So lala si no adölö taŵa'ö, ba lua-luania, ba saekhu ba wa'amate.
13 Barö wa'iki göi afökhö bakha dödö; ba fozu wa'omuso dödö ba fangabu dödö.
14 Tödö si tefuyu, ba abuso dania lalania andrö; ba fangabuso niha si sökhi, ba bua-buania.
15 Sambö tödö, ba ifati fefu hadia ia niŵa'ö; ba satua-tua, ba ifaigi nibekainia.
16 Satua-tua, ba ata'u, ba i'erogö zi lö sökhi; ba sambö tödö, ba mofönu-fönu, ba lö i'ata'ufi hadia ia.
17 Si ono wönutö, ba ilau nilau zowöhö; ba ba zamakhai falimosa, ba fatiu dödö niha bö'ö.
18 Sambö tödö, ba falukha wa'owöhö; ba satua-tua, ba la'anaembu wa'aboto ba dödö.
19 Si lö sökhi ba lötolalö mangalulu ba zi sökhi; ba sebua horö, ba mangalulu ba mbawa göli ba zatulö tödö.
20 Ba zi numana, ba fa'udu göi zahatö khönia; ba somasi si so ana'a, ba no ato.
21 Si lö ba dödö awönia, ba no salalö; ba ya ahowu zi hakhösi tödö si göna famakao!
22 Hadia, tenga selungu zamakhai si lö sökhi? Ba si falukha fa'omasi ba fa lö faröi zangalui si sökhi.
23 Fefu ngawalö wa'erege dödö, ba mofozu; ba teatea mbewe andrö, ba isaŵa wa'anumana.
24 Ba niha satua-tua, ba saembu ana'a khöra gana'ara; ba fa lö tödö zi lö tödö andrö, ba ha sambalö fa lö tödö.
25 Samaduhu'ö si duhu, ba no sangorifi niha; ba samalua si lö duhu, ba no si falimo.
26 Sangata'ufi Yehowa, ba no si so fanötöna si lö mangiwa; ba ono zi manö, ba no si so saŵatö.
27 Umbu wangorifi wangata'ufi Yehowa andrö, ena'ö lö alau ita ba gu'ö famunu.
28 Fa'ato niha, ba no lakhömi razo; ba na ambö niha, ba si lö boto zalaŵa.
29 Ba zebolo tödö, ba no fahöna wa'atua-tua; ba ba zi ono wönutö, ba fa lö tödö lua-lua.
30 Fa'ebolo dödö, ba no fangorifi mboto, ba fa'afökhö dödö, ba no fa'obou döla.
31 Samalangögö si numana, ba i'o'aya Zomböi; ba si hakhösi tödö si numana, ba ifosumange Zomböi ya'ia.
32 Sebua horö, ba nituli'ö, ba wamakao andrö, si göna ia; ba satulö tödö, ba lö i'abusi tödö na'i wa'amate.
33 Ba dödö zi so tödö andrö, ba no ahono wa'atua-tua; ba si so ba dödö zi lö tödö, ba oroma.
34 Fa'atulö ba no fondrou'ö yaŵa nöri; ba fangailasi soi niha horö.
35 Enoni satua-tua, ba no fa'omasi razo; ba solau saila ita, ba göna fönu.

Famotokhi ba gahe

Fabaliŵa lala

Olayama Amaedola Zelomo: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö